Gum hrŏm Hrơi Jơnum ngui bruă mă yua kơ Jơnum min mơnuih ƀôn sang plơi prong Buôn Ma Thuột gum hrŏm hăng Anom bơwih kơ bruă mă tơring čar Dak Lak pơphun mơ̆ng akô̆ blan 5 phrâo rơgao, Sang bruă bơwih ƀong mơnuih ƀôn sang Vũ Nguyên Bio hmâo ba tơbiă tơhnal pơkă ruah ƀiă biă mă ñu 30 čô mơnuih mă bruă. Samơ̆ bôh tơhnal ƀu kah hăng tơlơi čang rơmang ôh. Amai Nguyễn Thị Ý Nga, Khua Sang bruă brơi thâo, rim blan Sang bruă hmâo tơlơi kiăng ruah năng ai ñu 50 čô mơnuih hăng hơdôm mơta bruă mă: pơkra kơphê mơñum, mơnuih mă bruă spa, nail, bruă bơwih kơ tuai čuă ngui, sang jưh tuai pioh kơ arăng apah, samơ̆ dong mơ̆ng akô̆ thun truh ră anai phrâo ruah mă 30 čô mơnuih mă bruă đôč.

 “Ră anai mrô mơnuih mă bruă kiăng ruah mut mă bruă kơ Sang bruă ăt akă djop mơn, yua kơ Sang bruă hmâo 3 bôh anom lĕ Dak Lak, Dak Nông hăng Phú Yên. Ƀu hmâo djop anun ăt akă dưi djơ̆ hăng sang bruă tal 3 mơn”.

Hăng sa anom bơwih ƀong hmâo mrô mơnuih mă bruă lu hloh ƀơi Dak Lak, hăng năng ai ñu 1.500 čô mơnuih. Sang bruă Able Joy ƀơi kual Sang măi Hòa Phú ăt glăk bưp tơnap mơn amăng bruă ruah mơnuih mă bruă. Ơi Trần Chí Vĩ, Kơ-iăng Khua Sang bruă Able Joy lăi pơthâo, ră anai sang bruă glăk prăp lui mă yua anom tal 2. Anom anai khom ruah hmâo 3.000 čô mơnuih mă bruă. Mơ̆ng akô̆ thun truh ră anai, Sang bruă hmâo pơkĕ hrŏm laih lu hơdră, gum hrŏm hăng lu anom bruă pioh ruah mơnuih mă bruă, samơ̆ kơnong kơ hmâo mă năng ai ñu 300 pok hră rơkâo mă bruă. Hră rơkâo blơi gơnam đĭ, sang măi phrâo dưm truă mă yua, samơ̆ mơnuih mă bruă lĕ ƀu djop ngă Sang bruă khom ngă tui hơdôm jơlan gah pioh pơhlôm djop gơnam arăng kiăng blơi:

 “Mrô gơnam rơkâo blơi thun 2024 đĭ 50%, sang măi ba tơbiă lĕ 1/6 amra djop brơi gơnam, biă ñu ră anai lĕ mơnuih mă bruă, tơdah hmâo thơ ta amra pơkra rai gơnam, samơ̆ ră anai glăk kiăng mơnuih mă bruă. Tơdah ƀu djop mơnuih mă bruă thơ khom ĕp abih bang hơdôm anom bruă, sang bruă pơkon djru pô pioh pơhlôm gơnam tui hră rơkâo kiăng blơi”.

Tui hăng tơlơi lăi pơthâo glăi mơ̆ng Anom bơwih brơi kơ bruă mă tơring čar Dak Lak, amăng 3 blan tal sa thun 2024, hmâo rơbêh kơ 50 wot anom, sang bruă gum hrŏm amăng 13 mông jơnum bruă mă yua kơ Anom pơphun hăng tơlơi kiăng ruah rơbêh kơ 7.000 čô mơnuih mă bruă. Anom ăt hmâo lăi pơthâo brơi mơn bruă mă hăng lăi pơthâo bruă mă brơi rơbêh kơ 12.000 wot čô mơnuih, samơ̆ kơnong kơ hmâo 440 čô mơnuih nao mă bruă tơdơi kơ lăi pơthâo. Ăt amăng 3 blan tal sa thun 2024 mơn, Anom hmâo čơkă mă 1.500 pok hră rơkâo čơkă hră pơgang gah rơngiă bruă mă. Tơlơi kiăng ruah mơnuih mă bruă lu, mrô mơnuih čơkă mă hră pơgang gah rơngiă bruă mă đĭ lu samơ̆ akă hmâo tơlơi tô nao rai kơplah wah mơnuih mă bruă hăng anom ruah mơnuih mă bruă, jing tơlơi akă gal glăk hmâo ƀơi Dak Lak. Pơblang kơ tơlơi anai, ơi Nguyễn Văn Cường, Kơ-iăng Khua Anom bơwih brơi kơ bruă mă tơring čar Dak Lak brơi thâo:

 “Lu mơnuih mă bruă glăi čơkă mă hră pơgang gah rơngiă bruă mă, bôh than phun lĕ čơkă mă prăk djru hlâo, tơdơi kơ anun mơ̆ng ĕp bruă mă. Sa dua čô gơyut kiăng ĕp bruă mă, khă prăk blan pơhrui glăi ƀơi Dak Lak ƀiă hloh hơdôm bôh tơring čar gah kual dơnung, anun ƀu gan đơi ôh”.

Ơi Nguyễn Quang Thuân, Kơ-iăng Khua Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Dak Lak pơtŏng sit, tơring čar glăk hmâo mrô mơnuih mă bruă lu hăng năng ai ñu 1 klăk 200 rơbâo čô mơnuih amăng hnưr thun mă bruă. Hơdôm thun rơgao Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar hmâo pơtrut kơtang laih bruă pơlir hơbit, pơtô pơhrăm, gum lăi pơthâo, lăi pơthâo bruă mă kơplah wah mơnuih mă bruă hăng anom bơwih ƀong, kơplah wah anom bơwih ƀong hăng hơdôm anih anom pioh tô nao rai tơlơi kiăng hăng tơlơi hmâo. Khă hnun hai, bôh tơhnal akă kah hăng tơlơi čang rơmang ôh. Ơi Thuân lăi lĕ, mơ̆ng tơnap amăng hơduah ĕp mơnuih mă bruă Anom bơwih ƀong khom pơđĭ dlông bôh tŭ yua pioh dưi djă kŏng mơnuih mă bruă.

 “Mơnuih mă bruă kơ sang bruă lu, đa mơnuih mă bruă hmâo hră pơsit bruă mă ăt lu mơn. Tơlơi ƀơi anai lĕ mơnuih mă bruă dưi nao mă bruă kơ anom bơwih ƀong ƀudah ƀu dưi hă tui hluai kơ lu bôh than, amăng anun biă ñu prăk blan, tơlơi hơđong tơlơi hơdip mơnuih mơnam, anih anom mă bruă anun lĕ hơdôm tơlơi mơ̆ anom bruă bơwih ƀong kiăng hmâo tơlơi pơplih phrâo, mơnuih mă bruă ăt kiăng ngă juăt mơn pioh dua bơnah pơbưp nao rai”./.