Lơm yang hrơi trun ƀơi tơkai čư̆ laih, hơdôm apui lơđen pil hrĭp pơ-iă yang hrơi mơng ring bruă ngă bơngač jơlan guai ƀơi să giăm guai Krông Na, tơring glông Buôn Đôn, amra ƀuh rơđah bang mơtăm. Đại úy Y Hán Hwing-Khua grup pơtrut pơsur ană plơi pla, puih kơđông tơhan wai pơgang guai Sêrêpôk, ling tơhan wai pơgang guai tơring čar Dak Lak brơi thâo, hơmâo apui kơđen pơčrang rơđah, ƀing gơñu ăt hơđong pran jua lơm hyu tir mă bruă:

“Mơng hơdôm ring bruă ngă bơngač giăm guai hơmâo dưm truă rôk tui jơlan guai ngă gêh gal brơi ling tơhan amăng puih kơđông lơm hyu tir, pơhlôm rơnuk rơnua. Dua dong, amra tañ ĕp ƀuh ƀing mơnuih ngă soh ƀơi kual giăm guai, mơng anun amra ngă gêh gal amăng bruă wai lăng guai lŏn ia”.

Ring bruă bơngač apui kơđen rôk tui jơlan guai yua puih kơđông tơhan wai pơgang guai Sêrêpôk wai lăng glông giăm 3 km, hơmâo 20 boh apui kơđen pil hrĭp pơ-iă yang hrơi, hơmâo dưm truă giăm gong guai mrô 45 (2), laih dong sa, dua gong đơđet jum dar hăng rôk tui jơlan hyu tir kơ ling tơhan. Ring bruă anai yua Khul hlăk ai tơring čar Dak Lak hăng hơdôm anom bruă djru brơi amăng blan 3 thun anai, ƀrô tal hơdor glăi 65 thun hrơi gru grua ling tơhan wai pơgang guai.

Amai H Giang Niê, Khua khul hlăk ai tơring čar Dak Lak brơi thâo, puih kơđông tơhan Sêrêpôk lĕ anom bruă tal 2 amăng tơring čar hơmâo pok pơhai ring bruă bơngač rôk jơlan guai amăng thun anai. Anai ăt lĕ sa amăng 2 bruă mă phun mơng hlăk ai tơring čar Dak Lak pơphun amăng thun pơplông pioh čơkă tal hơdor glăi 120 thun akŏ pơjing tơring čar Dak Lak.

“Thun anai, ƀing gơmơi gir run dưm truă apui kơđen rơđah bơngač rôk tui jơlan guai giăm 27 km. Truh ră anai, ƀing gơmơi hơmâo jak iâu tơlơi gum djru amăng tơring čar hăng gah rơngiao, ăt hok mơ-ak mơn yua kơ hơmâo tơlơi mut hrŏm mơng ƀing hlăk ai laih dong hơdôm anom bơwih ƀong sĭ mơdrô, hơdôm boh tơring čar ieo gah kiăng ƀing gơmơi dưi ngă tơlơi pơtrun pơsit. Anai lĕ ring bruă kiăng gum hrŏm hăng ling tơhan wai pơgang guai, rĭm gong dưm apui kơđen jing gong pơsit tong guai lŏn ia hing ang kơ dêh čar Việt Nam”.

Thượng tá RahLan Ngân, Kơ-iăng khua tơhan wai pơgang guai tơring čar Dak Lak brơi thâo, hơdôm ring bruă bơngač rôk jơlan guai ƀu djơ̆ kiăng pơdah tơlơi đing nao mơng khul hlăk ai hăng tơhan wai pơgang guai đôč ôh mơ̆ ăt pơgôp pơtô pơblang gru grua ngă hơkrŭ, pơsit tong jơlan guai lŏn ia brơi kơ hlăk ai. Rĭm ring bruă hơmâo tŭ mă, hơdôm anom bruă amra hyu tir na nao, pơkra ming kiăng dưi mă yua klă hloh, sui thun.

“Ƀing gơmơi pơ-ư ang biă mă yua hơmâo tơlơi đing nao mơng khua mua djop gưl. Amăng anun hơmâo khul hlăk ai tơring čar Dak Lak hăng Bình Dương hơmâo djru brơi ƀing gơmơi hơdôm boh apui kơđen dưm truă rôk jơlan guai. Ƀing gơmơi amra mă yua hơdôm boh apui kơđen anai lăp djơ̆ hloh hăng pơhlôm rơnuk rơnua lơm pok pơhai bruă mă hăng pơgôp ngă truh kih hơdôm bruă jao kơđi čar mơng hơdôm anih anom jao brơi tơhan wai pơgang guai tơring čar, ngă tui bruă jao pơ anăp anai”.

Tơring čar Dak Lak hơmâo giăm 73 km jơlan guai, ha guai hăng tơring čar Mondulkiri, dêh čar Kur. Hăng ring bruă bơngač rôk tui jơlan guai yua hlăk ai tơring čar Dak Lak pơphun amăng thun anai, him lăng amra pơhlôm rơđah bơngač ƀơi hơdôm gong gai yua ling tơhan wai pơgang guai tơring čar Dak Lak wai pơgang. Hăng rĭm gong dưm apui kơđen anai, ƀu djơ̆ kơnong ngă gêh gal brơi ƀing apăn bruă, ling tơhan lơm hyu tir wai pơgang rơnuk rơnua đôč ôh mơ̆ ăt pơdah rơđah guai lŏn ia hing ang kơ dêh čar ta./.