Sui mơ̆ng anai 81 thun, mơ̆ng hrơi ngă hơkrŭ blan Čơpăn, pran jua ngă hơkrŭ hur har, hơdôm klăk čô mơnuih Việt Nam tơgŭ hơkrŭ sua glăi gong gai. Ƀu hơmâo sui ôh, gong gai ƀơi lu tơring hơmâo mơnuih ƀôn sang ta mă glăi. Kơnôl 19 blan 8 thun 1945, tơgŭ blah sua glăi gong gai ƀơi Hà Nội truh kih. Bruă anai pơtrut pơsur kơtang hloh kơ bruă Tơgŭ hơkrŭ amăng đơ đam čar ta.

Mơ̆ng Hà Nội, bruă ngă hơkrŭ bang hyu tañ biă mă. Huế sua glăi gong gai kơnôl 23 blan 8. Sài Gòn hăng lu boh tơring gah Dơnung mă glăi gong gai kơnôl 25 blan 8. Abih bang djuai ania anăp nao sa mơta bruă: pơđut hlao anŏ kơtư̆ juă mơ̆ng ƀing ayăt roh, mơ̆ng kơnuk kơna pơtao pơtung, mă glăi tơlơi dưi ngă pô mơ̆ng lŏn ia.

Bruă tơgŭ hơkrŭ blan čơpăn thun 1945 jing sa gru kơđŏm pơplih prong biă mă. Mơ̆ng sa djuai ania rơngiă lŏn ia, mơnuih ƀôn sang Việt Nam jing pô wai lăng lŏn ia, gơgrong mă pô. Ngă hơkrŭ Blan Čơpăn pok rai rơnuk phrâo - rơnuk rơngai djuai ania. Samơ̆ bruă truh kih mơ̆ng Ngă hơkrŭ blan čơpăn jing bruă blung a mơn. Sa Kơnuk kơna rơngai kiăng hơmâo lăi pơthâo ƀơi anăp abih bang mơnuih ƀôn sang hăng ƀơi anăp djŏp čar. Laih anun kơnôl 2 blan 9 thun 1945 jing hrơi mông hing ang.

Ƀơi tơdron lăk Ba Đình, hơmâo rơtuh rơbâo mơnuih hăng hla gru mriah pơtŭ kơñĭ hyơ hyơr, por đơhet amăng angin, Khua mir sir Hồ Chí Minh pơ ala kơ Kơnuk kơna jăng jai pơđok Hră pôr pơthâo Tơlơi rơngai. Hơdôm tơlơi pơhiăp anun ƀu kơnong jing tơlơi pơthâo hăng rŏng lŏn tơnah kơ bruă akŏ pơdong sa Kơnuk kơna Việt Nam rơngai mơai pô. Anun ăt jing tơlơi pơsit kơ tơlơi dưi hơdip, rơngai pô, dưi ngă pô mơ̆ng sa djuai ania. Amăng Hră pôr pơthâo rơngai, Khua mir sir Hồ Chí Minh pơsit: “Kơnuk kơna Việt Nam dưi tŭ mă tơlơi rơngai, tui hluai pô” laih anun abih bang djuai ania Việt Nam khut djă ba abih pran jua, khul grup, tơlơi hơdip hăng dram gơnam či bong kjăp tơlơi rơngai anun./.