Ƀơi Anom bruă Djru pơjrao tơhan rơka Nghệ An, ơi Trần Cẩm Tú nao čuă, tơña bla hăng brơi gơnam kơ 83 čô tơhan rơka, tơhan ruă nuă; 18 čô mơnuih pô sang mơnuih ngă hơkrŭ mơ̆ng 2 boh tơring Nghệ An hăng Hà Tĩnh.

Pơ ala khua mua Ping gah, Kơnuk kơna, ơi Trần Cẩm Tú tơña bla, pơpŭ bơni biă mă kơ ƀing tơhan rơka, tơhan ruă nuă, pô sang mơnuih hơkrŭ lŏn ia glăk hơmâo wai lăng, pơjrao ba pơ anai. Ƀơi Hà Tĩnh, ơi Trần Cẩm Tú hăng khul khua nao dưm bơnga, čuh ñang ƀơi Anih gru đưm Ngã 3 Đồng Lộc, anih ha pluh čô dra amăng Grup tơhan 4, Đại đội 552 djai drơi tơdơi kơ hrơi plĕ boh ƀom kơtang mơ̆ng ƀing ayăt. Gơñu djai lơ̆m glăk dŏ dra, aset thun biă mă, čih pioh tơlơi adoh bơni prong, yom biă mă mơ̆ng djuai ania ta./.