Hlâo adih, črăn jơlan mơ̆ng tơdrông toa Nước Lương nao pơ̆ thôn T6, să Đak Mang, tơring glông Hoài Ân, tơring čar Bình Định ñep biă. Amăng bơyan hơjan, lu anih anom ƀơi črăn hơdră anai ia lip, neh wa nao rai tơnap tơnap. Mơ̆ng ngăn rơnoh rơwang bruă 4 kơ tuh pơplai kơ anih anom mă yua kiăng hloh gah Jơlan hơdră pơkă mơ̆ng Lŏn ia pơđĭ kyar bơwih ƀong – mơnuih mơnam kual neh wa djuai ania ƀiă, kual čư̆ siăng, Jơnum min mơnuih ƀôn sang tơring glông Hoài Ân, tơring čar Binh Định mă yua 2 klai 500 klăk prăk pơkra glăi, pok prong jơlan mơ̆ng tơdrông toa Nước Lương truh pơ̆ thôn T6 hăng jơlan ƀê tông amăng krah thôn amăng să Đak Mang. Ơi Đinh Văn Thanh, mơnuih ƀôn sang să Đak Mang, tơring glông Hoài Ân brơi thâo, jơlan phrâo pơkra glăi, pok prong djru bruă nao rai, dŭ pơgiăng gơnam tam gêh gal hloh:

 “Jơlan ƀê tông phrâo pơkra djru mơnuih ƀôn sang pơgiăng pơdai mơ̆ng hơdôm blah hmua pơdai glăi pơ̆ sang mơnuih ƀôn sang. Jơlan phrâo djru neh wa nao rai pơhlôm bơhmu hăng hơdôm thun hlâo adih”.

  Tơring glông Hoài Ân pơsit tuh pơplai pơkra giong jơlan nao rai lĕ “gai kưl” yôm phăn, djru pơtrut pơđĭ kyar bơwih ƀong – mơnuih mơnam kual tơnap tap, kual asuek, kual ataih. Hơdôm kual rơwang bruă găn nao, neh wa gum hrŏm pơsir anih anom pơkra jơlan. Ơi Nguyễn Xuân Phong, Kơ-iăng Khua Jơnum min mơnuih ƀôn sang tơring glông Hoài Ân, tơring čar Bình Định brơi thâo, tơring glông glăk pơhrua hơdôm jơlan hơdră pơkă mơ̆ng lŏn ia, ngă tui anô̆ gal mơ̆ng tơring glông pơjing bruă ngă đang hmua tui hơdră pơlir hơbit hăng djru pok prong, pơđĭ tui pơlir hơbit anô̆ yôm nao hrŏm hăng bruă sĭ mơdrô gơnam tam:

“Pok pơhai ngă tui rơwang bruă pơđĭ kyar bruă ngă đang hmua kơ kual neh wa djuai ania ƀiă, djru hơdră pơkă, phun pla, hlô rông hăng gơnam mă yua pioh neh wa mă yua hơdôm bôh thâo phrâo măi mok. Hơdôm hơdră ngă đang hmua ba glăi lu gơnam tam hmâo nua prong kơ kual neh wa pioh pơjing tơlơi pơmin hăng tơlơi thâo amăng bruă pơđĭ tui anô̆ klă gơnam mă mơ̆ng đang hmua ƀơi rim anih anom kual lŏn hăng rim djuai gơnam tam. Mơ̆ng anun, đĭ tui prăk pơhrui glăi, pơđĭ kyar bơwih ƀong sang anô̆, hrŏ trun mrô sang anô̆ ƀun rin ƀơi tơring glông”.

Thun 2024, kơčăo bruă ngăn rơnoh ngă tui Jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng tơring čar Bình Định rơbêh kơ 412 klai prăk. Truh lơ 31/5, hơdôm anih anom mơ̆ng tơring čar Bình Định hmâo pơsir brơi rơbêh kơ 50,7 klai prăk, dưm dưm hăng 12,3%. Lơm pok pơhai hơdôm rơwang bruă, rơwang bruă anet gah Jơlan hơdră anai ăt dô̆ mơn sa dua tơlơi tơnap.

Jơnum min mơnuih ƀôn sang tơring čar Bình Định djă pioh dong hơdôm Grŭp hyu mă bruă pơlir gơnong bruă mơ̆ng tơring čar pơphun pel ĕp, lăng tui bôh tơhnal ngă tui hăng pơtrut, pơtô brơi, pơtlaih hơdôm tơlơi dô̆ đôm, dô̆ gun lơm pok pơhai hơdôm rơwang bruă mơ̆ng Jơlan hơdră pơkă mơ̆ng dêh čar. Ơi Đinh Văn Lung, Khua Grŭp djuai ania tơring čar Bình Định brơi thâo, anom rơkâo hơdôm tơring glông, plơi prong đing nao bruă lăi pơhing, pơtrut tañ bruă ngă tui hơdôm rơwang bruă, rơwang bruă anet mơ̆ng jơlan hơdră pơkă mơ̆ng lŏn ia pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng:

 “Lu hơdră bruă gum djru, yua anun lĕ hơdôm mơnuih ngă tui bruă lăi pơhing khom thâo. Dua lĕ khom hmâo lu khul grŭp, lu gơnong bruă bơdjơ̆ nao hơdôm bruă jao anai pioh lăi pơhing kơ mơnuih ƀôn sang mơ̆ng thâo hluh. Jơlan hơdră lu gưl ping gah ăt hmâo laih tơlơi klă hloh, hmâo tơlơi gơgrong hloh amăng bruă lăi pơhing pơsur pioh ngă hiưm hơpă neh wa dưi čơkă mă jơlan hơdră anai, ba glăi tơlơi hơdip mơda klă hloh”./.