1-Prap lui djop tơlơi gal, gir run ba lŏn ia hrưn đĭ amăng rơnuk phrâo

Hơdôm tơlơi dưi tơdơi kơ 40 thun pơplih phrâo tui tơlơi git gai mơng Ping gah djru brơi Việt Nam pơhlôm brơi tơlơi dưi, tơlơi gal kiăng pơđĭ kyar tañ hloh amăng rơwang tŏ tui pơ anăp. Khua git gai Ping gah dêh čar ơi Tô Lâm pơsit tong anai lĕ hrơi mông tum pơƀut abih bang hơdôm tơlơi dưi, tơlơi gal kiăng lŏn ia ta yak nao rơwang pơplih phrâo, rơnuk hrưn đĭ amăng rơnuk phrâo mơng djuai ania tŏ tui rơnuk rơngai, ngă pô, pơjing lŏn ia tui hơdră xã hội chủ nghĩa hăng rơnuk pơplih phrâo. Jơnum tal 10, Khul apăn bruă Ping gah tal XIII pơsit tong rơnuk hrưn đĭ mơng dêh čar Việt Nam amra pok pơphun mơng Jơnum Ping gah tal XIV.

Kiăng dưi ngă hơnong pơkă anai, mơng anai, djop khul Ping gah, abih bang mơnuih ƀôn sang kiăng đing nao 3 tơlơi pơplih phrâo anun lĕ pơplih pơkra hơdră bruă, hơbot anih anom mă bruă hăng hrưn đĭ klă dong mơnuih mă bruă, wai lăng kjăp, kiăng pơđĭ kyar, laih dong pơtrut kơtang pran kơtang mơng djuai ania, tơlơi ngă pô, hur har khin hơtai, gơgrong, ngă pô, pơlir kjăp pran kơtang djop djuai ania hăng tơlơi gal amăng rơnuk phrâo, ba lŏn ia ta pơđĭ kyar djop mơta, kơtang hloh, hrưn đĭ hăng yak nao pơ anăp.

2 – Khua git gai Ping gah dêh čar ơi Nguyễn Phú Trọng rơngiă

            Lơ 19/7/2024, Khua git gai Ping gah dêh čar ơi Nguyễn Phú Trọng rơngiă tơdơi kơ ruă kraih pioh glăi tơlơi hning rơngôt kơ abih bang Ping gah, abih bang mơnuih ƀôn sang hăng gơyut gơyâo jar kơmar. Tơlơi lăi pơthâo amăng mông rôk ruai glăi kơ Khua git gai Ping gah dêh čar ơi Nguyễn Phú Trọng lăi rơđah: “Hluh gah amăng tơlơi pơmin mơ̆ng rơgom ơi Nguyễn Phú Trọng lĕ Mơnuih ƀôn sang, ană mơnuih, abih pran jua bơwih brơi kơ Mơnuih ƀôn sang, pơplih pran jua mơnuih phrâo djop mơnuih dưm kơnar hăng ƀu pơdơi hơkrŭ đĭ gum hrŏm hơbit, blung hlâo lĕ gum hrŏm hơbit amăng Ping gah, gum hrŏm abih bang djuai ania hăng gum hrŏm jar kơmar klă hiam".

Tơlơi hơdip hăng bruă mă mơ̆ng Khua git gai Ping gah dêh čar ơi Nguyễn Phú Trọng pơdah tơlơi gir run hrưn đĭ ƀu pơdơi mơ̆ng mơnuih cộng sản ha pran jua, pioh abih pran jua pô kơ tơlơi tơpă, mă bruă ƀu pơmin kơmlai kơ pô, sa gru ba jơlan hlâo klă hiam amăng bruă hrăm hăng ngă tui tơlơi pơmin, pran jua, kơnuih Khua mir sir Hồ Chí Minh. Hơdôm anô̆ yôm mơ̆ Khua git gai Ping gah dêh čar ơi Nguyễn Phú Trọng pioh glăi kơ sa glông jơlan kơđi čar kơjăp kơtang, pran đăo kơnang kơjăp amăng pran kơtang gum hrŏm hơbit djuai ania amra jing gru grua kông ngăn yôm phăn kơ Ping gah, Kơnuk kơna hăng Mơnuih ƀôn sang.

3- Bruă pơplih hơbot anih anom mă bruă-tơlơi pơplih amăng wai lăng lŏn ia

Găn rơgao 7 thun ngă tui tơlơi pơtrun mrô 18-NQ/TW lơ 25/10/2017 mơng Khul apăn bruă Ping gah tal XII kơ pơplih phrâo, dưm dăp glăi anih anom mă bruă kơđi čar, truh ră anai, ƀing ta dưi ngă sa, dua tơlơi yôm phăn. Samơ̆, anih anom mă bruă ăt dŏ lu anih, lu gưl; tơlơi tŭ yua amăng bruă mă aka ƀu djơ̆ tơlơi rơkâo, bruă jao.

Lơ 25/1, amăng mông jơnum Khul apăn bruă Ping gah tal XIII, Khua git gai Ping gah dêh čar ơi Tô Lâm rơkâo djop gưl Ping gah, khul grup Ping gah, anih anom mă bruă, djop gưl, gơnong bruă, blung hlâo lĕ ƀing apăn akŏ, khua mua kiăng ba gru, gơgrong, khut khăt ngă tui bruă jao hăng pran jua “đuăi rah, dŏ dong tui glông rah”, “Gơnong glông anăm dŏ tơguăn gưl tơring čar, tơring čar anăm dŏ tơguăn gưl tơring glông, tơring glông anăm dŏ tơguăn ƀon lan”, gir run pơgiong bruă lăng glăi ngă tui tơlơi pơtrun mrô 18-NQ/TW hăng lăi pơthâo Khul apăn bruă Ping gah kơ bruă dưm dăp anih anom mă bruă amăng rơwang tal I thun 2025.

Bruă dưm dăp hơbot anih anom lĕ sa amăng hơdôm bruă kiăng pơdah tơlơi khin hơtai, tuh rơyuh pran jua mơng ƀing apăn bruă, mơnuih mă bruă, rơkâo kiăng ngă tui pơhlôm brơi klă hloh, tơpă sit, lăp djơ̆ kiăng prap ba lŏn ia ta yak nao rơnuk pơplih phrâo.

4 – Bruă bơwih ƀong Việt Nam đĭ kyar kơjăp, GDP đĭ 7%

            Bruă bơwih ƀong dêh čar Việt Nam ăt djă pioh mơn rơnoh hơkrŭ glăi klă amăng thun 2024. Đĭ kyar GDP him lăng hmâo 7%, đĭ nua gơnam dưi wai lăng 4%, djơ̆ tui tơhnal ba tơbiă. Abih bang prăk pơhrui glăi mơ̆ng gơnam sĭ kơ dêh čar tač rơngiao kiăo tui giăm djơ̆ hăng 800 klai dolar Mi, sĭ gơnam tam hmâo nua 23 klai dolar Mi, gah ƀut 15 bôh dêh čar glăk pơđĭ kyar ngă pơhưč prăk tuh pơplai mơ̆ng FDI prong hlong rŏng lŏn tơnah.

Amăng hơdôm hrơi bruă bơwih ƀong rŏng lŏn tơnah lu pơplih, tơlơi đĭ kyar anai ƀu kơnong kơ phun akha kơ tơlơi pơđĭ kyar amăng thun 2025 ôh mơ̆, dô̆ brơi ƀuh jơlan gah pơđĭ kyar tañ mơ̆ng bruă bơwih ƀong Việt Nam dong.

5-  Ruah khua mua amăng Ping gah hăng Kơnuk kơna, tŏ tui “ƀu hơmâo anih kŏm, ƀu hơmâo hlơi gah rơngiao” pơsir hĭ bruă ƀing apăn bruă ngă soh

Thun 2024, bruă ruah mơnuih apăn bruă pơprong mơng Ping gah hăng Kơnuk kơna pơphun tui tơlơi tŭ ư hrŏm, anăp nao hơnong pơkă hrưn đĭ klă dong amăng bruă git gai hăng wai lăng lŏn ia, pơhlôm pơđĭ kyar hơđong. Jơnum khul apăn bruă Ping gah Cộng sản Việt Nam tal XIII hơmâo ruah đĭ, hăng mrô hră plĕ lu hloh, ruah ơi Tô Lâm, Ding kơna Ding jum kơđi čar, ngă Khua mir sir ngă rah Khua git gai Ping gah.

Khua pơ ala mơnuih ƀôn sang dêh čar tal XV hơmâo ruah Khua git gai pơ ala mơnuih ƀôn sang dêh čar ơi Trần Thanh Mẫn hăng Khua mir sir ơi Lương Cường, hrŏm hăng anun lĕ bruă ruah ƀing khua mua pơkŏn amăng Ƀirô Khua pơ ala mơnuih ƀôn sang dêh čar, kơnuk kơna hăng hơdôm anom bruă phiah phiăn. Bruă pơjing, pơplih pơkra amăng ping gah hăng pơgăn hưp ƀong kông ngăn, bruă ngă soh tŏ tui lĕ bruă akŏ phun amăng thun 2024. Lu khua mua amăng Ping gah, kơnuk kơna hơmâo pơsir kơđi ngă soh, tơlơi anai brơi ƀuh hơdră bruă “Ƀu hơmâo anih kŏm, ƀu hơmâo hlơi gah rơngiao”, pơdah tơlơi gir run pơjing anih anom kơđi čar mă bruă tơpă sit, hơđong kjăp.

6 – Kơthel tal 3 ngă răm rai kơtang kơ mơnuih hăng kông ngăn ƀơi kual Kơdư dêh car

            Kơthel tal 3 Yagi lĕ kơthel kơtang hloh amăng rơwang 30 thun rơgao ƀơi kual Ia Rơsĭ Ngŏ, luh nao kual Kơdư dêh čar lơ 7/9/2024 hăng jua angin kơtang truh rơnoh 17, ngă răm rai prong biă. Kơthel hăng anô̆ ngă tơdơi kơ kơthel hmâo ngă hơjan prong, ia ling kor hăng lŏn tơhroh ƀơi lu anih, ngă 323 čô mơnuih djai, 22 čô mơnuih rơngiă hăng 1.978 čô mơnuih rơka, răm rai bruă bơwih ƀong him lăng rơbêh kơ 81.700 klai prăk.

Gong gai dêh čar hmâo gơgrong hlâo črâo ba, bŏng glăi mơ̆ng tañ, mơ̆ng ataih, hmao tlôn, khut khăt pơgang pơgăn kơthel ngă; mă yua hơdôm tơlơi pơtrun pơsit ječ pioh pơsir anô̆ răm rai, pơhlôm pơdŏng glăi anom mă yua hăng hơđong tơlơi hơdip mơda mơnuih ƀôn sang tơdơi kơ kơthel ngă. Amăng tal kơthel ngă, pran jua “hla hnil gôm hla tơ̆i” mơ̆ng djuai ania Việt Nam glăi dưi rŭ glăi kơtang. Hơdôm bruă mă gum djru hmâo lar hyu amăng đơ đam dêh čar, hmao tlôn djru mơnuih ƀôn sang kual kơthel ngă yak rơgao tơlơi tơnap, hơđong tơlơi hơdip mơda.

7-Pơplih tañ amăng bruă pơkra jơlan glông hăng apui lơtrik mơng hơdôm akŏ bruă phun

Thun 2024, hơdôm akŏ bruă phun kơ jơlan glông hăng apui lơtrik hơmâo ngă hăng glăk pơtrut pơđĭ kyar bơwih ƀong huă, pơhlôm brơi apui lơtrik yua hơđong, pơsit tong tơlơi yak nao amăng pơđĭ kyar hơđong kjăp lŏn ia. Truh ră anai, rơbêh 2.000 km jơlan rơdêh đuăi hmar hơmâo mă yua hăng gir run pơgiong 3.000 km jơlan rơdêh đuăi hmar amăng thun 2025. Akŏ bruă glông hrĕ apui lơtrik 500 kV ară tal 3 Quảng Trạch-Phố Nối hơmâo pơkra.

Amăng jơnum lok 8, Khua pơ ala mơnuih ƀôn sang dêh čar tal XV hơmâo tŭ yap tơlơi pơtrun kơ hơdră bruă tuh pơ alin man pơkra jơlan rơdêh đuăi hmar Kơdư-Dơnung, pơgiong hơnong pơkă amăng thun 2035. Khua pơ ala mơnuih ƀôn sang dêh čar ăt pơsit lok pơkra glăi akŏ bruă apui lơtrik ayuh Ninh Thuận, kiăng pơhlôm brơi apui lơtrik yua hăng anăp nao hơnong pơkă asăp hơƀak jrak dŏ 0 amăng thun 2050. Hăng akŏ bruă tơdron rơdêh por Long Thành, Khua pơ ala mơnuih ƀôn sang dêh čar tŭ ư rơwang tal 1 tuh pơ alin man pơkra dua glông jơlan por đĭ gah kơdư hăng sang anih đĭ trun hrŏm hăng hơdôm anih pơkŏn dong dưi čơkă tuai 25 klăk čô ha thun, 1,2 klăk tơ̆n gơnam ha thun.

8 – Pơplih phrâo tơlơi pơmin bruă khua pơ ala mơnuih ƀôn sang hăng hơdôm hơdră pơsit pơplih phrâo

            Khua pơ ala mơnuih ƀôn sang dêh čar ta tal 15 hmâo pioh glăi bruă mă kơtang amăng thun 2024 hăng lu hơdră pơsit pơplih phrâo tơlơi pơmin bruă khua pơ ala mơnuih ƀôn sang hăng pơsir hơdôm bruă yôm phăn amăng Khua pơ ala mơnuih ƀôn sang. Hăng 2 tal jơnum hăng 2 tal jơnum ƀu hmâo pơkă hlâo amăng thun 2024, Khua pơ ala tal 15 pel ĕp hăng hơdră pơsit hơdôm tơlơi yôm phăn bơdjơ̆ nao bruă khua pơ ala mơnuih ƀôn sang, lăng tui đut hlah hăng pơsit hơdôm tơlơi yôm phăn mơ̆ng lŏn ia. 18 tơlơi phiăn hăng 21 tơlơi pơtrun pơsit hmâo pel ĕp, amăng anun hơdôm tơlơi pơsit pơplih phrâo kah hăng brơi Tơlơi phiăn lŏn drŏn, Tơlơi phiăn Sang dô̆ hăng Tơlơi phiăn bơwih ƀong sĭ mơdrô lŏn sang hmâo mă yua tañ hloh 5 blan, mơ̆ng lơ 1/8/2024.

Hơdôm tơlơi phiăn pơplih pơkra yôm phăn kah hăng Tơlơi phiăn tuh pơplai, Tơlơi phiăn tuh pơplai kơnuk kơna hăng Tơlơi phiăn pơkă kual dưi hluai tui kiăng pơtlaih anô̆ gun gah hơdră pơkă, pơtrut pơpha gưl hăng pơsir bruă ngă đang hmua. Hăng pran jua pơplih phrâo, lui khut khăt tơlơi pơmin “ƀu dưi wai lăng lĕ kom”, Khua pơ ala mơnuih ƀôn sang pơjing glông jơlan tơlơi phiăn kơ hơdôm bruă phrâo, pơsur pơčeh phrâo hăng pơtlaih ngăn drăp, pơjing phun than kơ tơlơi pơđĭ kyar kơjăp mơ̆ng lŏn ia amăng rơnuk phrâo.

9- Đơ đam dêh čar gum tơngan ruh hĭ sang dŏ jang jai, tơ̆i rơ̆i

          Lơ 5/10/2024, Kơnuk kơna hăng ƀing khua Jơnum min djop djuai ania mơnuih mơnam Việt Nam hơmâo pơphun jơlan hơdră djru ruh hĭ sang dŏ jang jai, sang tơ̆i rơ̆i amăng đơ đam dêh čar hăng anăn “Sang khăp pap brơi ană plơi pla”. Khua dêh čar ơi Phạm Minh Chính iâu pơthưr “Hlơi hơmâo hơget djru brơi anun, hlơi rơhông bruă nao djru, hlơi hơmâo prăk pơgôp prăk, hơmâo lu djru lu, hơmâo aset djru aset” hăng hơnong pơkă pơgiong bruă djru ruh hĭ 153.000  sang tơ̆I rơ̆I, sang dŏ jang jai đơ đam dêh čar hlâo kơ lơ 31/12/2025.

Khua dêh čar rơkâo djop Ding jum, gơnong bruă, Jơnum min mơnuih ƀôn sang tơring čar, ƀôn prong gah gơnong glông đing nao git gai, ngă tui tơlơi gơgrong hăng tơlơi glăm ba mơng ƀing apăn akŏ amăng bruă hrưn đĭ klă, tŭ yua mơng djop ngăn rơnoh kiăng ngă tui bruă djru sang dŏ brơi mơnuih djru hơkrŭ, sang anŏ ƀun rin, giăm ƀun rin, pơjing akŏ bruă tong ten kiăng pơphun, pok pơhai tŭ yua, pơgôp ngă truh kih hơnong pơkă ruh hĭ sang tơ̆i rơ̆i, sang dŏ jang jai amăng đơ đam dêh čar.

10 – Bruă sĭ blơi lŏn sang hăng mah pơplih nua lu

            Thun 2024 lĕ sa thun hmâo lu tơlơi pơplih hăng bruă sĭ blơi lŏn sang hăng mah ƀơi Việt Nam. Nua sang dô̆ hmâo đĭ lu laih truh rơnoh prăk pơhrui glăi mơ̆ng mơnuih ƀôn sang, ba truh tơlơi ƀu kơnar rơđah biă kơplah wah nua kông ngăn hăng prăk pioh blơi. Bruă sĭ blơi mah ăt djă pioh mơn tơlơi đĭ nua yua kơ nua sĭ mah ƀơi rŏng lŏn ƀu hơđong.

Hơdôm tơlơi pơplih anun khom hmâo hơdră bruă wai lăng ba glăi bôh tơhnal hloh, anăp nao bruă ngă hơdư̆ akô̆ phun ñu, pơsur tuh pơplai sui thun hăng pơhlôm bruă sĭ blơi pơđĭ kyar djơ̆ rơ-oa hăng hmâo bôh tŭ yua kơ mơnuih ƀôn sang hăng bruă bơwih ƀong./.