100 boh sang dŏ anun jing sang lir hơbitbruă jao brơi dŏ hrŏm kơđap sit hơmâo tơlơi truh ia ling dăo ngă ƀơi 27 boh să, phường, rơnoh prăk tuh pơ alin rơbêh 170 klai mơ̆ng ngăn drap kơnuk kơna tơring čar Dak Lak. Kơčăo bruă anai man pơdong mơ̆ng kơnôl 27/6/2026. Hơdôm ring bruă man pơdong sang ngă dua tal, hơmâo 3 mơta hơbô̆ sang pơdong djơ̆ găl hăng anih pơdong sang gru grua plơi, đơ đam sang pơkă dưm boh ƀiă 300 m2 sa boh sang. Truh ră anai, abih bang ring bruă anun ngă giong laih hăng hlăk jao glăi mă yua.

Nao jơnum hrŏm mă yua sang phrâo anun, ơi Đặng Kim Hùng, plơi Ân Niên, brơi thâo, hơmâo sang kơđap hŭi ia ling dăo, djru mơnuih ƀôn sang prăp lui hlâo bĕ tơlơi hŭi rơhyưt amăng mông ia lip ngă:

“Lu sang pơdong ƀơi lŏn bẻ đơi kah hăng thun hlâo tơnap tap biă mă či đuăi kơ ia lip. Yua hơmâo kơnuk kơna djru ba man pơdong sang hăng ngŏ dŏ kơđap ia lip, ră anai ană plơi pla hơđong pran jua, hŏk mơak biă mă”.

Kiăng man pơdong hơdôm sang anai djŏ ƀơi anih, gêh găl brơi mơnuih ƀôn sang dŏ hrŏm, mă yua amăng mông ječ ameč, lu sang anŏ khom pơyơr lơ̆n sang đang hmua ƀing gơñu pioh ngă anih man pơdong sang kơđap ia ling dăo. Ơi Nguyễn Liễm, plơi Hiệp Đồng, să Hòa Xuân, hơmâo pơyơr 450 m2 lơ̆n sang anŏ gơñu, pioh man pơdong sang brơi ană plơi pla dŏ hrŏm sit ia ling dăo truh, ñu lăi:

“Ră anai ƀuh sang pơdong djơh hăng anun kơjăp laih, dlông hloh jơlah ia lơ̆i thun hlâo 1 met, anun mơnuih ƀôn sang mơak biă mă, tơdah ia lip ƀudah kơthel hơjan hlim hai, mơnuih ƀôn sang đĭ dŏ hrŏm amăng anun kơđap jăng jai. Sit mơ̆n pơ anun hơđong hloh, rơnuk rơnua kơ ta”.

Ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lak lăi, djop ring bruă bơwih brơi kơ ană plơi pla, jing anih nao dŏ kơđap rơnuk rơnua hơđong sit hơmâo tơlơi truh ia ling dăo ngă. Yua kơ anun, djop să, phường kiăng git gai wai lăng, ming pơkra glăi, ba yua tŭ yua hloh; jŭ yap glăi djop anŏ gêh găl hơmâo apui yua, ia hơdjă, tơlơi pơhing pơtruh nao rai ăt amra hơmâo či mă yua pioh brơi mơnuih ƀôn sang nao dŏ pơtum hrŏm amăng mông hŭi rơhyưt ia lip.

Ơi Nguyễn Thiên Văn pơtrun hiăp kơ djop gơnong bruă, anom bruă hăng djop să, phường brơi pơtong rơđah črăn 1 kơčăo bruă tuh pơ alin man pơdong sang dŏ hrŏm kơ ană plơi pla nao kơđap amăng mông ia lip, ƀơi djop plơi pla, ƀôn ƀut mơtam. Mơ̆ng anun, kơsem min lăng pok pơhư lu hloh ƀơi anih juăt hơmâo tơlơi truh ia ling dăo re se sit truh bơyan hlim hơjan ia lip kơtang, lơ̆n tơhlŏm ngă.

“Blung hlâo lĕ bơwih brơi anŏ kiăng kơ mơnuih ƀôn sang ngă sang jơnum plơi, sang gru grua ƀudah kah hăng sang rung plơi, yua hrŏm tui tơđar, sit hơmâo tơlơi truh ia ling dăo lĕ ană plơi pla amăng ƀôn, hlơi sang ia dăo đuăi nao dŏ kơđap hrŏm. Biă mă ñu, amăng bruă pơhlom pơgang tơlơi truh ia ling dăo, khom ngă tui 4 mơta bruă sa anih, yua kơ anun djop plơi pla, să khom jŭ yap glăi bruă prăp lui mơnong ƀong huă, ia yua, apui lơtrik hăng tơlơi pơhing pơtruh nao rai kiăng prăp lui nao pơdŭ đuăi mơnuih ƀôn sang đuăi mơ̆ng anih hŭi rơhyưt, dŏ pơ anih rơnuk rơnua hloh sit hơmâo tơlơi pơtrun amăng mông ječ ameč truh”.