Tui lăi pơthâo mơng Jơnum min mơnuih ƀôn sang tơring čar Dak Lak, hơdôm blan akŏ thun, bruă tuh tia pơkra ming, sĭ mơdrô hăng tuai čuă ngui hơmâo tơlơi yak nao pơđĭ kyar klă. Mrô tuai čuă ngui đĭ ha mơkrah pơhmu tui tơđar thun hlâo. Tơlơi ngă bơngač hloh lĕ pơhrui ngăn drăp rơbêh 5.000 klai prăk, đĭ rơbêh 35% pơhmu hăng thun hlâo.

Samơ̆, hrŏm hăng hơdôm boh than dưi ngă anun, tơring čar Dak Lak ăt glăk dong ƀơi anăp sa, dua tơlơi tơnap tap. Ơi Nguyễn Thiên Văn, Khua Jơnum min mơnuih ƀôn sang tơring čar Dak Lak rơkâo djop ƀon lan hăng anih anom đing nao pơsir hĭ gun găn, tañ jao prăk tuh pơ alin man pơdong, anăp nao pơgiong hơdôm hơnong pơkă pơđĭ kyar bơwih ƀong huă-mơnuih mơnam amăng ha thun 2025.

“Lăng nao abih bang lĕ ăt hơđong, samơ̆ bruă jao trun prăk ODA lĕ aka ƀu hruaih, ƀing ta kiăng lăng nao tơpă hăng ngă hiưm pă pơtrut jao prăk ODA. Kơ pơhrui ngăn drăp, hơdră bruă prăk kak gưl tơring čar lĕ 1.140 klai, hăng gưl tơring glông ngă tui 1.600 klai. Mơng anai truh rơnuč thun gưl tơring čar dŏ 600 klai prăk dong, bơ gưl tơring glông kiăng ngă tui 700 klai prăk dong kah mơng djơ̆ mrô pơkă. Hăng gưl tơring čar ăt dưi hơđong, kơnong hăng gưl tơring glông, lơm pơplih jing gưl să amra ngă tơnap amăng prăk pơhrui. Bruă anai ƀing khua mua kiăng đing nao”.

Amăng jơnum Khul apăn bruă Ping gah tơring čar Dak Lak tal 33 (pok prong), ƀing khua mua hơmâo pơčrông sai, pơgôp hiăp lu boh tơhnal yôm phăn prap lui Jơnum khua mua Ping gah tơring čar tal XVIII, rơwang thun 2025-2030. Tui črăn hră lăi pơthâo bruă kơđi čar mơ-it nao Jơnum Ping gah tơring čar rơwang pơ anăp, tơring čar Dak Lak phrâo ba tơbiă hơnong pơkă lu hloh lĕ amăng bruă bơwih ƀong huă, gru grua-mơnuih mơnam, ayuh hyiăng lŏn mơnai, wai pơgang rơnuk rơnua hăng pơjing Ping gah. Laih dong pơsit tong 5 grup bruă jao, hơdră pơsir phun hrŏm hăng hơdôm tơlơi pơplih yôm kiăng ngă tui hơnong pơkă pơđĭ kyar tañ, hơđong kjăp.

Jơnum ăt đing nao pơčrông sai hăng tŭ ư hloh hăng boh tơhnal amăng akŏ bruă akŏ pơjing Ping gah tơring čar Dak Lak hluai tui bruă pơmut dua Ping gah tơring čar Dak Lak hăng Phú Yên. Tui anun, tơdơi kơ dưm dăp, đơ đam tơring čar Dak Lak (phrâo) amra hơmâo 108 grup Ping gah dong amăng Ping gah tơring čar, hăng abih tih giăm 140.000 čô mơnuih Ping gah.

Ơi Nguyễn Đình Trung, Khua git gai Ping gah tơring čar Dak Lak, rơkâo amăng hrơi blan pơjing hră pơ-ar, djop gưl, gơnong bruă, gong gai ƀon lan kiăng tŏ tui pơphô bruă, pơgôp nao amăng anăn Jơnum hăng boh tơhnal hơdôm akŏ bruă akŏ phun. Amăng anun, bruă tŭ mă, ngă tui tơlơi dưi amăng dua boh tơring čar Dak Lak hăng Phú Yên tơdơi kơ pơmut hrŏm pơlir hăng tơlơi rơkâo pơđĭ kyar djop mơta:

“Kơsem min kiăng tŏ tui tơlơi dưi amăng tơring čar Dak Lak hơđăp hăng tơring čar Phú Yên hơđăp, dua dong lĕ kiăng lăp djơ̆ hăng hơdôm bruă jao phun amăng 2 boh tơring čar, anăp nao tơlơi bơwih ƀong hlao đơi ăt ƀu dưi, bơ bruă djru brơi tơlơi hơdip mơnuih mơnam, wai pơgang ling tơhan, djă pioh hăng tŏ tui gru grua kiăng đing nao. Bơ bruă pơplih phrâo mơnuih apăn bruă, ƀing ta kiăng pơplih phrâo kah dưi pơđĭ kyar, hăng tơlơi rơkâo prong mơng gơnong glông, mơng mơnuih ƀôn sang mơ̆ bruă mă ăt tui hơđăp, ƀu dưi pơđĭ kyar. Thun 2025 bruă dưm dăp anih anom mă bruă lĕ bruă mă yôm phun samơ̆ kơnong tơring čar Dak Lak ăt dưm dăp mơnuih apăn bruă pơhlôm klă hloh mơn”./.