Amăng mông jơnum ngui lăi pơthâo ruah čơđai sang hră, lăi pơthâo bruă mă kơ čơđai sang hră gưl 2, čơđai Trần Thùy Tú, hrăm anih 9D, Sang hră gưl dua Thành Nhất, plơi prong Buôn Ma Thuột đing nao hmư̆, kơđiăng čih glăi hăng khin hơtai tơña bla. Ñu lăi pơthâo:

 “Rơgao kơ hrơi jơnum ngui kâo thâo hluh hloh kơ bôh than pơtô pơhrăm ăt kah hăng hrăm bruă ƀơi hơdôm bôh Sang hră pơtô bruă. Anun amra hmâo sa tơlơi ruah mă klă kơ ƀing gơyut hrăm hră ƀu djop tơlơi kiăng pơkă ƀudah akă dưi. Ƀing gơyut amra hmâo yak nao pioh pơđĭ drơi pô ăt kah hăng ruah mă bruă hrăm lăp djơ̆ hăng pô hloh”.

Anai lĕ thun blung a Gơnong bruă pơtô pơhrăm tơring čar Dak Lak pơphun “Hrơi jơnum ngui lăi pơthâo ruah čơđai, lăi pơthâo bruă mă kơ čơđai sang hră gưl 2”. Nai Nguyễn Thị Lương, ƀơi Sang hră gưl dua Nguyễn Thị Minh Khai, plơi prong Buôn Ma Thuột brơi thâo, Akô̆ bruă “Pơtô pơhrăm anăp bruă mă hăng pơsit jơlan gah pơpha bruă hrăm kơ čơđai amăng pơtô pơhrăm amăng tơring čar Dak Lak rơwang 2018-2025” hmâo pok pơhai laih mơ̆ng sui, samơ̆ lu ñu hơdôm bôh sang hră rŏng čih mă kơčăo bruă lăi pơhing anun gru nam ba glăi bôh tơhnal hăng anô̆ ha amăng plĕ akă prong. Lơm anun, čơđai sang hră kiăng hơduah ĕp lăng kơ bruă hrăm jai hrơi jai lu.

 “Hmâo sa dua čô čơđai hrăm hră ƀu thâo đơi ôh, samơ̆ gah bruă mă thâo biă, anun ƀing čơđai đing nao hơduah ĕp lăng biă. Kah hăng hơdôm mông lăi pơthâo tui anai, čơđai sang hră kâo hrăm nao hrăm lu biă, kiăng gum hrŏm hơduah ĕp lăng tŏng ten hloh kơ hơdôm sang hră pơtô bruă”.

Gum hrŏm lăi pơthâo ruah čơđai, lăi pơthâo bruă mă kơ čơđai sang hră gưl 2, ơi Đặng Như Thanh, pơ ala kơ Sang hră gưl 2 pơtô bruă Dak Lak lăi lĕ, anai jing bruă mă kiăng biă pioh djru ƀing čơđai gơgrong mă pô hloh amăng bruă hơduah ĕp lăng hăng ruah mă bruă hrăm lăp djơ̆ kơplah wah bôh thâo, tơlơi hor pô hăng tơlơi kiăng mơ̆ng mơnuih mơnam. Bruă hrăm bruă mă ăt pok tơbiă mơn kơ ƀing čơđai tơhnal hrăm hră, hăng dô̆ djru ngă plai ƀiă prăk mă yua kơ bruă hrăm:

 “Ƀing čơđai hrăm rah hră, hrăm rah bruă mă thơ, tơdơi kơ 3 thun ƀing čơđai amra hmâo sa wot 2 mơta ƀăng: Ƀăng anih 12 hăng ƀăng hrăm bruă. Mơ̆ng anun ƀing čơđai dưi hrăm đĭ Cao đẳng, Gưl dlông pioh tô̆ tui tơlơi čang rơmang mơ̆ng drơi pô. Hrŏm hăng anun Kơnuk kơna ră anai hmâo lu hơdră bruă djru brơi čơđai hrăm rah bruă hăng hrăm rah hră, hơdôm hơdră bruă gum djru lu mơta”.

Thun hrăm 2024-2025, Dak Lak pơkă hlâo hmâo năng ai ñu 31.000 čô čơđai sang hră hrăm giong gưl 2, đĭ rơbêh kơ 2.000 čô čơđai bơhmu hăng thun hrăm hlâo. Amăng mrô anai năng ai ñu 23.000 čô čơđai amra mut hrăm ƀơi hơdôm bôh Sang hră gưl 3 tui tơhnal pơkă, rơbêh kơ 4.000 čô čơđai sang hră ƀơi Anom pơtô pơhrăm bruă mă – Pơtô hrăm hră, mrô dô̆ glăi amra pơsit jơlan gah pơpha bruă pơtô pơhrăm tui Akô̆ bruă “Pơtô pơhrăm bruă mă hăng pơsit jơlan gah bruă hrăm kơ čơđai amăng pơtô pơhrăm amăng tơring čar Dak Lak rơwang 2018-2025”. Tui ơi Đỗ Tường Hiệp, Kơ-iăng Khua Gơnong bruă pơtô pơhrăm tơring čar Dak Lak, Gơnong bruă glăk kơtưn pơphun lăi pơthâo ruah čơđai, lăi pơthâo bruă hrăm kơ čơđai sang hră gưl 2 pioh ƀing čơđai dưi ruah mă jơlan nao lăp djơ̆.

 “Gơnong bruă pơtô pơhrăm pơđĭ tui dong tơlơi pơmin kơ khul mơnuih pơtô pơhrăm, mơnuih wai lăng, ƀing nai pơtô čơđai, biă ñu čơđai sang hră, amĭ ama čơđai sang hră hăng abih bang mơnuih mơnam thâo bruă pơpha jơlan gah hrăm bruă tơdơi kơ hmâo mă ƀăng anih 9 jing yôm phăn biă. Ƀing čơđai pơplih tơlơi hơdip mơda mơ̆ng pô, pơhrăm mơ̆ng pô hăng bruă ƀu djơ̆ kơnong kơ hmâo jơlan ƀăng hrăm hră ôh mơ̆, dô̆ dưi hmâo mă ƀăng jơlan hrăm bruă hăng amra akô̆ pơjing bruă mă kơ pô hluai tui jơlan hrăm bruă mă”.

Rơgao kơ bruă pơtrut kơtang bruă lăi pơthâo ruah čơđai, lăi pơthâo bruă mă, čang rơmang pơ̆ anăp anai, amĭ ama čơđai hăng čơđai sang hră hrăm giong anih 9 ƀơi Dak Lak amra hmâo hơdôm tơlơi ruah mă lăp djơ̆, bĕ tơlơi đuăi yŭ đuăi ngŏ ĕp sang hră hrăm kah hăng thun hrăm hlâo adih./.