Bruă mă hơdor glăi yom amăng mông jơnum hơdor glăi 50 thun pơklaih rơngai kual Dơnung, pơlir truh kih lŏn ia jing sa (lơ 30/4/1975-lơ 30/4/2025), kiăng pơtong rơđah anŏ kơdrưh, boh yom phun hơdră prăp lui kơsung blah dưi kual Dap Kơdư hlăk tal kơsung blah ayăt Mi kiăng rơngai lŏn ia. Ƀơi mông jơnum, ƀing khua mua krên dên gah ling tơhan, ƀing mơnuih rơgơi kơhnâo hăng khua mua djop anom bruă gah Binh đoàn Tây Nguyên, jing anom bruă blung a mơ̆ng Quân đoàn 3, hơmâo pơblang tong ten bruă ngă ba truh tơlơi dưi hĭ lăp  hơdor pioh anai. Mơ̆ng tơlơi git gai djơ̆ lăp ping gah, tơlơi rơgơi kơhnâo git gai, truh pơ hơdră pơblah ling tơhan mơnuih ƀôn sang Việt Nam ta hơmâo ngă ba glăi boh tŭ yua hing ang. 

Mông jơnum anai ƀu kơnong hơdor glăi boh tơhnal khin hơtai kơsung blah hmar đôč ôh, dŏ hơmâo lu tơlơi hrăm yom amăng bruă akŏ pơdong hăng wai pơgang lŏn ia; djru hrŏm prong amăng bruă pơkơdong glăi tơlơi pơmin soh sat pơčeh mă ča kơ bruă mă gru phun lŏn ia; kiăng ngă kơjăp glăi tơlơi đăo kơnang mơ̆ng ană plơi pioh kơ lŏn ia. Laih dơ̆ng, anai lĕ mông gêh găl pioh pơtô hrăm gru grua hơkrŭ, râo pơdưh pran jua pơ ư ang djuai ania hăng tơlơi khăp kơ lŏn ia, biă mă ñu hăng ƀing čơđai rơnuk anai.