Grŭp Ping gah thôn 10A dưi hmâo Ping gah să Ea Kly, tơring glông Krông Pač, tơring čar Dak Lak ruah ngă pơphô hlâo pơdŏng hơdră “Grŭp Ping gah 4 klă”. Kiăo tui anun, grŭp Ping gah khom dưi ngă hơdôm tơhnal ba tơbiă: Ngă giong klă bruă kơđi čar, ngă klă bruă jơnum ping gah, gum hrŏm hơbit klă, ngă tui klă tơlơi pơkă, mơnuih apăn bruă klă, mơnuih ping gah klă. Kiăng dưi ngă tơlơi anai, ơi Trần Ngọc Quang, Khua git gai Ping gah thôn 10A brơi thâo: Ping gah hmâo hluai tui tơlơi hmâo ră anai mơ̆ng plơi pla hăng anô̆ gal mơ̆ng rim mơnuih ping gah jơnum črông lô, tŭ ư hrŏm jao bruă mă rơđah kơ rim čô mơnuih ngă tui. Kơnong kơ 3 blan pok pơhai, bruă mă mơ̆ng grŭp ping gah tui bruă pơkă laih, tơlơi pơmin mơ̆ng mơnuih ping gah dưi pơđĭ tui, ngă tui ba glăi bôh tơhnal bruă git gai kơ pơđĭ kyar bơwih ƀong - mơnuih mơnam mơ̆ng plơi pla.

 “Grŭp ping gah, gưl ping gah jơnum ba tơbiă tơlơi pơtrun pơsit pla bơnga dua bơnah jơlan nao rai pơjing anih anom hiam plơi hiam pla, pơphun dưm truă camera lăng tui ƀơi kual phun. Pơjing brơi neh wa hmâo tơlơi đăo gơnang ƀơi grŭp ping gah ăt kah hăng hơđong pran jua bơwih ƀong huă ngă đang hmua pioh hmâo dong prăk pơhrui glăi, pơplih rơnoh hơdip mơ̆ng neh wa ƀơi plơi pla”.

Ping gah să Ea Sin, tơring glông Krông Ƀuk, tơring čar Dak Lak hmâo 13 grŭp ping gah hăng 150 čô mơnuih ping gah. Tơdơi kơ dưi hmâo Ping gah tơring glông ruah ngă pơphô hlâo hơdră “Grŭp Ping gah 4 klă”, Ping gah să hmâo pơdŏng, mă yua kơčăo bruă, pơphun ngă lơphet pok phun, kĭ pơkôl bơkơtưn pơdŏng “Grŭp Ping gah 4 klă” ƀơi 4 grŭp Ping gah anun lĕ: Grŭp Ping gah khul ling tơhan să ƀuôn Ea Káp, Grŭp Ping gah ƀuôn Ea Kring hăng Grŭp Ping gah ƀuôn Ea Sin. Kiăng djru hơdôm grŭp ping gah ngă klă bruă jao, ơi Vũ Văn Tuấn, Khua git gai Ping gah să Ea Sin, tơring glông Krông Ƀuk, tơring čar Dak Lak brơi thâo: hrŏm hăng bruă pơpha mơnuih amăng gưl ping gah gơgrong bruă, lăng tui, pơtô ba hơdôm grŭp ping gah pok pơhai pơphô hlâo hơdră, Ping gah să hmâo djop anăn mă yua amăng măi čih pioh gah mơnuih ping gah truh rim grŭp ping gah pioh djru pơđĭ tui anô̆ klă bruă jơnum.

 “Ping gah să Ea Sin hmâo pok pơhai anăn mă yua amăng măi čih pioh gah mơnuih ping gah kiăng pơplih bruă pơplih mrô amăng bruă pơdŏng ping gah. Rơgao kơ pok pơhai hmâo ba glăi laih bôh tŭ yua rơđah. Biă ñu kah hăng hơdôm tơlơi lăi pơthâo, klah čun mơ̆ng ping gah, mơ̆ng gưl dlông leng kơ dưi pok pơhai hmao tlôn hơdôm grŭp ping gah. Mơ̆ng anun hơdôm grŭp ping gah pok pơhai truh pơ̆ hơdôm grŭp ping gah pioh lăng tui, ƀu pơdơi pơđĭ tui anô̆ klă bruă jơnum grŭp ping gah ƀơi anih anom amăng bruă pơdŏng grŭp 4 klă”.

Mơ̆ng hrơi ngă pơphô hlâo hơdră “Grŭp Ping gah 4 klă”, 5/5 grŭp ping gah dưi ruah ngă pơphô hlâo hơdră ƀơi Ping gah tơring glông Krông Pač, tơring čar Dak Lak hmâo pơplih bruă bơkơtưn lăp djơ̆ hăng tơlơi hmâo sit mơ̆ng plơi pla, anom bruă. Ơi Trần Quốc Vĩnh, Kơ-iăng Khua git gai Ping gah tơring glông Krông Pač, tơring čar Dak Lak lăi lĕ, mơ̆ng hơdôm bruă mă anai hmâo pơjing laih pran jua bơkơtưn dik dak amăng abih bang Ping gah tơring glông, djru pơđĭ tui bôh thâo git gai, pran bơkơtưn mơ̆ng grŭp ping gah hăng anô̆ kơjăp mă bruă mơ̆ng mơnuih apăn bruă, mơnuih ping gah.

"Lu Grŭp ping gah hmâo tơlơi pơsit laih, čih tơlơi pơtrun pơsit djơ̆ hăng bôh nik mơ̆ng anih anom pô. Dua lĕ pơkĕ bruă gơgrong mơ̆ng mơnuih ping gah, biă ñu lĕ mơnuih apăn akô̆. Yua anun mơ̆ pơpha bruă mă, bruă jao kơ mơnuih apăn bruă, mơnuih ping gah rơđah, djơ̆ hăng bôh nik hmâo. Mơ̆ng anun anô̆ klă amăng jơnum mơ̆ rơđah biă ñu lĕ 4 bôh yôm ƀing gơmơi pok dưi pok phun hmâo glông amăng, akô̆ tlôn hloh".

Kiăng bruă bơkơtưn pơdŏng “Grŭp Ping gah 4 klă”, “Ping gah plơi pla 4 klă” dưi ngă tui na nao, pơjing pran bơkơtưn hur har, sit nik Grŭp mă bruă Ping gah tơring čar Dak Lak hmâo pơphun ngă Lơphet pok phun bruă bơkơtưn amăng abih bang ping gah. 20 khul ping gah găh Ping gah tơring čar Dak Lak hmâo kĭ pơkôl bơkơtưn pơdŏng “Grŭp Ping gah 4 klă”, “Ping gah plơi pla 4 klă” rơwang 2023-2028. Mơ̆ng ră anai, Grŭp apăn bruă hơdôm Khul Ping gah tơring glông, tơring čar, plơi prong hăng hơdôm ping gah găh Ping gah tơring čar čih pơkra kơčăo bruă, pơphun ngă hră bơkơtưn “Grŭp Ping gah 4 klă”, “Grŭp Ping gah plơi 4 klă”. Rim thun mă tŭ tơlơi găn rơgao hăng pơhư prong dong pioh anăp nao jing tơhnal pơkă hrŏm mơ̆ng grŭp ping gah, ping gah plơi. Ơi Y Ƀiêr Niê, Kơ-iăng Khua git gai Ping gah tơring čar Dak Lak brơi thâo:

 “Pơdŏng grŭp Ping gah 4 klă, Ping gah 4 klă anai kơnong kơ phrâo yak blung a samơ̆ ñu ăt jing gru than pioh kơ hơdôm grŭp ping gah, hơdôm grŭp ping gah plơi lăng glăi bruă mă kiăng ngă tui amăng thun 2024 hăng hơdôm thun tô̆ tui”.

Mơ̆ng bôh tơhnal hơdră ngă pơphô hlâo “Grŭp Ping gah 4 klă”, lu anih anom amăng tơring čar Dak Lak glăk amăng ƀrư̆ pơhư prong truh abih bang hơdôm grŭp, khul ping gah. Anai dưi lăng lĕ jơlan gah yôm phăn pioh pơjing tơlơi pơplih kơtang amăng bruă pơđĭ tui bôh thâo git gai, pran kơtang bơkơtưn mơ̆ng khul Ping gah hăng anô̆ klă khul mơnuih apăn bruă, mơnuih ping gah mơ̆ng tơring čar djơ̆ tui tơlơi kiăng bruă mă amăng rơnuk phrâo./.