Thun 2026, bruă mă bong glăi hăng tơlơi truh lơ̆n adai ngă dưi hơmâo tơring čar Dak Lak kơtưn đing nao anăp bruă khom prăp hlâo tong ten, giăm hơmâo 100 bit anih pơkă lăng rơnoh ia hơjan hlim kơtang, 11 anih lăi lui hlâo ia ling dăo răm ƀăm, djop să, phường hơmâo akŏ pơjing khul tơhan kơsung nao pơ anăp, djru pơhlom, pơgang tơlơi truh sat lơ̆n adai ngă hăng hơmâo 11.000 čô mơnuih ngă ding kơna.

Ƀuh rơđah yua mơ̆ng tơlơi hơmâo sit nik hnun mơ̆n, kiăng pơsir tơlơi răm ƀăm truh, amăng anun hơmâo bruă hơdai gum hrŏm, kah pơpha tơlơi pơhing mă yua djop dơnao pơkong ia pơprong sit hơmâo hơjan hlim, đing nao pok pơhai ia djơ̆ găl. Anai lĕ sa tơlơi hrăm tơring čar Dak Lak pơƀut tŭ tơdơi kơ hơmâo tơlơi truh ia ling dăo prong blan 11 thun hlâo. Pơhiăp ƀơi mông jơnum, Khua ping gah tơring čar Dak Lak, ơi Lương Nguyễn Minh Triết pơtrun hiăp, kiăng pơtruh nao rai hruaih tơlơi pơhing, pơhiăp nao rai re se hăng tơring čar Gia Lai pơkă lăng hnơ̆ng ia hơjan, jơlah ia blai đĭ hăng bruă ĕp lăng djop dơnao pơkong ia pơprong ƀơi hlao ia krông adih, kiăng hơmâo tơlơi pơtă lui hlâo mơnuih ƀôn sang hlâo kơ pok pơhai ia amăng mông ia lơ̆i blai hang yua hŭi pơčah akŏ tli. Mơ̆ng akŏ thun truh ră anai, tơlơi truh hlim hơjan, lơ̆n adai ngă ƀơi Dak Lak hơmâo ngă kơ 2 čô mơnuih djai, 109 boh sang răm ƀăm, rơnoh răm rai yap truh 2,8 klai prăk laih.