Hơdôm hră pơ-ar hơmâo kah phara kiăo tui hơnong pơkă mă yua hlâo adih hăng ră anai či pơkra brơi lăp djơ̆. Hăng lŏn tơnah djơ̆ tui hơnong pơkă čuk pơkra mă yua, mơnuih ƀon sang ăt ngă hră kiăo tui tơlơi dưi. Bơ hră yua lŏn hơmâo brơi ƀu djơ̆ ôh hăng bruă pơkă hơnong mă yua amra sem lăng lui hĭ, brơi glăi phrâo laih anun tla prăk yua lŏn tui hăng tơlơi pơkă. Hăng lŏn tơnah hơmâo jao glăi laih, hơdră pơsir jing anăp nao pơhlom brơi tơlơi gêh găl kơ mơnuih ƀon sang; tơdah ngă rơngiă, huač ngăn drăp Kơnuk kơna yua tơlơi soh mơ̆ng ƀing khua, mơnuih apăn bruă lĕ kiăng duh prăk kăk. Bơ lŏn ƀu lăp djơ̆ dong tah hăng bruă pơkă hơnong čuk pơkra amra pơsir bruă tui tơlơi pơtrun, laih dong sem lăng ba glăi prăk kơ mơnuih ƀon sang nô̆p hlâo kơ anun.

Khua ping gah tơring čar Dak Lăk ơi Lương Nguyễn Minh Triết kiăng lăng glăi, pơsir brơi đut hlao djŏp hră pơ-ar hlâo kơ kơnôl 15/12, pơhlom brơi tơlơi dưi kơ mơnuih ƀon sang hăng klă hiam kơ Kơnuk kơna.