Kơnôl rơnuč rơwang hrơi tơjuh, sang anŏ yă Rčom H’Kliơng, dŏ ƀơi ƀôn Rưng Ama Nin, să Ia Rƀol, tơring čar Gia Lai hơmâo mông pơtum jơngum sang anŏ, phung wang, kơnung djuai ƀơi čeh tơpai, gum mơak hrŏm yua kơ yă phrâo hơmâo Khul pơsur tơlơi hrăm hră dêh čar Việt Nam apah bơni hăng hră pơpŭ bơni hiam. Hơmâo mơnuih amăng sang anŏ pơ ala kơ abih bang sang anŏ nao jơnum hrŏm, ƀuh ƀô̆ mơta Kơnuk kơna pơpŭ bơni tơlơi hur har hrăm hră amăng dêh čar pơphun ƀơi Hà Nội, phrâo glăi pơ sang anŏ.

Ơi Nay Nhơn-hăn yă Rčom H’Kliơng, ngă nai pơtô glăi pơdơi abih thun bruă laih, lăi, mông jơnum ngui ngor ƀong mơñum sang anŏ anai, kiăng hơdor bơni kơ amĭ kơ yă hơmâo ƀă ƀem čem rông ană bă hrăm hră truh kih:

“Sang anŏ gơmơi hrơi anai, ngă tơlơi pơtum jơnum kiăng bơni kơ yă ñu hơmâo ƀă ƀem čem rông ba ană bă hrăm hră pơar, mah tơlơi tơnap tap kơƀah djop mơta, eng ƀu hơmâo, ao ƀu ƀuh, mơnong ƀong huă kơƀah, ƀong hơbơi pơtơi ăt brơi ană bă hrăm hră. Truh ră anih abih bang ƀing ană bă lêng hơmâo bruă, hơmâo sang anŏ tơlơi hơdip hơđong laih. Amĭ ama mơ̆ng đưm hlâo gir kơtir mă bruă, tơpư̆ ƀong rông rơmô kơbao, un mơnŭ, ăt pơgô̆ ƀing ană hrăm hră, ƀu brơi pơdơi ôh, anun ră anao hơmâo ngă bruă amăng kơnuk kơna, plơi pla djru ƀôn sang. Ană bă hmư̆ hiăp amĭ ama, ngă djơ̆ tơlơi phiăn jơlan hơdră mơ̆ng kơnuk kơna pơtrun”.

Yă H’Kliơng brơi thâo, ƀing ană bă ñu prô̆ tơdăm prăm dra ƀa tơsâo tơdơi kơ lơ̆n ia pơklaih rơngai. Tơlơi hơdip hlăk anun ƀơi kual lơ̆n mơnai glai klô Ia Rƀol, tơring čar Gia Lai tơnap tap biă mă. Djơ̆ thun blan, sang anŏ ƀu hơmâo asơi huă, kơnong ƀong kơtor hna, kơtor riă, ƀong hơbơi plum, ƀơi hrơi ư̆ kian soh ƀu hơmâo mơnong ƀong ôh. Thun blan tơnap tap djơh hăng anun, sang anŏ gơñu ăt gir čem rông ană bă khom nao sang hră, ƀong sa čơđeh tơlô̆ hơbơi ƀlang, hơbơi čên, kơtor hna; ƀơi anŏ tơlô̆ hơbơi pioh kơ pô ƀong samơ̆ ƀu eng ƀong ôh, brơi ană bă ƀong nao hrăm hră hơmâo pran jua ƀiă. Yă hơ̆k mơak pran jua, yua abih bang 9 čô ană bă, 5 čô đah kơmơi, 4 čô đah rơkơi lêng hrăm truh anih soh; hơmâo pô hrăm bruă nai ia jrao, pơjrao duăm ruă, hơmâo pô hrăm ngă nai pơtô, đơ đa ngă bruă amăng ling tơhan ƀudah sang bruă kơnuk kơna mơ̆ng gưl să truh pơ tơring čar.

 “Đưm hlâo kâo dŏ ung, hơmâo ană bă, tơkeng hơmâo 9 čô ană, kâo gir čem rông ƀing gơñu gir run hrăm hră truh prong. Tơnap tap biă mă, kâo dưi brơi gơñu hrăm hră; asơi huă tơnap tŭ mơ̆n, kâo ăt pơtrut gơñu nao hrăm hră mơ̆n. Kiăng gơñu hơmâo bruă mă, hơduah ĕp ƀong huă, hơmâo tơlơi hơdip kơ gơñu hăng tơkai tơngan gơñu pô. Kâo bơni kơ ƀing ană kâo gơñu gir mơ̆n, ră anai abih 9 čô ană hrăm truh soh, hơmâo bruă mă soh. Kâo tơ tă anai, 78 thun laih, kâo kiăng pơtă pơtăn kơ ƀôn lan adơi amai adơi ayong, gir kơtir tui djơh hăng kâo anai rông ană bă mơ̆ng anai pơ anăp adih, brơi mơak amăng ƀôn lan, amăng mơnuih mơnam”.

Ơi Nay Mun-Khua Khul pơsur hrăm hră să Ia Rƀôl, tơring čar Gia Lai, ăt hơ̆k mơak biă mă, lăp pơ-ư pơ-ang kơ sang anŏ yă Rčom H’Kliơng, kual lơ̆n gru grua hiam hor hrăm hră pơar. Ƀuh rơđah kah hăng sang anŏ ơi Ksor Chuel ƀơi ƀôn Rưng Ama Nhiu ăt dưi apah bơni anăn “sang anŏ cử nhân” kiăng lăi sang anŏ ƀing hrăm hră thâo rơgơi truh kih. Sang anŏ yă Rčom H’Kliơng ƀơi ƀôn Rưng Ama Nin phrâo hơmâo Khul pơsur hrăm hră Việt Nam jao hră apah bơni yua hơmâo boh tơhnal tŭ yua hiam klă amăng bruă hrăm hră tơl abih tơlơi hơdip. Mơ̆ng anun, kiăng djru hrŏm ngă bơngač tui gru grua hiam hor kơ tơlơi hrăm hră amăng plơi pla.

“Yă Rčom H’Kliơng, arăng iâu yă H’Juy hơmâo 9 čô anăn lêng kơ hrăm hră truh kih soh. Ră anai, ƀing ană bă ñu hrăm giong glăi mă bruă amăng kơnuk kơna, djru ba plơi pla mơnuih mơnam. Kiăng lu sang anŏ ană plơi pla lăng tui, hrăm tui gru sang anŏ yă H’Juy anai rông ba ană bă hrăm hră pơar truh kih, hơmâo bruă mă. Laih dơ̆ng, iâu pơthưr abih bang pơtrut pơsur ană bă gir hrăm hră hrup sang anŏ bơn anai, tơdơi adih hơmâo bruă mă djru ană plơi pla, djru ba bruă čar”.

Sang anŏ yă Rčom H’Kliơng ƀong mơñum hơ̆k mơak yua Khul pơsur bruă hrăm hră pơar Việt Nam apah hră pơpŭ bơni, kiăng pơdah rai pran jua thâo hơdor bơni kơ amĭ, kơ yă gir run kret kruai ƀă ƀem čem rông ană bă brơi hrăm hră pơar, mah sang anŏ dŏ lu tơlơi tơnap tap. Anun lĕ sa tơlơi hiam, pran jua gir run hur har hrăm hră dưi djă pioh mơ̆ng amĭ ama truh kơ ană bă hăng djru ngă bơngač tui bruă hiam, rơnoh tơlơi hơdip amăng plơi pla hơmâo mơnuih triăng hrăm hră, thâo rơgơi djru plơi pla lơn ia.