Klah čun glăi mông jơnum, Khua ping gah, Khua mir sir ơi Tô Lâm pơtŏng glăi thun blan rơgao, bruă pơtom hiăp hăng mut hrŏm jar kmar hơmâo lu boh tŭ yua, pơphô bruă klă tui, ngă hrŏm ngă bruă tŭ yua, djru bong kjăp tơlơi rơngai, hơđong, pok prong ngă hrŏm laih dong hơmâo dong anŏ gêh găl či đĭ kyar lŏn ia. Pơtom hiăp ƀơi djŏp bruă mă, hơmâo pok pơhai ha amăng plĕ, bruă krăp lăng hơdôm hră hơmâo kĭ pơkôl ƀơ ƀrư̆ plih mơ̆ng jŭ yap anŏ ngă giong bruă hơdai sem lăng boh tŭ yua ba glăi, ngă rơđah tơlơi gơgrong bruă.

Khua ping gah, Khua mir sir rơkâo hơdôm Khul mă bruă pơtrut tui bruă lăi pơthâo, pơčrâo brơi, git gai ngă bruă đah mơ̆ng pơđĭ tui anŏ klă mơ̆ng bruă pơtom hiăp. Hơdôm anom bruă bơdjơ̆ nao kiăng pơƀut ngă hơdôm bruă akŏ phun amăng hơdôm blan dŏ glăi thun anai, pơđĭ tui bruă pơtom hiăp, pơjing hơdôm pok hră kĭ pơkôl anun jing kơčăo bruă, gơnam pơkra rai hăng hơmâo anih sĭ mơdrô sit nik, bơwih brơi klă tơlơi hơdip kơ mơnuih ƀon sang; prăp lui klă bruă mă pơ anăp, amăng anun hơmâo mông jơnum APEC 2027.