VOV4.Jarai - Lơ 26/3, Jơnum lok 18 Jơnum min khua pơ ala mơnuih ƀon sang tơring čar Lâm Đồng tal 9 hơmâo tŭ ư Tơlơi pơtrrun tuh pơ alin man pơkra jơlan rơdêh pơđuăi hmar Tân Phú (Đồng Nai) - Bảo Lộc (Lâm Đồng) hăng mrô prăk tuh pơ alin rơwang tal 1 lĕ 16.408 klai prăk. Jơlan hơmâo pơkra glông 67km, amăng anun hơmâo 11km găn nao pơ tơring glông Tân Phú tơring čar Đồng Nai, 56km dŏ glăi găn nao pơ tơring glông Dạ Huoai, Dạ Teh, Bảo Lâm hăng plơi prong Bảo Lộc tơring čar Lâm Đồng. Jơlan anai prong rơhaih 22m hơmâo 4 glông jơlan rơdêh ôtô, 2 glông brơi rơdêh dŏ ječ ameč. Kơčăo bruă hơmâo kah pơpha jing 2 tal pơkra, tal 1 hơmâo ngă mơng thun 2021-2025. Prăk tuh pơ alin amăng tal 1 lĕ 16.408 klai, amăng anun prăk Kơnuk kơna ta brơi lĕ năng ai 6.500 klai prăk, dŏ glăi lĕ prăk mơng anom bruă tuh pơ alin jak iâu pơčruh.

Siu H’Mai: Pơblang