Amăng ha hrơi blan 10, Tơhan blah ngă sông kơtang Phan Nhạn, mơ̆ng Nha Trang pơwơ̆t glăi pơ tơdru ia Vũng Rô, să Hòa Xuân, tơring čar Dak Lăk. 95 thun laih, tơkai ƀu anăm rơbat hyu, amăng tơngia ƀu thâo hmư̆ đơi dong tah, samơ̆ akŏ dlô mơ̆ng pô apăn akŏ gư̆ tut măi ƀat tô đưm adih ăt dŏ hơdor đôč. Ñu hơdor kơ thun blan mơgăt ƀat tô ƀơi jơlan juăt nao rai hing ang 65 thun hlâo adih: “Tal blung a lĕ ơi Phạm Hùng hăng ơi Phạm Văn Đồng nao lăi pơhmư̆ hăng ƀing gơmơi tui anai: Mơnuih ƀon sang hăng tơhan blah rơngai lŏn ia glăk tơguan abih bang ƀing gih. Gơmơi nao abih 7 hrơi 8 mlăm kah mơ̆ng truh pơ Cà Mau”.

Amăng rơnuk blan ayăt Mi pơklaih rơgai lŏn ia, Tơhan blah ngă sông kơtang Phan Nhạn, pô apăn akŏ gư̆ tut măi ƀat tô Không Số, hơmâo 15 wơ̆t nao rai pơgiăng phao kơtuang pơ anih blah ngă kual Dơnung. Ră anai dŏ hơdip pơ phường Nam Nha Trang, tơring čar Khánh Hòa, 4 bơyan hmư̆ jua ia rơsĭ, ơi Phan Nhạn jai hơdor hloh kơ thun blan đĭ ƀat tô pơ ơi ia rơsĭ, djơ̆ anŏ ñu găn nao truh pơ ia rơsĭ dêh čar arăng, giong anun mut glăi amăng ia rơsĭ čar ta, jưh pơ trun kom păn. Ăt hơmâo mơn djơ̆ anŏ ñu khŏm čuh glŏm hĭ ƀat tô, laih anun blah hăng ƀing ayăt či pơhơgŏm brơi jơlan nao rai hŭi kơ ƀing ayăt thâo: “Ƀat tô gơmơi pơgiăng aset biă ñu lĕ 1,5 tơn mơnong pơtuh. Ngă pơtuh hăng hrĕ apui. Kâo yơh pô pơkă mông, dưm truă anih čuh apui, truh mông pơkă lĕ pơđar ƀing gŏp brơi pơtuh hlao ƀat tô. Lơ̆m anun rơngôt biă, samơ̆ hiưm mơ̆ng ngă dong, khŏm phă prai ƀat tô yơh”.

Tơdah pô krăo lăng măi mok amăng ƀat tô kar hăng hơtai boh ƀat tô, jing pô mơgăt rơdêh jing bơngăt jua mơ̆ng ƀat tô. Rim thun, truh hrơi ngă lơphet hơdor kơ jơlan Hồ Chí Minh ƀơi ia rơsĭ, hơdor kơ tơdrun kom păn Vũng Rô, Tơhan sông kơtang mơnuih ƀon sang Hồ Đắc Thạnh, pô mơgăt ƀat tô Không Số leng kơ nao čuă tơdrun ia. Sit pơ anai yơh, ñu hrŏm hăng ƀing gŏp, khin hơtai găn rơgao anih ayăt guang dar, ba 3 tal ƀat tô dưi mut nao pơ tơdrun ia rơnuk rơnua, pơgiăng ba giăm 200 tơn phao kơtuang mut amăng Vũng Rô, brơi kơ anih blah ngă Phú Yên hăng hơdôm boh tơring čar Kual 5. Tơhan sông kơtang Hồ Đắc Thạnh ră ruai glăi lơ̆m ñu bưp ayăt amăng tal blung a mut nao pơ tơdrun kom păn Vũng Rô thun 1964: “Amăng tal anun, lơ̆m ƀat tô mut nao pơ ia rơsĭ, mơ̆ng Quảng Nam, Đà Nẵng truh pơ Bình Định jing rơdêh por krăp lăng sŭ mơ̆ng ƀing ayăt por pơdar nao pơdar rai hăng ngŏ ƀat tô kâo mơgăt. Tơdơi kơ anun ñu por nao pơ hang ia, giong anun dua boh ƀat tô ƀing ayăt tơbiă rai hmao tlôn dong tah, nao giăm ƀat tô 41 mơ̆ng ƀing gơmơi, giong anun ƀing ñu đuăi mring hăng ƀing gơmơi mơtăm yơh. Abih bang phao amăng ƀat tô gleng gah ƀing gơmơi mơtăm yơh. Lơ̆m anun hŭi biă mă. Tơdah ayăt ƀuh ƀat tô gơmơi pơgiăng phao kơtuang mơ̆ng Kơdư či ba nao gah Dơnung lĕ gơñu blah mơtăm yơh. Kâo hơđong pran jua pơgang mơn. Tơdơi kơ 1 mông gơñu krăp lăng ƀu ƀuh anŏ hơget ôh, anun kah gơñu mơ̆ng đuăi. Lơ̆m anun bơngăt ƀơi hơjung ƀuk đôč yơh, djai hơdip ƀu thâo dong tah”.

Bơ hăng ơi Hoàng Gia Hiếu, mơnuih tơkeng rai hăng hơdip truh kơ prong pơ kual ia rơsĭ Hải Phòng, rim bơyan ngă lơphet hơdor kơ jơlan Hồ Chí Minh ƀơi ia rơsĭ, ơi Hiếu hơdor kơ Tơdrun ia K15 Hải Phòng, či tŭi ñang kơ ƀing gŏp ñu. Ñu jing mơnuih nao rai pơ ia rơsĭ rơgơi biă, juăt luai ia sem lăng jơlan hlâo či brơi ƀat tô mut nao rai. Rup ƀing gŏp ñu djai pơsăn drơi kơ lŏn ia ăt dŏ kơđŏm na nao amăng akŏ dlô ñu: “Lơ̆m anun gơmơi či ba trun gơnam mơ̆ng ƀat tô, tơdơi kơ anun năng ai 4 mông mơguah, khua git gai adơi ayong gơmơi trun hĭ mơ̆ng ƀat tô či phă prai hĭ. Ƀat tô pơtuh đuh kơtang kơtit, kâo hăng ayong Tự rơka aset,  ayong Thạnh huăi hơget ôh. Bơ Ayong Đọc hăng ayong Nhợ djai”.

Amăng 14 thun pok jơlan Hồ Chí Minh ia rơsĭ, hơmâo 94 čô tơhan djai pơsăn drơi kơ lŏn ia. Rim thun, amăng hrơi gru grua jơlan Hồ Chí Minh ƀơi ia rơsĭ kơnôl 23/10, hăng hơdôm hrơi ngă lơphet, djŏp tơhan hơđăp ƀat tô Không Số glăi čuă rôk tui hang ia rơsĭ tŭi ñang kơ ƀing gŏp ñu. Hơdôm pŏ bơnga hơmâo plĕ trun ƀơi ia rơsĭ. Tơlơi djai rơngiă mơ̆ng adơi ayong anong wa pơjing rai gru hing ang amăng rơnuk blah ayăt Mi, kiăng plơi pla, lŏn ia ta hơmâo hrơi mơak mơai, pơklaih rơngai djuai ania./