Blan 2/1975, Đại tướng Văn Tiến Dũng, pơ ala kơ Ping gah Khul ling tơhan dêh čar, lăi pơthâo tơlơi pơsit pơjing Ƀirô pơtrun bruă blah ayăt ƀơi Dap Kơdư, hăng Trung tướng Hoàng Minh Thảo ngă Khua pơtrun hăng Đại tá Đặng Vũ Hiệp ngă Khua git gai Ping gah khul ling tơhan. Ding jum kơđi čar pơsit lĕ, Dap Kơdư lĕ anih phun, anih kiăng iâo pơhrui pran kơtang abih bang khul ling tơhan wot gơnam tam hăng pran jua. Hơdôm khul ling tơhan phun hmâo iâo nao pơ̆ kual anai, amăng anun hmâo sư đoàn 320, 316, 968 hăng 10, hrŏm hăng tơlơi gum hrŏm mơ̆ng lu ling tơhan pơkon kah hăng tơhan phao kơnong hăng tơhan rơdêh sar. Anai lĕ khul ling tơhan hur har dưi prăp lui tŏng ten pioh pok pơhai bruă blah ayăt.

Trung tướng, ling tơhan sông kơtang Khuất Duy Tiến, Khua Anom bruă blah ayăt, Bruă blah Dap Kơdư brơi thâo, lơm khul tơhan tlaih rơngai tum pơƀut khul ling tơhan prăp lui kơ bruă kơsung blah ayăt ƀơi Buôn Ma Thuột lĕ, hơdôm gưl git gai mơ̆ng Quân khu 2, Quân đoàn 2 gong gai ngụy Sài Gòn ƀu thâo hơget ôh kơ bruă pơplih tơhan ăt kah hăng anih anom phun mơ̆ng khul tơhan tlaih rơngai. Djop tơlơi đing nao leng kơ pơmin kơ gah Kơdư Dap Kơdư. Lơm mơnuih krâ̆o sŭ Mi nao pơ̆ Sài Gòn thâo tơlơi hling hlang mơ̆ng khul tơhan tlaih rơngai ƀơi wot Kơdư hăng Dơnung Dap Kơdư hmâo tơlơi gum pơhiăp phara amăng bruă pơsit hơƀơi jơlan kơsung blah phun.

“Ƀirô pơtrun bruă blah ayăt pơkă lĕ ayăt dô̆ đing đăo mơn lĕ tơlơi pơtrun brơi kâo čih sa hră pioh ba tơbiă bruă mă. Kâo čih hră lĕ mơ-ĭt kơ hơdôm bôh anom tơhan sư đoàn 10, sư đoàn 320, hơdôm khul tơhan lĕ ayăt hmâo ƀing ta leč pơdar kơsung blah ƀơi Buôn Ma Thuột hăng Dơnung Dap Kơdư yua anun ƀing ta hmâo ba laih khul tơhan nao pioh hơduah ĕp lăng khul ling tơhan ƀing ta, anun hơdôm bôh anom bruă khom tañ prăp lui djop mơta tui kơčăo bruă kơsung nao”.

Ngă tui tơlơi črâo ba mơ̆ng dêh čar: “Khom ngă đing đăo lu pioh ngă brơi kơ ayăt đing nao bruă pơgang gah kơdư Dap Kơdư”, pơhlôm hlâo bruă blah B3 pơjing kơčăo bruă đing đăo, amăng anun pơsit rơđah: Bruă jao mơ̆ng tơlơi đing đăo lĕ djă kŏng tơkai, tơtăng ba tơhan phun Quân đoàn 2 ayăt ƀơi Plei Ku hăng Kon Tum, ƀu brơi gơñu gơgrong hlâo nao pơ̆ Đức Lập, Gia Nghĩa, Thuần Mẫn. Kiăo tui anun ta hmâo ba sư đoàn 968 mơ̆ng Dơnung dêh čar Lao rai pơ ala kơ sư đoàn 320 hăng sư đoàn 10. Pioh glăi abih bang telephone, brô̆, grŭp lăi pơhing 15W, hơdôm măi mok lăi pơhing yôm phăn pơkon hăng jơlan lăi pơhing, pha hyu dong hơdôm tơlơi lăi pơhing glăi hăng tơlơi pơtrun ngă mă ƀlor kah hăng glăk mă bruă tui tơđar mơn, khul tơhan 2 sư đoàn hơgom gơgrong tañ nao gah Dơnung Dap Kơdư. Sư đoàn 968 amra kơtưn pơ-anah raih, phao pơ-anah pơsuh, pơgiăng gơnam ƀong huă, put phao ngă anih dưm phao kơnong hăng anih jưh ngă mă. Ơi Nguyễn Hữu Mai, mă bruă kơđi čar tiểu đoàn 4, trung đoàn 29, sư đoàn 968 ruai glăi:

“Lơm anun bruă jao mơ̆ng sư đoàn 968 lĕ blah ƀơi Gia Lai, Kon Tum. Ta brơi ling tơhan nao, ăt hmâo anih hơgom mơn, anih dop, anih lăi pơdah mơn pioh ayăt thâo, ñu pơmin lĕ blah anun ñu tum pơƀut nao ba tơhan nao”.

Hrŏm hăng hơdră ngă đing đăo, bruă blah ayăt tañ, blah dô̆ kơtuă, blah kiăng ayăt ƀu hmao kơdŏng glăi ăt dưi mă yua khut khăt mơn amăng bruă blah ayăt ƀơi Dap Kơdư. Tui hăng Trung tướng Đoàn Sinh Hưởng, Ling tơhan sông kơtang mơnuih ƀôn sang, Khua hơđăp pơtrun bruă Quân khu 4, lơm gum hrŏm bruă blah ayăt ƀơi Dap Kơdư, mông kơsung blah Buôn Ma Thuột, khul ling tơhan ta pơphun khul tơhan blah ƀơi 3 jơlan hăng 5 glông kơsung nao:

“2 mông mơguah lơ 10/3 rơdêh sar dưi pok phun, hmâo hơdôm črăn jơlan ƀing gơmơi khom uă lui kyâo hlâo pioh rơdêh sar dơnuh tơglưh pơnăng jơlan nao, yua kơ ƀu dưi pơkra jơlan lui hlâo ôh. Ƀrô krep 5h30 mơnit mơguah lĕ rơdêh sar nao truh. Anai lĕ jơlan nao blah mut dơlăm yua kơ Jơnum min pơphun hmâo 1 tiểu đoàn ba nao dong, 1 tiểu đoàn ƀơi rŏng lŏn, 1 đại đội rơdêh sar hăng 1 đại đội K63 tui anun, anai lĕ jơlan blah mut dơlăm blah mơ̆ng Yŭ nao blah hơtut tơpă amăng sư bộ 43. Anai lĕ hơdră blah mơ̆ tơdơi anai ơi Hoàng Minh Thảo lăi lĕ anai hơdră blah bluh bơnga amăng krah pran ayăt”.

Amăng bruă blah ayăt ƀơi Dap Kơdư, Ding jum kơđi čar pơsit ruah anăp nao Dơnung Dap Kơdư hăng Buôn Ma Thuột lĕ anih kơsung blah phun hmâo pơjing laih anih blah ngă kơtuă abih bang hăng tơhan Ngụy Sài Gòn. Hơdôm mơnuih krâ̆o sŭ CIA ƀơi kual Dơnung ƀu pơmin ôh, ling tơhan ta pok bruă blah nao Dap Kơdư hăng tal blah pok phun Buôn Ma Thuột. Ƀing ta hmâo hlâo sa bruă blah đing đăo, ling tơhan đing đăo mơ̆ng khul ling tơhan, ling tơhan đing đăo mơ̆ng tơlơi pơhing pôr, tơhan đing đăo mơ̆ng hơdôm khul mă bruă, ling tơhan đing đăo kơdong blah phun mơ̆ng ƀing ta mơ̆ng kơdư Dap Kơdư nao gah Dơnung Dap Kơdư hăng ling tơhan đing đăo wot amăng bruă prăp lui anih blah, prăp lui kơ bruă kơsung blah Buôn Ma Thuột. Trung tướng Nguyễn Thanh Tuấn, Khua hơđăp Anom Pơhrăm bruă tơhan, Phun akha Anom bruă kơđi čar Khul ling tơhan Việt Nam brơi thâo:

“Hăng ƀing ta, amăng bruă blah ngă phun Dap Kơdư amra dưi tlaih rơngai kual Dơnung pơlir hơbit Lŏn ia. Yua anun bruă blah ayăt kual Dap Kơdư truh kih, Buôn Ma Thuột tlaih rơngai pơjing pran kơtang ƀơi anih blah. Tơlơi yôm phăn ƀu hmao thâo hơdôm hơpă, ayăt jai bral nghal hơdôm anun. Mơ̆ng tơlơi kơtuă anun ngă tơglưh pran jua mơ̆ng sa khul tơhan prong mơ̆ng tơhan Ngụy Sài Gòn hăng anom bruă pơđar bruă ayăt. Tlaih rơngai Dap Kơdư ngă gal brơi pioh ƀing ta pơgăn bruă blah ƀơi kual dơnung dêh čar Việt Nam, pok phun kơ bruă Kơsung blah tơgŭ hơkrŭ abih bang”.

Hơdră ngă đing đăo amăng bruă blah ayăt ƀơi Dap Kơdư jing sa truh kih tơtar hyu djop dêh, djru tlaih rơngai hrŏm mơ̆ng Lŏn ia Kơsung blah abih bang hăng tơgŭ hơkrŭ bơyan bơnga thun 1975. Tơlơi thâo pơčeh amăng bruă ngă đing đăo blah wang, tơlơi gum hrŏm lăp djơ̆ kơplah wah hơdôm khul ling tơhan hăng pran pơsit tlaih rơngai kual Dơnung dêh car hmâo ba laih bruă blah ayăt ƀơi Dap Kơdư jing gru grua djă pioh kah hăng sa bruă tlaih rơngai prong prin./.