Olympic Tin học kual ASIA Thái Bình Dương thun 2023 dưi pơphun tui hơdră pơplông lăng nao rai mơng ataih hăng 1471 čô čơđai gah 36 bôh dêh čar hăng kual lŏn gum hrom (amăng anun hmâo 3 bôh dêh čar lĕ Canada, Mexico, Brazil dưi jak iâu gum hrom samơ̆ ƀu hmâo ruah apah pri); Khač lĕ dêh čar akô̆ pơphun bruă pơplông. Grŭp pơplông dêh čar Việt Nam hmâo 15 čô čơđai rơkâo nao pơplông, pơplông lăng nao rai mơng ataih ƀơi Sang hră đại học Công nghệ, Đại học Quốc Gia Hà Nội lơ 20/5/2023.

Tui tơlơi pơkă mơng Grŭp pơphun bruă pơplông Olympic Tin học kual ASIA Thái Bình Dương, Việt Nam dưi ruah 6 čô čơđai sang hră hmâo mă puang dlông hloh gum hrom pơplông. Tui bôh tơhnal mơng Grŭp pơphun bruă pơplông, wot 6 čô čơđai gum hrom pơplông mơng Việt Nam leng kơ hmâo mă miđai, hmâo 4 miđai ia prăk hăng 2 miđai ia kông. Tui hăng hơdră dưm dăp miđai, Việt Nam dŏng 9. Bôh tơhnal anai hmâo pơtŏng sit bruă kơjăp pơtô pơhrăm hăng pơsit jơlan gah nao djơ̆ amăng bruă thâo, ruah mă, pơhrăm brơi dong čơđai sang hră rơgơi mơng Ding jum pơtô pơhrăm. Hrom hăng anun pơdah tơlơi gir run mơng čơđai sang hră, nai pơtô čơđai, sang hră hăng mơng gơnong bruă pơtô pơhrăm amăng pơtô klă, hrăm klă./.