Ƀơi mông tŭ jum, Khua dêh čar ơi Phạm Minh Chính pơsit Việt Nam lêng kơ lăng yôm tơlơi rô nao rai hăng Hungary, Gŏp ngă hrŏm amăng abih bang bruă mă blung a mơ̆ng Việt Nam ƀơi kual Trung Đông Âu. Khua dêh čar ơi Phạm Minh Chính kiăng dua bơnah pơphun na nao bruă jơnum djŏp gưl, biă ñu jơnum khua mua prong. Khua ding jum pơtom hiăp Szijjárto Péter pơsit Hungary čang rơmang pơtrut tui kơtang hloh tơlơi rô nao rai hăng ngă hrŏm amăng lu bruă mă hăng Việt Nam, gŏp ngă hrŏm yôm mơ̆ng Hungary ƀơi kual Ngŏ Dơnung ASIA.

Lăi nao hơdôm bruă hơmâo ƀơi jar kmar hăng măng kual dua bơnah lăp đing nao, Khua dêh čar ơi Phạm Minh Chính hăng Khua ding jum pơtom hiăp Szijjárto Péter tŭ ư dua boh dêh čar hơmâo lu tơlơi djơ̆ hrŏm amăng bruă pơtom hiăp, kiăng pơbưp lu tui, ngă hrŏm amăng hơdôm mông jơnum lu bơnah, tŭ ư hrŏm hăng tơlơi rơngai, ngă hrŏm hăng đĭ kyar jing jơlan anăp nao hrŏm mơ̆ng rŏng lŏn tơnah, hơdôm tơlơi bơrơsuah khŏm hơmâo pơsir hăng tơlơi rơngai kiăo tui tơlơi phiăn jar kmar, yua kơ tơlơi klă hiam mơ̆ng mơnuih ƀôn sang djŏp djuai ania.