Sang dŏ man pơdong lĕ prăk pơkrem amăng sui thun mă bruă mơng dư rơkơi bơnai yă Lê Thị Minh Trang, dŏ amăng plơi Vĩnh Xuân, să Tuy An Tây, ră anai dŏ kơnong geč pơtâo tơdơi kơ kơčong čư̆ gah tlôn sang tơhroh trun. Tlam lơ 19/11, pơnăng sang ƀuh đang pơprong, gong gai ƀon lan hmao tlôn rơkâo ba đuăi. Samơ̆ kơnong amăng ha mlăm hơjan prong, ngă sang glưh pơčah abih mơtăm.

“Sang anŏ gơmơi hăng neh met wa ƀơi anai čang rơmang kơnuk kơna tañ man pơdong brơi sang phrâo, mơ̆ sang dŏ jang jai tui anai ăt glêh glar mơn”.

Tơlơi hơdip kơ sang anŏ yă Trang ăt kar hăng hăng 35 boh sang anŏ khŏm ba đuăi kơđăp ƀơi plơi Vĩnh Xuân. Tui ơi Lê Minh Ý, Khua git gai Ping gah ngă rah Khua plơi Vĩnh Xuân, hlâo kơ hơjan ia ling dăo, mơnuih ƀôn sang hơdip gơnang nao bruă ngă hmua, pla phun pơtơi, tơbâo. Tơlơi kơthel mrô 13 pưh nao, phun pla aka ƀu rŭ glăi, mơ̆ ƀuh hơjan prong sui hrơi ngă lŏn tơhroh răm rai kơtang, ngă lu sang anŏ rơngiă sang, lŏn ngă hmua. Ră anai, tơlơi čang rơmang prong hloh mơng neh met wa lĕ tañ hơmâo sang dŏ.

“Phrâo anai Jơnum min ăt mă tơlơi pơgôp hiăp mơng neh met wa, abih bang lêng kơ tŭ ư hrŏm kơ bruă anai, neh met wa ăt čang rơmang nao dŏ pơ anih dŏ phrâo rơnuk rơnua ƀiă. Čang rơmang tañ pơdong plơi pla kiăng neh met wa hơmâo anih dŏ, tañ hơđong tơlơi hơdip”.

Ơi Phan Quang Phi, Khua Jơnum min mơnuih ƀôn sang să Tuy An Tây brơi thâo, gong gai să hơmâo pel ĕp glăi, pơtum pơƀut 49 boh sang anŏ dong amăng kual amuñ lŏn tơhroh, bruă blung hlâo lĕ pơdong plơi pla phrâo brơi 35 boh sang anŏ dŏ hơdip amăng kual hŭi rơhyưt. Anih man pơdong glăi plơi pla hơmâo să Tuy An Nam ruah, ataih mơng plơi pla hơđăp giăm 5km:

“Gong gai ƀon lan ječ ameč gum hrŏm hăng să Tuy An Nam kah hăng Khul wai lăng truh hrơi pơgiong bruă ngă hră pơ-ar kơ anih man pơdong amra pơphun man pơdong sang ƀơi anai. Pơhlôm brơi djơ̆ tơlơi git gai mơng Khua dêh čar”.

Tơlơi yôm hloh lơm pok pơhai bruă man pơdong glăi plơi pla lĕ tơlơi mut hrŏm mơng abih bang mơnuih ƀôn sang ƀơi kual tŭ mă. Amăng plơi Quảng Đức, să Tuy An Nam-Anih arăng ruah man pơdong glăi plơi pla phrâo-hơmâo 17 boh sang anŏ pơyơr lŏn mơnai, jing lŏn mơnai rơđah rơđông kiăng pơdong anih dŏ brơi hơdôm boh sang anŏ kual lŏn tơhroh. Yă Nguyễn Thị Chính, Khua plơi Quảng Đức, să Tuy An Nam brơi thâo:

“Plơi pla ăt pơtrut pơsur neh met wa ƀơi anai pơyơr lŏn mơnai, ngă gêh gal brơi hơdôm boh sang anŏ kual lŏn tơhroh dưi hơmâo anih dŏ kiăng dưi dŏ hơdip hrŏm brơi mơ-ak, neh met wa ƀơi anai ăt lêng kơ tŭ ư. Neh met wa ƀơi anai ăt ngă gêh gal brơi hơdôm boh sang anŏ tơnap ƀiă, kar hăng hla sir pơging brơi hla tơ̆i”.

Hăng pran jua djru ba tui anun hơmâo pơdah tong ten tơlơi pơsit mơng yă Trương Thị Nhung, dŏ amăng plơi Quảng Đức, să Tuy An Nam, lơm 2 ar lŏn sang anŏ ñu dong amăng lŏn pơhrui glăi kiăng kơ man pơdong plơi pla phrâo”.

“Kâo ăt tŭ ư mơn, lăng anai lĕ bruă gơmơi djru brơi ƀing mơnuih ƀơi kual lŏn tơhroh, kiăng duh glăi djop prăk pơhrui lŏn mơnai brơi mơnuih ƀôn sang lĕ dưi yơh”.

Kiăng pơtrut tañ bruă mă, Khua mua tơring čar Dak Lak gum hrŏm hăng djop gơnong bruă, sang bruă bơdjơ̆ nao hăng khua mua dua boh să Tuy An Tây hăng Tuy An Nam hơmâo nao ĕp lăng sit nik ƀơi hơdôm kual lŏn mơnai ruah ngă anih man pơdong plơi pla phrâo brơi 35 boh sang anŏ. Kual lŏn mơnai anai prong giăm 3 ektar, hơmâo 52 blah lŏn mơng giăm 20 boh sang anŏ. Amăng mông mă bruă, ơi Nguyễn Thiên Văn, kơ-iăng Khua Jơnum min mơnuih ƀôn sang tơring čar Dak Lak rơkâo djop gơnong bruă, sang bruă gum hrŏm kjăp phik, akŏ pơjing grup djru brơi yôm phăn kiăng pơsir hĭ bruă ngă hră pơ-ar tui hơdră ječ ameč, tañ hloh prap tuh pơ alin, pơhlôm djop tơlơi gal djơ̆ tơlơi phiăn kiăng tañ pok pơhai man pơdong sang brơi ană plơi pla.

“Ƀing ta ngă tui tơhnal pơkă phara, bơ bruă man pơdong kiăng kơ ngă tui tơlơi črâo trun ječ ameč lơm man pơdong. Samơ̆ kiăng pơkrem, ba glăi boh tŭ yua prong hloh, sit nik hloh, anăm ngă khưi khai, anăm ƀuh bruă ngă soh glăi”.

Bruă pơdong glăi plơi pla phrâo brơi 35 boh sang anŏ kual lŏn tơhroh ƀơi să Tuy An Tây ƀu djơ̆ kơnong lĕ hơdră bruă ƀơi anăp kiăng pơhlôm rơnuk rơnua brơi ană mơnuih đôč ôh mơ̆ ăt pơdah tong ten tơlơi glăm ba mơng gong gai djop gưl, hrŏm hăng pran gum pơgôp, djru nao rai amăng mơnuih mơnam./.