Kơnôl 18/4/1976, khul nao sem lăng hlâo Gia Lâm nao pơƀuh ƀô̆ ƀơi Nam Ban. Giong anun, ƀing hlăk ai mơ̆ng Từ Liêm, Đông Anh, Thanh Trì, Ba Đình, Đống Đa hăng lu boh tơring mơ̆ng Hà Nội kiăo tui tlôn. Kơnong amăng 2 thun đôč, rơbêh kơ 2.600 čô hlăk ai hơmâo čong jah rơbêh 1.900 ha lŏn, pok jơlan hơdôm rơtuh km, hrŏm hăng mơnuih ƀon sang pơ anai pơdong sang, ngă hmua pla pơjing, akŏ pơdong plơi phrâo.

Găn rơgao 50 thun akŏ pơdong hăng đĭ kyar, kual bơwih ƀong phrâo Hà Nội ƀơi Lâm Đồng pơjing rai kual ngă kơphê, pla phun kơbuă rông hlăt, ngă hmua mă yua boh thâo phrâo; jơlan nao rai, sang hră, sang ia jrao hơmâo man pơdong hiam, tơlơi hơdip mơnuih ƀon sang jai hrơi jơnap tui mơn. Anăn Lâm Hà, jing pơmut hrŏm Lâm Đồng hăng Hà Nội tơdơi kơ tơring glông hơmâo akŏ pơdong thun 1987, jing gru pơ ala kjăp khŏp mơ̆ng 2 boh tơring. Pơhiăp ƀơi mông ngă lơphet, ơi Hồ Văn Mười, Ding kơna git gai ping gah, Khua jơnum mơnuih ƀon sang tơring čar Lâm Đồng pơsit, hơdôm bruă dưi ngă amăng 50 thun rơgao jing anŏ hơmâo mơ̆ng pran jua gir kơtir ngă bruă, gum pơgôp mơ̆ng lu rơnuk:“Lăng glăi 50 thun, ƀing ta dưi pơsit, anai ƀu kơnong bruă čong jơnah jah glai akŏ pơdong plơi phrâo đôč ôh, ăt jing bruă pơjing rai tơlơi hơdip phrâo, hơmâo pran đăo kơnang laih anun bơbuă tui kơ tơlơi hơdip pơ anăp anai kơ djŏp rơnuk. Boh tŭ yua anai ƀu kơnong pơkă hăng ring bruă, jơlan nao rai, ƀudah kual ngă hmua phrâo đôč ôh, yom hloh lĕ amăng rim boh sang dŏ prong, kjăp, sang hră hơmâo lu čơđai hrăm, rim boh sang anŏ hơmâo tơlơi hơdip hơđong hloh”.

Ngă lơphet 50 thun kual bơwih ƀong phrâo Hà Nội ƀơi lŏn Lâm Đồng, lu bruă gru grua bơkjăp drơi jăn hơmâo pơphun. Pơ anai, bruă pơdong rơnưh, hơnum, pơdă prưng hră pơ-ar đưm, laih anun ba pơƀuh gơnam OCOP hơmâo pơphun ƀơi Lâm Hà, pơƀuh glăi thun blan akŏ pơjing kual bơwih ƀong phrâo laih anun pơtruh dua gru grua mơ̆ng 2 boh tơring.

Ƀrô tal anai, tơring čar Lâm Đồng hăng ƀon prong Hà Nội kĭ hră hơdor pioh ngă hrŏm abih bang bruă. Jơnum min djŏp djuai ania mơnuih mơnam Việt Nam ƀon prong Hà Nội brơi kơƀang djru rơbêh 1,3 klai či man pơdong 22 boh sang Gum pơgôp kơ hơdôm boh sang anŏ rin. Tơring čar Lâm Đồng ăt bơni kơ khul grup, mơnuih mơnam hăng sang anŏ hơmâo lu tơlơi pơgôp prong amăng bruă akŏ pơjing, đĭ kyar kual bơwih ƀong phrâo.

Ha mơkrah rơnuk thun hlâo, mơnuih mơ̆ng Hà Nội djă ba pran hlăk ai kơtang, kơtưn ngă bruă pơ kual lŏn dap kơdư Lâm Đồng, mut nao čong jah glai, bơwih ƀong. Hrơi anai, djŏp rơnuk tŏ tui glăk pơtrut tui anŏ hơmâo anun hăng tơlơi rơgơi, boh thâo phrâo hăng pran jua pơplih phrâo mơn./.