Amăng anun, kơčăo bruă črăn 3 gah Kơčăo bruă tuh pơ alin man pơkra jơlan rơdêh đuăi hmar Khánh Hòa - Buôn Ma Thuột rơwang 1 glông rơbêh 48km, mơ̆ng Km69+500 (să Ea kar) truh pơ Km117+593 (să Ea Knuêč), găn nao 7 boh să hơmâo Ea Ô, Vụ Bổn, Tân Tiến, Krông Pač, Ea Knuêč, Ea Ning hăng Ea Ktur.

Kơčăo bruă anai pơdong glông jơlan pơtruh Dap Kơdư hăng Dơnung Tong Krah, pơtruh glông jơlan pơdong pơgăn, pơtrut tŭ yua jơlan nao rai glăk hơmâo tuh pơ alin, mơ̆ng anun pok rai anih đĭ kyar, pơđĭ tui tơlơi pơhno, kơtưn, pơhlom pơgang lŏn ia rơnuk rơnua, hăng pơtrut bruă djru ba tơlơi bơwih ƀong hơdip mơda mơnuih ƀôn sang. hrŏm hăng anun, Kơčăo bruă man pơkra jơlan Hồ Chí Minh črăn bĕ gah Ngŏ Buôn Ma Thuột glông 39,6km, gah anăp lĕ să Čuôr Dăng hăng gah rơnuč lĕ să Hòa Phú, găn nao 5 boh să, phường hơmâo Čuôr Dăng, Ea Kao, Hòa Phú, Ea Knueč hăng Ea Ktur. Bruă anai kiăng plai ƀiă ngă kơniă đơi jơlan nao rai kơ plơi prong, pơđĭ tui anŏ tŭ yua jơlan Hồ Chí Minh, pơtruh hơdôm boh tơring kual Dap Kơdư, đĭ kyar bơwih ƀong huă - mơnuih mơnam hăng hơkrŭ kjăp pơgang lŏn ia - rơnuk rơnua amăng kual.

Ăt hrơi anai mơn, kual Ngŏ tơring čar Dak Lăk (tơring čar Phú Yên hơđăp), hơdôm ring bruă man pơdong yom pơkŏn dong ăt ha amăng plĕ pơphun ngă laih, hơmâo Anih đih pơdơi yom Cù Lao Mái Nhà ƀơi să Ô Loan hăng dua kơčăo bruă sang dŏ ƀơi phường Bình Kiến hăng kual gah Kơdư jơlan Trần Phú, phường Tuy Hòa, djru ngă pơgiong anih anom jơlan nao rai plơi prong laih anun djơ̆ hăng tơlơi kiăng hơdip mơda mơ̆ng mơnuih ƀôn sang pơ anai./.