Kơnôl 25/10, sem lăng bruă pơkra hơdôm ring bruă akŏ phun, laih anun bưp ƀing khua amăng tơring čar An Giang, Khua pơ ala mơnuih ƀon sang dêh čar ơi Trần Thanh Mẫn lăi dlăm pran jua “3 ƀu dưi ngă”: ƀu kơdun glăi ôh hrơi pơkă, ƀu ngă tơdu ôh anŏ klă, ƀu brơi hơmâo anŏ soh glăi. Hơdôm anom bruă kiăng ngă hrŏm kjăp, pơklaih brơi tañ hơdôm anŏ tơnap, pơsit rơđah tơlơi gơgrong mơ̆ng pô ngă khua, hăng pơtrut ngă tañ rim kơčăo bruă. Khua pơ ala mơnuih ƀon sang dêh čar ơi Trần Thanh Mẫn kiăng hơdôm rim bruă bơwih brơi mông Jơnum khua mua prong APEC 2027 ƀơi kual Phú Quốc, tơring čar An Giang khŏm ngă giong, kaih hloh lĕ kơnôl 30/6/2027.

Khua pơ ala mơnuih ƀon sang dêh čar kiăng pơhlom djŏp ring bruă hơmâo mă yua kơnar, lăng yom jơlan nao rai, apui lơtrik, ia yua, pơkra hĭ ia hơƀak jrak, wai lăng rơnuk rơnua, hăng pơgang pơhlom tơlơi truh apui ƀong. Bruă pơdong plơi phrâo khŏm ngă klă, pơhlom brơi mơnuih ƀon sang brơi lŏn tơnah pioh ngă ring bruă dưi hơmâo anih dŏ hơđong, ƀudah klă hloh kơ anih dŏ hơđăp. Bruă ngă djơ̆ hrơi pơkă, pơhlom klă, hăng tơlơi phiăn djru ngă truh kih mông Jơnum khua mua APEC 2027, laih dong pơƀuh rup Việt Nam hăng gơyut gơyâo jar kmar.