Đơ đam tơring čar Kon Tum ră anai hơmâo 35 boh anom ngă hrŏm, grup pơlir hơbit ngă hrŏm, sang bruă sĭ mơdrô hăng giăm 800  hơbô̆ bruă ngă hmua blôk yua kơ khul tơhan hơđăp ngă pô. Hơdôm hơbô̆ bruă anai rông rơmô, rông bê tuh ană yua kơ khul tơhan hơđăp 2 boh tơring glông Ngok Hôi hăng Đăk Glei; hơbô̆ bruă rông rơnŭng pioh sĭ mơdrô, ƀu rông amăng dơlut hlŭ yua khul tơhan hơđăp tơring glông Sa Thầy ngă pô;  hơbô̆ bruă pla phun jrao akha kyâo yua khul tơhan hơđăp tơring glông Tu Mrông ngă pô, hơmâo ba glăi boh tơhnal lu biă mă amăng tơlơi bơwih ƀong huă, laih anun djru kơ hơdôm rơtuh čô tơhan hơđăp hrưn đĭ pơklaih mơ̆ng ƀun rin hơđong kơjăp. Tơhan hơđăp ơi A Tôn, plơi Pu Tá, să Măng Ri, tơring glông Tu Mrông hơmâo đang sâm Ngok Linh hăng rơnoh hơdôm klai prăk, ñu brơi thâo:

“Sang anŏ gơmơi pla sâm Ngok Linh rơbêh 10 thun hăng anai laih. Jing mơnuih amăng khul tơhan hơđăp mơ̆ng plơi, kâo hơmâo pơtô lăi, jak iâu mơnuih ƀôn sang pơđĭ kyar bơwih ƀong huă pioh kơ ană tơcô hrăm hră truh kih.Dua lĕ pơtô lăi, jak iâu mơnuih ƀôn sang ba yua boh thâo ia rơgơi, hơdră pla phun jrao akha kyâo amăng anun phun sâm Ngok Linh kiăng hơmâo pơhrui lu prăk hloh”.

Khul tơhan hơđăp tơring čar Kon Tum hơmâo giăm 19.000 čô ding kơna jơnum ƀơi 111 boh anom bruă, khul tơhan hơđăp amăng 10 boh tơring glông, plơi prong amăng tơring čar. Yua ngă klă bruă “Khul tơhan hơđăp pơdjru nao rai pơhrŏ ƀun rin, bơwih ƀong huă thâo rơgơi”, 5 thun laih rơgao, mrô sang anŏ ƀun rin  amăng khul pơhrŏ ƀun rin hrŏ mơ̆ng 16% trun dŏ 8%. Djop gưl khul tơhan hơđăp ăt hơmâo djru ba ƀing ding kơna amăng khul pơdong 500 boh sang kiăng pơhrua hĭ sa tơ̆i laih anun pơdong phrâo 44 boh sang hơdor tơngia ƀơk brơi kơ ƀing ding kơna tơhan hơđăp.

Đại tá Võ Thành Chín-Khua Khul tơhan hơđăp tơring čar Kon Tum, khua hơđăp anom bruă khua tơhan blah ngă tơring čar Kon Tum, pơdah rai pran jua hơdor bơni na nao kơ Khua mir sir  Hồ Chí Minh, mơnuih akŏ pơjing, pơtô hrăm kah hăng ama kơ ling tơhan blah ngă dêh čar, hơdor glăi kơ khua tơhan krên dên ơi Võ Nguyên Giáp, khua git gai phun ling tơhan mơnuih ƀôn sang Việt Nam. Đại tá Võ Thành Chính brơi thâo, mah ñu glăi pơdơi abih thun bruă laih samơ̆ ñu jing mơnuih apăn bruă ngă khua prong gah ling tơhan anun khom dŏ djă pioh na nao kơnuih pran jua sa čô tơhan rơnuk Wa Hồ:

“Mah tơbiă tơhan laih samơ̆ pran jua sa čô tơhan rơnuk Wa Hô ăt pơčrang bơngač, ngă anŏ pơčrâo jơlan kơ djop bruă mă. Ƀing gơmơi pơyơr pran jua ai hơtai, tơlơi pơmin amăng bruă man pơdong hăng pơgang lŏn ia. Pơtô hrăm kơ ƀing čơđai rơnuk anai thâo khăp kơ lŏn ia, thâo khin hơtai amăng bruă mă ngă hơkrŭ”.

Djă pioh pran jua gru grua tơhan rơnuk Wa Hô, djop gưl rơnuk ƀing tơhan hơđăp tơring čar Kon Tum thâo hluh tong ten hăng lăng bruă mă akŏ pơdong, wai pơgang ping gah, kơnuk kơna, pơgang ba mơnuih ƀôn sang, khom djă bong kơjăp bruă kơđi čar, rơnuk rơnua mơnuih mơnam ƀơi kual plơi pla yơh ba gru hlâo. Hăng pran jua gơgrong ngă tui Hră pơtrun mrô 04 mơ̆ng tơring čar Kon Tum kơ bruă “Ăt pơtrut tui bruă mă akŏ pơdong să tơnap tap pơđĭ kyar amăng rơnuk phrâo”, hăng hơdră ngă bruă “Khul grup ngă bruă pơkrem, djop mơnuih thâo pơkrem”, khul tơhan hơđăp hơmâo djru 2 boh sang anŏ tơnap tap ƀơi plơi Kơtu, să Hơmong, tơring glông Sa Thầy dưi pơklaih mơ̆ng ư̆ rơpa ƀun rin kơjăp. Ră anai, hơbô̆ bruă ăt ngă tui hăng pok pơhai ƀơi plơi Hia 1, să Đak Rơ-ông, tơring glông Tu Mrông tui hăng akŏ bruă mơ̆ng Khul apăn bruă phun ping gah tơring čar Kon Tum.

Ta dưi lăi, bruă ngă mơ̆ng ƀing tơhan hơđăp pơdjru nao rai pơhrŏ ƀun rin, bơwih ƀong huă rơgơi mơ̆ng djop gưl anom bruă pơphun ngă tui tŭ yua, dưi bang bơngač amăng lu bruă mă. Mơ̆ng anun, djru pơđĭ tui tơlơi hơdip mơda hăng pơjing pran kơtang pơtrut pơsur mă bruă hur har, hrưn đĭ pơblih amăng tơlơi pơmin hơdră mă bruă. Rơđah biă mă ñu, hơbô̆ bruă khul tơhan djru hrŏm ngă pơblih pơjeh djuai phun pla, hlô mơnong rông, ba yua anŏ gêh găl, anŏ kơtang mơ̆ng lŏn mơnai glai klô, anŏ gêh găl hơmâo mơnuih mă bruă, djru rơnoh prăk tuh pơ alin ngă hmua. Ding kơna amăng khul tơhan hơđăp hơmâo ba yua boh thâo ia rơgơi phrâo amăng bruă mă, pơkra ming, djă pioh, wai lăng hăng sĭ mơdrô boh troh đang hmua. Truh ră anai, ƀơi tơring čar Kon Tum, hơmâo 1 khul ngă hrŏm mơ̆ng tơhan hơđăp, gơ̆p tơhan ngă hrŏm ngă hmua hăng sĭ mơdrô, 720 blah đang hmua, anih rông hlô mơnong, 11 boh sang bruă ngă hrŏm, 6 grup ngă hrŏm, 12 boh sang bruă yua khul tơhan hơđăp ngă pô, pơsir bruă mă brơi kơ 3 rơbâo 500 čô mơnuih hơmâo prăk blan pơhrui glăi hơđong.