Črăn jơlan mrô 27 găn nao pơ plơi Phi Jut, să Dă Rsal hơđăp, ră anai să Dam Rông 3, tơring čar Lâm Đồng glông hloh kơ sa km đôč samơ̆ luh hing hung pơprong biă mă, ia dong rơman drum ăt hlom mơ̆n. Rơdêh prong pơgiăng gơnam, pơgiăng tuai hăng rơdêh ôtô, biă mă ñu khul rơdêh thut nao rai kơdâo amăng ia plăng luh anet prong ƀơi jơlan hmrih hmrah mơsah wơ̆t rơdêh hăng pô mơgăt. Ayong Phan Mười, sa čô mơnuih ƀôn sang hơmâo sang ter jơlan nao rai, ñu brơi thâo jơlan răm abih laih, rai tơplŭk 3-4 thun hăng anai laih, ngă kơ tơlơi rô nao rai tơnap tap biă mă, pơdŭ pơgiăng gơnam tam dŏ hŭi tơlơi či truh hơmâo, ƀu rơnuk rơnua ôh.

 “Bơyan lĕ ƀu anăm añ ƀơ̆i yơh, ia hlŭ, dơlut nao rai črek čruak kah hăng hmua pơdai ia. Rơdêh rô nao rai ngă črač kơdah ia hlŭ djơ̆ pơnăng sang hlŭ abih, sit bơyan phang lĕ ƀui lŏn tơplŭk kah hăng kơthul hăng lŏn, dŏ dong ƀong huă ƀu hơdjă tah. Lu wơ̆t ƀuh arăng đĭ rơdêh bơrơbuh, hơmâo mơnuih djai ƀơi anăp sang gơmơi yua jơlan răm ngă. Kiăng biă mă kơnuk kơna tañ pok pơhai ming pơkra glăi jơlan anai pioh kơ mơnuih ƀôn sang rô nao rai hruaih mơak, ană amôn nao sang hră dưi rơnuk rơnua hơđong”.

Ayong Bùi Tuấn Anh, mơnuih mơgăt rơdêh prong pơgiăng tuai hơmâo sưng đih, jơlan nao rai mơ̆ng Gia Lai nao pơ Lâm Đồng kah pơpha, ñu mơgăt rơdêh rô nao rai ƀơi jơlan 27 anai 10 thun hăng anai laih. Hlâo adih, črăn mơ̆ng Dak Lak nao pơ Lâm Đồng kơnong abih 5 mông truh yơh, samơ̆ ră anai jơlan răm ƀu khin đĭ hmar ôh, abih mơ̆ng 6 truh 7 mông kah mơ̆ng truh. Lơ̆m pơmut glăi tơring čar, tuai nao rai đĭ tui mơ̆ng 30-40%, anun yơh pô sang rơdêh brơi pơđĭ tui mrô rơdêh pơgiăng tuai. Samơ̆ jơlan răm kơtang đơi, ƀing tuai đĭ amăng rơdêh, jơlan răm rơdêh tơpư̆ rơyuh kơtang ngă kơ ƀing tuai đĭ rơdêh gleh glar yua, ƀlĕ pơtah pơ-ô̆, anun prăk apah ăt đĭ tui lu hloh pơkă hăng hlâo:

“Ƀing tuai đĭ rơdêh juăt ƀlĕ pơtah, rơdêh nao rai ăt bơbeč yua mơ̆n, amuñ răm drông rơdêh, biă mă ñu drông gah anăp hăng anŏ pơgang drông gah klôn; pông rơdêh lĕ juă djơ̆ boh pơtâo, juăt pơtuh hăng tơdu pô rơdêh. Rơngiao kơ anun, hlâo adih jơlan hiam rô nao rai plai ƀiă huač ia săng, ră anai huač ia săng mơ̆ng 15 truh 20 lit sa wơ̆t nao, yua kơ đĭ rơnang đơi, ƀu dưi đĭ hmar ôh, ngă kơ rơnoh prăk huač ia săng truh 500.000 prăk pơkă hăng hlâo”.

Ơi Trương Trung Thắng, Kơ-iăng khua Gơnong bruă man pơdong tơring čar Lâm Đồng lăi, ră anai dŏ năng ai 21 km jơlan mrô 27 găn nao ƀơi tơring glông Dam Rông hơđăp, črăn ƀơi mrô Km 85+500-truh pơ Km 106 răm kơtang biă mă. Phun ñu yua hơdôm thun giăm anai hơjan prong na nao, sui hrơi, rơdêh nao rai lu đơi, rơdêh pơprong soh, pơgiăng kơtrâ̆o, bruă pơkra ming, wai lăng, jơlan aka ƀu hmao pơkra ôh sit răm.

Ơi Trương Trung Thắng brơi thâo, Gơnong bruă man pơdong hơmâo rơkâo đĭ laih hăng jơnum min mơnuih ƀôn sang tơring čar, rơkâo 10 klai prăk ba yua pơkra hrêp glăi jơlan kah hăng ngă bơngač akiăng jơlan, pơkra glăi đing ia, ia plăng rô djơ̆ jơlan, tuh pơsir glăi luh atur jơlan pơčah pơprong. Lăng nao sui pơ anăp adih, ăt ngă hră laih, lăi pơthâo jơnum min mơnuih ƀôn sang tơring čar hăng Ding jum man pơdong pơsit brơi 110 klai prăk pioh pơkra glăi jơlan kiăng ngă giong hĭ 21 km jơlan răm kơtang, thun blan mă bruă amăng thun 2026. Ơi Trương Trung Thắng lăi:

“Anai lĕ črăn jơlan đĭ čư̆ čun čue, hŭi rơhyưt biă mă, hnơ̆ng răm ƀăm ñu prong kiăng ming pơkra glăi tañ, tui hăng anun ƀing gơmơi ngă giong hră pơar, rek lăng, čih pơkra glăi či pơphun mă bruă ming pơkra, laih anun gir run ruah sang bruă apah pơkra ming, laih ruah sang bruă pô pơkra ming lĕ hlong brơi mă bruă mơtam yơh”.

Jơlan 27 ră anai ƀu kơnong rô nao rai kơnong Dak Lak hăng Lâm Đồng đôč ôh, dŏ jing jơlan pơtruh nao rai hăng tơring čar mrô 725 găn nao pơ hơdôm să  gah yŭ Lâm Đồng hăng nao pơ  Đà Lạt. Pơkra hiam glăi jơlan anai kah hăng pok brơi anŏ gun pơđĭ kyar kơ tơring čar, laih anun djru mơnuih ƀôn sang rô nao rai rơnuk rơnua mơak klă. Amăng bruă kơtưn ngă pơtruh nao rai amăng kual hơmâo dơ̆ng jơlan phun Ngŏ- Yŭ pơđĭ kyar kơtang kơ abih bang ƀơi Dơnung Tong krah dêh čar.