Ƀơi anung prăk man pơdong XL01, gah Kơčăo bruă črăn 2 jơlan rơdêh đuăi hmar Khánh Hòa - Buôn Ma Thuột, hơdôm anom bruă hơmâo prăp lui khul ngă bruă hơdeč hmar tui tơlơi pơčrâo “pơ-iă gah rơngiao, hơjan amăng lăm”. Ơi Nguyễn Viết Chung, khua anom bruă man pơkra jơlan mur čur amăng čư̆ Phượng Hoàng, brơi thâo, anom bruă glăk gir man pơkra đah mơ̆ng pơhrua tui kiăng tañ, hơmâo 345 čô kông ñơn, kĭ sư hăng 120 boh măi, rơdêh: “Adai pơ-iă ƀudah hơjan ƀu bơbeč lu đơi ôh kơ bruă man pơkra jơlan mur, kơnong bơbeč kơ bruă pơkra gah rơngiao đôč, anun lĕ tơdrông tơtua hăng jơlan. Hrơi ƀơi thơi adai pơ-iă, gơmơi pơƀut ngă hrơi mlăm mơtăm či ngă bruă đah mơ̆ng tañ giong tui hăng pô tuh pơ alin kiăng. Adơi ayong gir ngă bruă kiăng tañ giong. Bruă kiăng lĕ kơnôl 31/12 amra pơkra giong dua jơlan mur hăng brơi rơdêh nao rai”.

Ăt amăng hrơi mông ngă bruă ječ ameč kiăng tañ giong, gah anung prăk tuh pơ alin XL03, ơi Nguyễn Văn Lê, Kơ-iăng khua git gai anom bruă man pơkra jơlan mur čur amăng Čư̆ Te brơi thâo, anom bruă glăk ngă kaih năng ai 5% pơhmu hăng bruă jao. Kiăng ngă bruă hơdeč hloh, sang bruă bơwih ƀong glăk iâu 500 čô kông ñơn, kĭ sư hrŏm hăng rơbêh 180 boh rơdêh, măi mok, gir jao glăi ring bruă djơ̆ hrơi pơkă: “Ră anai, gơmơi glăk hơmâo rơbêh 150 čô kông ñơn, kĭ sư hơmâo brơi nao djŏp laih măi mok, rơdêh, ƀơi 3 anih mơtăm, anun lĕ pơkra jơlan mut amăng lăm čư̆, tơdrông tơtua hăng jơlan hăng kơdư. Amăng hrơi blan 8 anai, hơmâo angin hơjan, jing gơmơi prăp rơmet, không hơjan lĕ ngă gah rơngiao, hơjan lĕ ngă amăng lăm. Bruă amăng lăm čư̆ hơmâo kah jing 3 ca, gir ngă bruă hơdeč hmar. Jơlan mur gah ieo giong laih, bơ gah hnuă dong lĕ glăk gir pơkra bê tông hăng tuh atur ia mơtuir amăng blan 9 anai”.

Kơčăo bruă črăn 2 jơlan rơdêh đuăi hmar Khánh Hòa - Buôn Ma Thuột hơmâo prăk tun pơ alin rơbêh 10.400 klai, glông ataih 37km, găn nao pơ hơdôm boh să M’Drak, Krông Jing, Čư̆ Pui hăng Ea Kar (tơring čar Dak Lăk), yua Khul wai lăng jơlan rơdêh treng (Ding jum man pơdong) ngă pô tuh pơ alin. Jơlan anai găn nao pơ glai čư̆ glông, dong đĭ, pơđuai trun, hŭi rơhyưt biă mă, hăng 4 jơlan mut amăng čư̆ hăng 38 boh tơdrông gah kơdư. Mông anai, kơčăo bruă ngă kaih 8,15% pơhmu hăng akŏ bruă, kơnong kơ hơmâo rơbêh 86% đôč bruă man pơkra, dưm truă. Kiăng ngă tañ ƀiă, pô gơgrong man pơkra glăk hơmâo 71 khul man pơkra, hơmâo 546 boh măi, rơdêh hăng giăm 1.400 čô kĭ sư, kông ñơn, man pơkra na nao “3 ca, 4 kip”. Ơi Phan Đình Hạc, pô pơ ala mơ̆ng anom bruă pơtô brơi krăo lăng, brơi thâo bruă man pơkra ƀơi anih pơkra XL03 anom bruă gơgrong ngă: “Pô tuh pơ alin črâo bruă kiăo tlôn mơtăm, gơmơi jing anom bruă dŏ krăp lăng na nao, nao lăng pơ anih man pơkra, pơtrut pơsur pô gơgrong bruă. Hăng bruă man pơkra giăm ƀơi Kơčăo bruă črăn 1 hơmâo brơi rơdêh nao rai lăng hlâo laih, bơ khul pơkra jơlan mur amăng lăm Čư̆ Te glăk gir tuh ƀê tông gah rơngiao hăng brơi rơdêh glit atur jơlan, tuh ia mơtuir pơgiong hĭ. Anom bruă gơgrong man pơdong gir brơi rơdêh nao rai lăng hlâo amăng kơnôl 2/9”.

Kơčăo bruă črăn 1 hăng 3 jơlan rơdêh đuăi hmar Khánh Hòa - Buôn Ma Thuột glăk ngă  giong hơdôm bruă tuč rơnuč, gir mă yua amăng blan 9. Tơdah črăn 2 dưi pơhrua hĭ anŏ kaih, abih bang glông jơlan Khánh Hòa- Buôn Ma Thuột amra dưi nao rai amăng rơnuč thun anai, ba yua abih glông jơlan mơ̆ng thun 2027 mơtăm tui hăng tơlơi git gai mơ̆ng Kơnuk kơna./.