Ƀuh tui tal hơmâo tơlơi truh ia lip blan 11/2025, thun anai, bruă hơduah ĕp anih đuăi kơ ia lip, nao dŏ kơđap brơi mơnuih ƀôn sang amăng kual plung dơnung giăm hang ia krông tơring čar Dak Lak hơmâo đing nao laih. Ƀơi hơdôm să gah ngŏ tơring čar, 100 boh sang pioh mơnuih ƀôn sang dŏ kơđap sit ia lip hlăk ngă giong, djop, hmao kru, jao glăi amăng blan 9 anai. Hrŏm hăng anun, hơdôm hơpluh boh sang pơdong pioh mơnuih ƀôn sang dŏ kơđap amăng mông ia dăo tui hăng hơbô̆ man pơdong phara, djơ̆ hăng anŏ gêh găl mơ̆ng tơring, yua prăk mơnuih ƀôn sang, khul mơnuih mơnam djru ăt hlăk man pơdong mơ̆n. Ƀơi anih ƀu hơmâo sang dŏ kơđap yua kơ ia ling dăo ngă, mơnuih ƀôn sang pơkom prăk man pơdong mă, ngă sang dua tal dlông ƀiă, ƀơi sang gơñu pô mơtam.

Braih pơdai, mơnong ƀong huă amăng mông ječ ameč hăng ia mơñum pơhlom hlâo amăng mông ia ling dăo ăt lu sang anŏ đing nao prăp lui hlâo djă pioh. Ƀuh rơđah tơlơi truh kah hăng thun hlâo anun, lu sang anŏ pơmin glăi amăng bruă mă prăp lui gơnam yua, mơnong ƀong huă sit hơmâo tơlơi truh ia lip thun anai.

Gah gong gai kơnuk kơna djop să hăng ƀing ling tơhan amăng kơnuk kơna, bruă mă pơhlom pơgang tơlơi truh lơ̆n adai ngă, hơmâo prăp lui tong ten laih. Mơ̆ng bơyan hơjan hlim thun hlâo, anom bruă wai lăng bơnư̆ pơkong ia, akŏ tli dêh čar (Ding jum Ngă hmua hăng Ayuh hyiang) ngă hrŏm hăng Gơnong bruă Ngă hmua hăng Ayuh hyiăng tơring čar Dak Lak, Sang bruă pơgang mơnong ƀong huă đĭ pran gah Ding jum Ia jrao pơphun anih pơtô hlâo, hrăm kơ bruă “Pơđĭ tui tơlơi thâo kơ mơnuih ƀôn sang pơphun mă bruă pơtong glăi anŏ răm ƀăm truh yua ia ling dăo ngă hăng pơhlom mơnong ƀong huă đĭ pran amăng mông ječ ameč” ƀơi Dak Lak. Mơ̆ng anun, ƀing nao hrăm lĕ ding kơna djop grup ngă bruă djru pơklaih mơnuih mơnam amăng mông ječ ameč, grup pơgang tơlơi rơnuk rơnua ƀơi să, phường…..dưi tŭ mă tơlơi pơtô ngă tui djop gơnam yua pơtong glăi tơlơi răm ƀăm truh kơnang kơ  djop mơta ƀơi plơi pla hơmâo; thâo krăn anŏ hơgĕt ngă amuñ răm ƀăm truh; rơkâo đĭ hơdră pơhlom hlâo, bong glăi djơ̆ găl hăng tơlơi hơmâo amăng plơi pla, tơring kual pô; pơtô brơi bruă mă prăp hlâo hăng pơhlom mơnong ƀong huă djop, đĭ pran, biă mă ñu ƀing čơđai muai hăng mơnuih tha rơma….Ơi Phương Văn Lành, Khua ping gah să Hoà Thịnh, sa amăng hơdôm să kual ia ling dăo kơtang pơ ngŏ tơring čar Dak Lak, brơi thâo:

“Să hơmâo ngă hrŏm anom bruă pwohlom pơgang tơlơi truh lơ̆n adai ngă, pơphun anih pơtô lui hlâo tơlơi thâo, bruă ngă pơhlom pơgang tơlơi truh, bong glăi ia ling dăo brơi mơnuih ƀôn sang hrăm; laih dơ̆ng prăp lui song nan hăng ao kơsu pông rơdêh pơgang ƀlung ia djop plơi pla hơmâo soh. Hrŏm hăng anun, să ăt hơmâo tŭ mă hơdôm boh kanô hăng jua kơtang, pơprong ƀiă pioh bơwih brơi kơ bruă bong glăi tơlơi truh ia ling dăo kơñ pơgi”.

Tui hăng ơi Đào Mỹ, Kơ-iăng Khua Jơnum min mơnuih ƀôn sang tơring čar Dak Lak, ră anai tơring čar hlăk ječ ameč jŭ yap glăi, djop hơdră pơhlom hlâo tơlơi truh či hơmâo amăng hơdôm blan či rơnuč thun 2026. Ƀơi hơdôm să, ăt pơtum pok pơhai ngă tui tui jơlan hơdră “pă bruă sa anih”, pơđĭ tơlơi thâo dưi ngă bruă amăng să, pơpha gơnam yua mă bruă, rơdêh đĭ, gơnam djă hăng mơnong ƀong huă ƀơi anih juăt hơmâo tơlơi truh răm ƀăm kơtang, kiăng pơhlom hlâo hơgĕt kiăng amăng mông ječ ameč hơmâo mơtam. Laih dơ̆ng, Jơnum min mơnuih ƀôn sang tơring čar Dak Lak git gai djop să akŏ pơjing ngă hrŏm, djru ba djop anih ter hang ia krông, tơring pơ tơkai ia, gah yŭ bơnư̆ dơnao pơprong pơkong ia, kual ter hang ia rơsĭ hăng kual či hơmâo tơlơi truh ia lip kơtang. Ƀing tơhan kơnuk kơna prăp lui bruă mă mơ̆ng tơring čar truh pơ plơi pla, ƀơi să, phường hơmâo pơhrăm brơi laih hơdră pơhlom pơgang hăng bong glăi amăng mông ječ ameč hŭi rơhyưt truh.

“Ră anai, ƀing gơmơi ăt hlăk pơpha tong ten bruă mă, akŏ pơjing khul git gai bruă pơhlom pơgang amăng mơnuih ƀôn sang djop plơi pla kiăng dưi bong glăi hăng tơlơi truh, gơñu pô amra thâo bong glăi beč bal, hmar hloh sit hơmâo tơlơi truh amăng plơi pla pô”.