Hơdôm hrơi akŏ thun phrâo 2026, amăng hrơi mông hyôk hyak mơak mơai čơkă bơyan phang bơyan bơnga Dap Kơdư, ơi Trịnh Văn Bình, 69 thun, Khua khul tơhan hơđăp plơi Đoàn Kết, să Ia Hiao, tơring čar Gia Lai, djă mut tah war sang ñu či brơi lŏn pơkra jơlan. Ơi Bình brơi thâo, pơpha brơi lŏn jing tơlơi pơgôp lăp djơ̆ biă mơ̆ng sang anŏ ñu hrŏm hăng neh met wa amăng plơi, či man pơdong plơi pla phrâo: “Tui hăng tơlơi pơtrun pok pơhai bruă man pơdong plơi pla phrâo, kâo lăng djơ̆ biă hăng tơlơi pơtrun mơ̆ng ping gah, pran jua ană plơi, anun jing sang anŏ gơmơi pơpha brơi lŏn či pơkra jơlan. Hăng pran jua pơmin kơ ană plơi, ană plơi yua kơ ta, bruă pok jơlan anai klă kơ neh met wa hăng sang anŏ gơmơi mơn. Nao rai mơak, bơwih ƀong hai klă mơn, plai ƀiă rơngiă prăk apah, pơhrui glăi hơmâo hmăi hloh, anun kah tơlơi hơdip neh met wa mơ̆ng đĭ”.

Să Ia Hiao, tơring čar Gia Lai hơmâo akŏ pơdong yua pơmut hrŏm 3 boh să anun lĕ Ia Peng, Črôh Pơnan hăng Ia Hiao, tơring glông Phú Thiện hơđăp. Pơsit jơlan nao rai yơh yom kiăng đĭ kyar bơwih ƀong amăng rơwang thun ngă bruă 2025-2030, Ping gah, gong gai să Ia Hiao pơƀut iâu pơthưr neh met wa pơpha brơi lŏn, tah ruh war, sang dŏ či pok prong ƀiă jơlan nao rai amăng plơi. Ơi Đỗ Văn Điền, 63 thun, dŏ pơ plơi Đoàn Kết, hok kơdok brơi thâo, hơmâo mơnuih ƀôn sang tŭ ư anun bruă pơpha lŏn pơkra jơlan jing tañ hloh, hmư̆ ư hyu djŏp mơn: “Abih bang mơnuih ƀôn sang tŭ ư ngă tui, anun jing mơak biă, hơmâo tơlơi anai lĕ yua hơmâo Ping gah, Kơnuk kơna, Gong gai să hăng ƀing khua thâo lăng mơn, anun jing pơ-ư pơ-ang biă yơh. Boh nik ñu yua ană plơi tŭ ư, ha pran jua pơmin hrŏm, ngă hrŏm, anun yơh mơ̆ng dưi hơmâo tơlơi klă hiam tui hăng anai”.

Kơnong kơ hơdôm blan đôč, mơ̆ng rơnuč thun 2025 truh ră anai, să Ia Hiao man giong laih 22 glông jơlan, iâu pơthưr 207 boh sang pơpha brơi rơbêh 38.000 met karê lŏn, rơbêh 6.200 met karê war sang, hrŏm hăng lu ring bruă pơkŏn dong, hăng prăk pơƀut ƀăt hĭ rơbêh 4,8 klai prăk. Lăp đing nao hloh, amăng bruă anun, ƀing khua, mơnuih ping gah yơh nao hlâo, ngă hlâo ană plơi kiăo tlôn. Ơi Siu Hiếu, Khua Jơnum min djŏp djuai ania mơnuih mơnam Việt Nam să Ia Hiao, mơnuih amăng ƀon Sô Ma Lơng A, brơi thâo, bruă pơpha lŏn hăng sang anŏ ñu blung a tơnap mơn, dŏ pơmin lăng mơn, yua dah lŏn ƀơi lan prang ñu pơmă. Samơ̆, thâo hluh bruă ngă mơ̆ng sa čô khua, anun ñu khŏm ngă hlâo pơpha brơi, anun kah ană plơi mơ̆ng ƀuh hăng hla tui: “Kâo lăng tơlơi pơtrun anai ñu djơ̆, pô kâo ăt ngă tui mơn bruă pơpha lŏn pơkra jơlan kiăng ană plơi ƀuh ñu ngă tui. Năng blung tơnap mơn či anur ană bơnai, yua dah lŏn ƀơi jơlan prong lĕ ñu pơmă, năng ai 200klăk/sa met, samơ̆ ƀuh tơlơi pơtrun anai ñu djơ̆, hăng kâo hai ngă khua jơnum min djŏp djuai ania mơnuih mơnam să, juăt hyu pơtô lăi, jak iâu neh met wa jing ta khŏm ngă hlâo kiăng hơdôm boh sang pơkŏn ñu hla tui. Tơdơi kơ pok prong jơlan kâo lăng hiam, rơhaih, hơmâo glông bơnư̆ bruăi ia dong, anun jing sang anŏ gơmơi hơmâo pran biă”.

Sit biă ñu brơi ƀuh, kiăng pơtrut pơkra jơlan nao rai, prăk mơ̆ng să Ia Hiao hai aset mơn ƀu djŏp či tla prăk lŏn ôh. Ƀơi anăp tơlơi lông tơnap anun, Ping gah să ba bruă đĭ kyar jơlan nao rai mut amăng Tơlơi pơtrun, laih dong ruah mă hơdră ngă bruă râu mơdưh, pơđĭ pran jua mơnuih ƀôn sang, mă tơlơi tŭ ư mơ̆ng mơnuih ƀôn sang yơh akŏ phun. Pơsit brơi rơđah hloh anun lĕ jơlan nao rai kah hăng Phú Yên 1, Phú Yên 2, Đoàn Kết, Sô Ma Lơng mơ̆ng jơlan prong aka ƀu truh 3met, ră anai pok prong jing 8 met. Amăng anun, prăk mơ̆ng Kơnuk kơna hăng prăk djru pơkŏn djơ̆ tơlơi phiăn truh 90%, mơnuih ƀôn sang pơčruh hơmâo 10% hăng abih bang lŏn hơmâo pơpha brơi čuk pơkra jơlan. Ơi Trần Văn Phương, Khua ping gah să, Khua Jơnum min mơnuih ƀôn sang să Ia Hiao lăi: “Pơsit bruă jao bruă lĕ khŏm rơđah rơđông, pơtrut tui klă tơlơi gơgrong bruă ba jơlan hlâo mơ̆ng ƀing khua, mơnuih ping gah. Nao hrŏm hăng jao bruă, ƀing gơmơi ruah mă hơdôm boh sang anŏ mut ping gah ngă hlâo. Plơi blung a ngă lĕ Sô Ma Lơng A, tơdơi kơ anun lĕ plơi pơkŏn, lu biă plơi pla dưi ngă, phrâo anai, gơmơi hơmâo pơkra 22 glông jơlan mơ̆ng prăk djru lu anih yơh pơƀut ƀăt hĭ, hăng mă prăk djru mơ̆ng pơkŏn dong či pơkra brơi jơlan neh met wa amăng să”.

Hơdôm glông jơlan phrâo ƀu kơnong pok prong jơlan nao rai đôč ôh, ăt pok rai jơlan đĭ kyar phrâo kơ plơi pla Gia Lai. Să Ia Hiao akŏ thun phrâo jing mơak hloh mơn yua hơmâo jơlan hiam, agaih, ană plơi đăo kơ gong gai jai hrơi kjăp hloh. Mơ̆ng tơlơi gum pơgôp mơ̆ng Ping gah hăng mơnuih ƀôn sang, kar hăng hơmâo sa jua angin phrâo bluh nao hiam biă, bang hyu djŏp, kjăp phik, kơtang biă, čih tŏ tui tơlơi ră ruai hiam kơ plơi pla phrâo ƀơi lŏn dap kơdư Gia Lai./.