Amăng tơlơi lăp hơdor mơ̆ng lu tơhan hơđăp gum blah ayăt hơkrŭ lŏn ia thun 1975 ăt dŏ hơnong đôč. Hăng ƀing ñu, rim anih, rim kual lŏn, rim glông jơlan ƀơi lŏn Dap Kơdư anai leng ƀuh kru blah ngă kơtang kơtit hăng tơlơi djai pơsăn drơi mơ̆ng adơi ayong ngă tơhan. Trung tướng Đoàn Sinh Hưởng, Tơhan blah ngă sông kơtang, Khua git gai hơđăp Tơhan kual 4 - lơ̆m anun lĕ khua grup tơhan rơdêh sar mơ̆ng Trung đoàn 273, Tơhan kual 3, nao blah rơngai, mă glăi Buôn Ma Thuột - ăt dŏ hơdor na nao đôč gru lŏn ia akŏ phun anun: “Ƀơi kual lŏn anai hơmâo lu laih mơnuih djai, anun kah mơ̆ng dưi blah rơngai. Pơklaih rơngai Buôn Ma Thuột jing tơlơi kiăng akŏ phun mơ̆ng Bruă tơgŭ blah laih anun sit blah rơngai Buôn Ma Thuột yơh pơtrut pơsur blah dưi tal pơkŏn dong. Truh ră anai, Buôn Ma Thuột, Dak Lăk pơplih laih, hiam tui laih, kâo lăng mơak, hơmâo pran biă, samơ̆ ăt hơdor mơn kơ ƀing gŏp gơmơi, hơdor glăi adơi ayong djai pơsăn drơi kơ lŏn ia, yua kơ kual lŏn anai”.

Mơ̆ng tơlơi blah dưi, pơklaih rơngai plơi pla lơ̆m anun, jing ngă kual Dơnung pơplih tañ mơn, pơtrut bruă blah rơngai bơyan phang thun 1975. Tui hăng ƀing apăn bruă blah ngă, Pơklaih rơngai Dap Kơdư ƀu kơnong jing tơlơi dưi prong gah ling tơhan đôč ôh, ăt pioh glăi anŏ yom hơdor lui kơ tơlơi rơgơi git gai blah ayăt hăng pơphun bruă blah ngă. Kơ-iăng nai prin tha, nai tha prin Hoàng Xuân Nhiên, Sang hră hrăm bruă ling tơhan pơgang lŏn ia, mơnuih kơhnăk bruă blah ngă Việt Nam lăi, sa amăng hơdôm anŏ hmư̆ hing phara mơ̆ng bruă Blah rơngai Dap Kơdư lĕ thâo leč, lăi lan anai, samơ̆ ngă lan adih, kiăng ƀing ayăt ƀu ăng rơmăng, giong anun ta pơƀut blah pơđam puih kơđông ƀing ñu mơtăm: “Amăng tơlơi blah ngă Blah rơngai Dap Kơdư lĕ bruă ta thâo leč yơh jing tơlơi lăp djơ̆ hloh, anai jing tơlơi ta čih pioh lui amăng bruă pơgang lŏn ia rơnuk phrâo. Amăng thun blan kjăp tui bruă blah ngă, git gai tơhan mơ̆ng Việt Nam ta khŏm sem lăng na nao, pơtrut tui hloh anŏ yom mơ̆ng ơi yă anong wa ta đưm hơmâo ngă, anun yơh ƀing ta mơ̆ng hơmâo tơlơi blah dưi hmư̆ ư kơtang hloh. Laih anun bong brơi lŏn ia ta hơdip na nao, dŏ na nao, pơgang lŏn ia ta tañ, mơ̆ng ataih mơtăm”.

Rơbêh ha mơkrah rơnuk thun tơdơi kơ hrơi blah rơngai hing ang anun, Dap Kơdư hơmâo pơplih lu laih. Hơdôm kual lŏn hlâo adih lĕ anih blah ngă kơtang kơtit, ră anai jing anih tơjŭ pla prong biă mă, lu glông jơlan hơmâo pok prong, plơi prong hơmâo lu tui mơn, tơlơi hơdip neh wa djŏp djuai ania jai hrơi đĭ đăi. Hăng ƀing adơi ayong ngă tơhan đưm, tơlơi pơplih pơ kual lŏn dap kơdư pơsit brơi anŏ yom mơ̆ng tơlơi sông kơtang, djai brŭ amăng rơnuk blah wang.

Đại tá Nguyễn Đức Tính, Khua pơhiăp nao rai Tiểu đoàn 401 Dak Lăk - anih hlâo adih gơgrong blah pơgăn ayăt ruk đuăi mơ̆ng Dak Lăk nao pơ Lâm Đồng amăng tal Bah rơngai Dap Kơdư- ñu lăi: “Tơdơi kơ pơklaih rơngai jing gơmơi hok mơak biă mă, truh mông anai tơdah pơhmu hăng hlâo adih, ñu phara biă mă. Čang rơmang lŏn ia ta đĭ kyar tui Tơlơi pơtrun Jơnum tal 14 mơ̆ng Ping gah, jing ƀuh Ping gah hăng Kơnuk kơna gir đĭ hơmâo 2 mrô mơ̆ng thun 2026 laih anun prăp lui kơ mông ruah Khua pơ ala mơnuih ƀôn sang dêh čar tal 16 hăng Khua mua pơ ala mơnuih ƀôn sang djŏp gưl, jing ta đăo kơnang lŏn ia ta amra đĭ kyar, tơlơi hơdip neh met wa ta jơnap mơtăm yơh”.

Ƀu kơng jing tơlơi pơư pơang mơ̆ng ƀing adơi ayong ngă tơhan đưm ôh, Blah rơngai Dap Kơdư ăt jing pơtrut pơsur pran jua kơ rơnuk anai. Amai Vũ Mai Hương, hră gưl prong Luật ƀơi Sang hră Đại học Luật Hà Nội - Anih hrăm pơdong ƀơi Dak Lăk brơi thâo, hơdôm tơlơi ră ruai ƀơi anih blah ngă đưm djru brơi rơnuk hlăk ai thâo hluh hloh kơ anŏ yom mơ̆ng tơlơi rơngai, bruă ƀing ta kiăng ngă hăng plơi pla, lŏn ia: “Mơ̆ng hơdôm tơlơi hrăm hăng tơlơi ră ruai kơ Blah rơngai Dap Kơdư thun 1975, gơmơi jing rơnuk hlăk ai thâo hluh dăm hloh kơ tơlơi djai rơngiă mơ̆ng ơi yă anong wa đưm adih. Tơlơi anun djru gơmơi pơpŭ hloh kơ anŏ yom mơ̆ng tơlơi rơngai rơnuk anai, ăt thâo rơđah hloh bruă ƀing ta kiăng ngă djru akŏ pơdong, đĭ kyar lŏn ia”.

51 thun rơgao, pran jua mơ̆ng Blah rơngai Dap Kơdư ăt bang hyu hmư̆ hing biă. Mơ̆ng anih blah ngă đưm truh kơ thun blan đĭ kyar hrơi anai, kual lŏn dap kơdư ăt glăk čih tŏ tui tơlơi hơdip phrâo hăng pran jưh hrưn đĭ, hăng pran jua, tơlơi đăo kơnang kơ thun blan pơ anăp anao đĭ kyar kjăp phik hloh mơ̆ng lŏn ia.