Ƀơi mông jơnum, ƀing khua mua hơmâo hmư̆ hră pơtrun akŏ pơjing grup hyu pel ĕp bruă mă, tui hăng anun, Khua ping gah amăng anom bruă kơnuk kơna, yua Khua dêh čar ơi Phạm Minh Chính ngă khua grup pel ĕp mrô 1908 hăng khua ping gah anom bruă khua pơala mơnuih ƀôn sang dêh čar, ơi Trần Thanh Mẫn, Khua git gai pơ ala mơnuih ƀôn sang dêh čar ngă khua grup mrô 1910. Boh yom phun nao  ĕp lăng hơdôm tơlơi kah hăng:

Bruă pơƀut ngă tui Hră pơtrun 18, lơ 25/10/2017 mơ̆ng Khul apăn bruă ping gah dêh čar tal XII “Hơdôm tơlơi ăt brơi pơblih phrâo, dăp glăi sang bruă pơhrŏ mơnuih mă bruă amăng kơnuk kơna kơđi čar brơi hơbôt hloh, mă bruă hmar, tŭ yua” laih anun Hră klah čun mrô 121, lơ 24/1/2025 mơ̆ng khul apăn bruă ping gah kơ pơƀut bruă mă tui Hră pơtrun 18, lir hơbit hăng bruă akŏ pơdong hăng pơphun bruă mă phrâo amăng ping gah. Pơhiăp ƀơi mông jơnum, Khua dêh čar ơi Phạm Minh Chính brơi thâo, kiăng ngă tui tơlơi git gai anai, khua mua ping gah amăng kơnuk kơna ăt hơmâo dăp hơdră či ĕp lăng hlâo. Kiăo tui kơ anun, ping gah djop sang bruă amăng kơnuk kơna tañ pel ĕp glăi bruă mă tui hăng tơlơi hăng hră pơtrun brơi pel ĕp, mơ-it kơ abih bang ding kơna grup hyu pel ĕp. Khua dêh čar čang rơmang, djop ping gah gah anom bruă khua pơ ala mơnuih ƀôn sang dêh čar, ping gah amăng kơnuk kơna ngă tui hmar hơbôt, tŭ yua, klă hiam, djơ̆ hăng tơlơi phiăn pơtrun.