Khua dêh čar ơi Lê Minh Hưng lăi pơtong, boh yom phun amăng bruă anai, dưi pơphun tơdơi kơ pơsit bruă pơđĭ tui ngă hrŏm dua bơnah dlông hloh. Khua dêh čar brơi thâo, Ba Lan ră anai bơnah ngă hrŏm sĭ mơdrô prong hloh mơ̆ng Việt Nam ƀơi kual Ngŏ Tong krah Mi kô̆. Hăng anŏ gêh găl kơtang amăng bruă kơsem min boh thâo ia rơgơi, pơkra ia jrao, pơgang lơ̆n ia, apui yua mơ̆ng Ba Lan ngă hrŏm hơmâo 18 mơta hră pơkôl pơkă sĭ mơdrô rơngai FTA hăng anih anom sĭ mơdrô beč bal hmar hloh mơ̆ng Việt Nam, tơhnal pơkă pơđĭ rơnoh prăk pơhrui glăi sĭ mơdrô truh 6 klai USD sit mơ̆n dưi ngă djop.

Pơtrut pơsur anom bruă mơdrô dua bơnah ngă hrŏm sui thun, pơdjru nao rai boh thâo ia rơgơi mơtah mơda, ngă gêh găl brơi djop sang bruă mơdrô Việt Nam ngă hrŏm tong ten hloh amăng bruă sĭ mơdrô amăng rŏng lơ̆n tơnah, khua dêh čar lăi pơtong, kơnuk kơna ăt ngă hrŏ, djru brơi djop sang bruă mơdrô mơ̆ng Ba Lan rai tuh pơ alin bơwih ƀong huă ƀơi Việt Nam, kiăng dŏ glăi sĭ mơdrô hơđong sui thun. Gah kơ ñu, Khua dêh čar Ba Lan, ơi Donald Tusk lăng yom kơnuih anăn păn dêh čar Việt Nam amăng tơlơi bơwih ƀong huă beč bal hloh ƀơi kual ASIA. Khua dêh čar Ba Lan rơkâo ngă hrŏm gah bruă tuh tia pơkra ming gah ia jrao hăng pơkra rai ia jrao, pơkra ming gơnam điện tử pơkĕ hăng apui lơtrik, kơsem min hrŏm pơkra êkrang pơyiong đĭ amăng adai rơngit lăng sŭ boh lơ̆n hăng pơkra ming gơnam hơdjă rơgoh. Ñu brơi thâo, dêh čar Ba Lan amra pok bah amăng brơi kơ ƀing ngă bruă mơdrô hăng gơnam tam mơ̆ng Việt nam dưi mut nao truh pơ anih anom sĭ mơdrô prong khul pơlir hơbit Mi kô̆ (EU).