Ƀơi thôn 12, să Bảo Lâm 1, lu sang anŏ hơmâo gơgrong ruh hĭ pơga, hơdôm gơnam pơdong ƀơi anăp sang kiăng jao glăi lŏn kiăng man pơkra jơlan glông. Hơmâo lu sang anŏ khŏm ruh hĭ gơnam pơdong ƀơi anăp sang amăng kual lŏn pơprong, samơ̆ lơm hơmâo gong gai nao pơsur pran, pơblang brơi tơlơi dưi sui pơ anăp, neh met wa ăt tŭ ư, ngă gêh gal brơi anom bruă man pơkra ngă bruă. Ƀuh tơlơi mut hrŏm mơng neh met wa, ơi Võ Chí Nhân, Khua thôn 12, să Bảo Lâm 1 hok mơ-ak brơi thâo: “Neh met wa lêng kơ tŭ soh hăng hok mơ-ak lơm hmư̆ arăng lăi pơthâo amra pơkra ming jơlan anai. Lu sang anŏ hơmâo ruh hĭ gơnam pơdong ƀơi anăp sang kiăng anom bruă man pơkra pok pơhai ngă jơlan. Ƀing gơmơi čang rơmang tơdơi kơ jơlan anai pơgiong amra ngă gêh gal amăng bruă nao rai brơi neh met wa, ƀing čơđai nao sang hră ăt hruaih mơn.”

Mơng tơlơi mut hrŏm amăng bruă man pơkra jơlan glông brơi ƀuh, lơm gong gai gơgrong nao tơña mơnuih ƀôn sang, pơblang brơi rơđah tơlơi dưi hăng tơlơi glăm ba, hơdôm tơlơi gun amra dưi pơsir hĭ. Bruă ngă anun ăt glăk hơmâo hơdôm boh ƀon lan ƀơi tơring čar Lâm Đồng tŏ ngă tui amăng pơsir hĭ hơdôm bruă dŏ đôm glăi bơdjơ̆ nao tơlơi hơdip mơnuih ƀôn sang. Ƀơi să Bảo Lâm 3, lŏn mơnai lĕ sa amăng hơdôm bruă hơmâo lu tơlơi rơkâo pơsir hĭ. Amăng mông bưp mơnuih ƀôn sang ruah khua rơnuč blan 9, mơnuih ƀôn sang lăi nao hơdôm tơlơi gun kơ bruă ngă luk puk hră pơ-ar lŏn mơnai, ngă brơi hră mă yua lŏn mơnai, kang lŏn hăng nua duh lơm pơhrui glăi lŏn mơnai. Ƀơi anăp kơ tơlơi anai, gong gai să đing nao pơčlah hơdôm bruă, pơsit tong tơlơi glăm ba pơsir hĭ, anăp nao ngă plai ƀiă tơlơi bơngô̆t hăng tañ ƀiă pơsir hĭ bruă anai. Kơ bruă pơsir hĭ hơdôm bruă dŏ đôm glăi, ơi Vũ Minh Đoàn, kơ-iăng Khua Jơnum min mơnuih ƀon sang să Bảo Lâm 3 lăi pơtong: “Ƀing gơmơi glăk đing nao pơsir hĭ hơdôm bruă dŏ đôm glăi, sit biă ñu ngă hră pơ-ar kơ lŏn mơnai. Hơdôm bruă aka ƀu dưi ngă sui laih ăt glăk pel ĕp glăi, pơsir hĭ khut khăt, ngă gêh gal hloh brơi mơnuih ƀôn sang lơm pok pơhai hơbô̆ bruă gong gai ƀon lan 2 gưl.”

Ƀu djơ̆ kơnong hơdôm hră pơ-ar, hơdôm akŏ bruă tuh pơ alin sui thun ăt glăk ba tơbiă tơlơi rơkâo kiăng pơplih bruă pơsir hĭ. Ƀơi să Dă Huoai 3, akŏ bruă drai ia apui lơtrik Dă Huoai 2 hăng hơdôm tơlơi gun rơbêh 20 thun lĕ sa amăng hơdôm bruă tơnap tap hơmâo ƀon lan đing nao pơsir. Tơlơi ngă bơngô̆t hloh lĕ ngă pơmut hrŏm amăng duh prăk pơhrui glăi lŏn mơnai. Hluai tui 8 mông jơnum, pơlăi nao rai ƀơi anăp, gong gai să ƀơƀrư̆ pơsir hĭ hơdôm tơlơi rơkâo mơng mơnuih ƀôn sang, ngă gêh gal kơ bruă pơkă lăng, jŭ yap hăng ngă tui hơdôm bruă pơ anăp dong. Lăi nao hơdôm tơlơi pơplih amăng pơsir hĭ bruă anai, ơi Nguyễn Văn Trinh-Khua Jơnum min mơnuih ƀon sang să Dă Huoai 3 brơi thâo: “Tơdơi kơ 8 wŏt jơnum, ƀing gơmơi rơkâo djop anih anom kơđi čar nao pơtô pơblang hăng pơsir hĭ hơdôm tơlơi gun mơng mơnuih ƀôn sang. Truh ră anai, akŏ bruă anai hơmâo tơlơi bơtŭ ư hrŏm. Ƀon lan glăk gum hrŏm pok pơhai bruă pơkă lŏn, jŭ yap kiăng duh prăk pơhrui glăi lŏn, gir run kiăng akŏ bruă anai man pơkra amăng thun 2026.”

Hơdôm tơlơi pơplih ƀơi Bảo Lâm 1, Bảo Lâm 3 hăng Dă Huoai 3 lĕ hơdôm tơlơi pơƀuh brơi amăng tơlơi gir run pơsir hĭ tơnap tap, pok phư ngăn rơnoh pơđĭ kyar amăng tơring čar Lâm Đồng.

Tui hră lăi pơthâo tơlơi bơwih ƀong huă-mơnuih mơnam 9 blan thun 2026 brơi ƀuh, abih tih prăk tuh pơ alin ngă tui djop anih amăng tơring čar truh rơbêh 84.100 klai prăk, đĭ rơbêh 12% pơhmu tui tơđar. Đơ đam tơring čar hơmâo giăm 3.000 akŏ bruă tuh pơ alin glăk dưi ngă, abih tih prăk amra mă yua rơbêh 947.000 klai prăk. Samơ̆, hơdôm tơlơi gun kơ lŏn mơnai, pơhrui glăi lŏn, ngă hră pơ-ar tuh pơ alin hăng bruă man pơkra ăt glăk bơdjơ nao hơdôm akŏ bruă man pơkra.

Ƀơi anăp kơ tơlơi rơkâo pok phư hơdôm ngăn rơnoh pơđĭ kyar, Ding kơna Ping gah dêh čar, Khua git gai Ping gah tơring čar Lâm Đồng Y Thanh Hà Niê Kđăm ba tơbiă tơlơi rơkâo pơplih phrâo bruă git gai, lăng yôm tơlơi glăm ba hăng boh tŭ yua lơm ngă tui mơng djop anih anom kơđi čar: “Djop anih anom kơđi čar kiăng pơtrut kơtang mơng tơlơi git gai hơdai nao črâo ba pơđĭ kyar, mơng hơnong pơkă bruă mă hơdai nao boh tŭ yua sit nik. Đing nao pơsir hĭ hơdôm tơlơi gun pơđĭ kyar, pơtrut tañ bruă ngă tui hơdôm akŏ bruă akŏ phun, hơdôm akŏ bruă dŏ đôm glăi, ngă sui thun hăng hrưn đĭ tŭ yua amăng jao prăk tuh pơ alin man pơdong. Tŏ tui tơlơi glăm ba, pơhiăp nao hrŏm hăng ngă, kiăo tui bruă jao, pel ĕp na nao, pơtrut pơsur, hmao tlôn pơsir hĭ tơlơi tơnap tap, gun găn, gir run pơplih tong ten amăng hơdôm blan rơnuč thun 2026, pơgiong tañ hloh hơdôm hơnong pơkă hơmâo ba tơbiă.”

Mơng hơdôm bruă djru mơnuih mơnam truh hơdôm akŏ bruă dŏ đôm glăi sui thun, tơlơi pơplih ƀơi ƀon lan brơi ƀuh boh tŭ yua blung a amăng pok pơhai gong gai ƀon lan 2 gưl ƀơi Lâm Đồng. Kiăng hơdôm boh than anun dưi pok prong hăng tŏ ngă tui, tơlơi yôm hloh lĕ tŏ tui pơsir hĭ bruă tơl giong, pơjing tơlơi gir run jing boh than sit nik, ngă pơtrut kiăng Lâm Đồng pơđĭ kyar./.