VOV4.Jarai - Lơ 25/3,  Ping gah tơring čar Daklak pơphun Jơnum lăng glăi bruă mă mơng grup pơjing Ping gah thun 2020, pok pơhai bruă mă amăng thun 2021. Tui hăng tơlơi lăi pơthâo amăng mông jơnum, thun 2020, Ping gah tơring čar Daklak hơmâo pơphô bruă kjăp kiăng kơ pơphun hiam klă jơnum ruah khua Ping gah djop gưl pơgôp ngă truh kih Jơnum ruah khua Ping gah tơring čar tal XVII. Lu gưl Ping gah, khua grup hơmâo bruă mă klă, thâo pơčeh phrâo kiăng kơ ba tơlơi pơsit mut amăng tơlơi hơdip sit nik.

Bruă pơjing anih anom mă bruă hơbot, mă bruă tŭ yua, pơlir hăng pơhrŏ biên chế, hrưn đĭ klă amăng bruă mă hăng pơplih glăi mơnuih mă bruă. Thun 2020, tơring čar Daklak hơmâo pơhrŏ 66 mơnuih apăn bruă hăng rơbêh 1.100 biên chế. Him lăng thun anai, tơring čar Daklak tŏ tui pơhrŏ 60 čô mơnuih apăn bruă hăng rơbêh 1.100 biên chế, tui mrô 10% mơ̆ tơlơi pơsit mrô 39/2015 mơng Ding jum kơđi čar hăng kơčăo bruă kơ pơhrŏ mơnuih mă bruă hăng pơplih mơnuih mă bruă amăng Khul apăn bruă Ping gah tơring čar Daklak ba tơbiă.

Siu Đoan: Pơblang