Ƀơi să Bảo Lâm 1, tơlơi mut hrŏm mơng mơnuih ƀôn sang glăk pơgôp pơsir hĭ sa amăng hơdôm tơlơi tơnap tap pơprong lơm pok pơhai man pơkra jơlan glông: pơhrui glăi lŏn mơnai. Lu sang anŏ glăk ruh hĭ pơga, hơdôm gơnam pơdong ƀơi anăp sang kiăng jao glăi anom bruă man pơkra. Đa hơmâo sang anŏ yua lu prăk kak sang anŏ pô kiăng pơkra ming, man pơkra glăi, samơ̆ ăt hok mơ-ak yua kơ ƀuh tơlơi dưi sui pơ anăp mơng hơdôm ring bruă anai ba glăi. Yă Cao Thị Nghệ, mơnuih ƀôn sang să Bảo Lâm 1 brơi thâo: “Mah rơngiă hơdôm rơtuh klăk prăk, kâo ăt hok mơ-ak mơn. Adơi ayong man pơkra jơlan ăt abih pran ngă bruă mơn, man pơkra tơhrơi mlăm, hơjan hlim ăt ngă bruă mơn”.

Tơlơi mut hrŏm mơng mơnuih ƀôn sang djru pơsir hĭ tơnap tap amăng pơhrui glăi lŏn mơnai, ngă gêh gal kiăng anom bruă man pơkra ba nao mơnuih mă bruă, măi mok hăng gơnam tam. Amăng hơdôm ară jơlan nao pơ đang hmua, bruă man pơkra tañ ăt yôm biă mă mơn lơm mơnuih ƀôn sang prap pĕ pơhrui kơphê. Ơi Lê Quang Tuấn, pô pơ ala anom bruă man pơkra brơi thâo: “Ƀing gơmơi pơkiăo nao mơnuih mă bruă, măi mok, gơnam yua, prap lui djop gơnam kiăng pơtrut tañ bruă man pơkra. Adơi ayong mă bruă tơhrơi kah hăng mlăm, gir run tañ pơgiong, kiăng tañ mă yua, djru brơi neh met wa gêh gal nao rai amăng bơyan hơjan hăng pơdŭ pơgiăng kơphê amăng bơyan pĕ pơhrui anai.”

Tơlơi gir run mă bruă tơhrơi mlăm mơng anom bruă man pơkra hrŏm hăng tơlơi mut hrom jao glăi lŏn mơng mơnuih ƀôn sang glăk pơgôp pơtrut tañ bruă man pơkra. Anai ăt lĕ hơdôm anŏ yôm lơm Lâm Đồng yak nao hrơi blan kiăng ngă tañ hloh bruă jao prăk tuh pơ alin man pơdong thun 2026.

Ơi Trần Đình Phước, kơ-iăng Khua Jơnum min mơnuih ƀon sang să Bảo Lâm 1 brơi thâo, tơlơi mut hrŏm mơng mơnuih ƀôn sang lĕ tơlơi yôm hloh kiăng pơsir hĭ tơnap tap amăng pơhrui glăi lŏn mơnai, pơtrut tañ bruă man pơkra hăng jao prăk tuh pơ alin man pơdong: “Kiăng hơmâo tơlơi mut hrŏm, ƀing gơmơi gum hrŏm hăng hơdôm anom bruă bơdjơ̆ nao, anom bruă črâo ba pơphun jơnum plơi pla, pơsur hơdôm boh sang anŏ ƀuăn ruh hĭ gơnam amăng lŏn sang, jao glăi lŏn. Đa hơmâo sang anŏ khŏm phă gah anăp sang, ruh pơga, samơ̆ neh met wa ăt hok mơ-ak kiăng jơlan tañ man pơkra, pơtrut tañ bruă jao prăk tuh pơ alin man pơkra”./.