Jơlan nao anăn “Adơi khăp kơ Lŏn ia Việt Nam” jing bruă ngă yom biă mă pioh pơtô pơblang, pơhrăm brơi kơ khul grup čơđai sang hră, čơđai muai ƀôn prong Hồ Chí Minh thâo kơ tơlơi hơdip, bruă hơkrŭ hing ang mơ̆ng Khua mir sir Hồ Chí Minh; tơlơi čih kơ gru grua dêh čar, gru grua djuai ania hmư̆ hing mơ̆ng Grup čơđai muai kơsung nao hlâo djă anăn Hồ Chí Minh, hơdôm gru hiam ƀing čơđai muai hur har.

Pơhiăp amăng mông bưp mơak anun, Kơ-iăng khua mir sir yă Võ Thị Ánh Xuân čang rơmang ƀing ană amôn, čơđai muai ba gru hlâo hur har hrăm hră thâo rơgơi, triăng ngă bruă hơmâo jơlan hơdră ngă hrŏm rơnuk rơnua kơ drơi jăn pô, tŭ yua hiam hăng ba glăi lu boh tơhnal hiam klă, kiăng rim črăn jơlan nao, găn rơgao amra djru kơ ƀing ană amôn thâo hluh lu hăng dơlăm hloh kơ gru grua phun dêh čar, gru grua đưm djuai ania, pơbŭ đĭ tơlơi khăp kơ plơi pla, lŏn ia, kiăng hrăm lu hloh hơmâo tơlơi pơmin thâo pơ-ư ang hăng thâo pơmin glăm ba bruă ngă hăng Lŏn ia Việt Nam. Kơ-iăng khua mir sir lăi pơtong, Ping gah hăng Kơnuk kơna ăt đing nao pioh lu tơlơi hiam klă hloh brơi kơ čơđai muai, ngă gêh găl kiăng abih bang čơđai muai dưi hrăm hră pơar, pơtop pơhrăm ƀŭ pơkra pran jua hiam klă, pơđĭ kyar amăng anih hơdip jum dả mơak klă rơnuk rơnua, tơpă hnơ̆ng hăng pơđĭ abih tơlơi thâo mơ̆ng ta pô djru bruă mă kơ lŏn čar. Kơ-iăng khua mir sir čang rơmang djop sang bruă ping gah, gong gai kơnuk kơna, Jơnum min djop djuai ania mơnuih mơnam dêh čar, khul grup amăng bruă kơđi čar-mơnuih mơnam, anom bruă pơtô pơjuăt, Khul tơdăm dra mut phung hăng Grup čơđai muai kơsung nao pơ anăp djă anăn Hồ Chí Minh ăt đing nao, djru ba lu hloh kơ bruă wai pơgang, pơtô pơhrăm ba čơđai muai dêh čar.