Yap truh lơ 18/6, tơring čar Dak Lak hơmâo pơgiong čoh pơkra jơlan hơdră hrŏm rơbêh 1.700 pok hră hăng dua tơlơi Yuăn hăng Anglê, hơmâo mơ-it nao ƀing khua mua, anom bruă tuh pơ alin amăng lŏn ia hăng tač rơngiao. Jơnum pơsur tuh pơ alin blung a tơdơi kơ pơmut hrŏm, Dak Lak him lăng amra pơsit tŭ ư tơlơi črâo trun tuh pơ alin, tŭ yap čih anăn tuh pơ alin ƀudah hră pioh hơdor brơi 28 akŏ bruă pơprong, hăng abih tih prăk tuh pơ alin truh rơbêh 43.500 klai prăk.

Kiăng pơhlôm jơnum pơphun tŭ yua, pơhưč lu anom bruă tuh pơ alin pơprong, Khua Jơnum min mơnuih ƀon sang tơring čar Dak Lak Đỗ Hữu Huy rơkâo djop gơnong bruă, sang bruă tŏ tui pel ĕp hơdôm akŏ bruă tuh pơ alin, pơbưp nao rai hăng anom bơwih ƀong sĭ mơdrô hăng pơgiong hơdôm tơlơi gal pơphun jơnum pơƀut.