Mơguah lơ 18/12, Kơ-iăng khua dêh čar ơi Hồ Quốc Dũng hrŏm hăng grup khua nao čuă, brơi gơnam hăng bơni hơ-ơč hrơi Noel ƀơi Sang bruă wai lăng khul đăo khop gah tơring Huế, laih dong nao čuă, bơni hơ-ơč kơ neh met wa tui đăo ƀơi ƀôn prong Huế. Pơ ala kơ khua mua Ping gah hăng Kơnuk kơna, Kơ-iăng khua dêh čar brơi pŏ bơnga, bơni hơ-ơč kơ Khua khul đăo khop Đặng Đức Ngân, ƀing khua djru bruă hăng abih bang mơnuih ƀôn sang tui đăo khop ƀơi Huế čơkă bơyan Noel thun 2025 rơnuk rơnua, mơak mơai, trơi pơđao, thun phrâo 2026 hơđong kjăp, rơnuk rơnua, yâo mơak, tŏ tui gru khăp kơ lŏn ia, hơdip klă đăo hiam.

Kơ-iăng khua dêh čar lăi dlăm tơlơi gum bruă yom mơ̆ng neh met wa đăo Khop amăng khul gum pơgop djuai ania, gum pơgôp đĭ kyar bơwih ƀong huă - mơnuih mơnam mơ̆ng lŏn ia. Hrŏm hrơi anai mơn, Kơiăng khua dêh čar nao čuă, brơi gơnam kơ dua boh sang anŏ đăo Khop tơnap tap ƀơi phường Thuận Hoá hăng nao sem lăng bruă man pơdong sang kơ sang anŏ răm rai yua hơjan kơthel ngă, bruă pok pơhai “Bruă mă Quang Trung” djru ba mơnuih ƀôn sang hơđong tơlơi hơdip ƀơi să Lộc An, ƀôn prong Huế.