Tơring čar Dak Lăk hơmâo čơkă rơbêh  5,33 klăk wơ̆t tuai, rơbêh kơ 56% akŏ bruă amăng thun, đĭ rơbêh 37% pơhmu hăng thun hlâo. Prăk pơhrui glăi him hơmâo 9.600 klai prăk, đĭ giăm 38% pơhmu hăng 6 blan akŏ thun hlâo. Dak Lăk ngă giong laih hră rơkâo kơ UNESCO čih anăn “Tơlơi rơgơi pla hăng pơkra kơphê”, čih hră pơ-ar gru yom đưm “Ngă yang pin ia mơ̆ng djuai ania Êđê”, laih dong pơtrun hơdră djru pơgang hăng pơtrut tui anŏ yom atông čing rơwang thun 2026-2030. Ră anai tơring čar glăk pơƀut pok pơhai hơdôm bruă mơ̆ng Akŏ bruă đĭ kyar čơkă tuai thun 2026-2030, prăp rơmet Jơnum ngui sâu riêng Dak Lăk thun 2026, laih dong pơtrut đĭ kyar gơnam bơwih brơi bruă čơkă tuai phrâo, mă yua boh thâo mrô, akŏ pơjing anăn čơkă tuai hmư̆ hing hăng pơđĭ tui tơlơi rơgơi mơnuih mă bruă čơkă tuai đah mơ̆ng gum pơgôp rơnoh đĭ kyar 2 mrô.

Ngă tui bruă pơphun Thun tuai hyu ngui gưl dêh čar 2026 hăng akŏ bruă “Lŏn glai čư̆ siăng sô̆ hăng ia rơsĭ jơngeh”, amăng 6 blan laih rơgao, đơ đam tơring čar Gia Lai hơmâo čơkă 8,75 klăk wơ̆t tuai, đĭ tui 19% pơkă hăng tal anai thun hlâo.Rơnoh prăk pơhrui glăi mơ̆ng bruă tuai hyu ngui truh 19.000 klai. Lăp đing nao biă mă ñu, tuai mơ̆ng jar kmar hơmâo truh 80%, ƀuh rơđah anŏ tŭ yua mơ̆ng bruă čơkă tuai yua hơmâo pôr pơthâo, jak iâu pơ dêh čar Hàn Quốc, Philippines hăng Australia. Lu anih tuai hyu ngui amăng tơring čar, dưi hơmâo jar kmar bơni biă mă, amăng anun Quy Nhơn akŏ pơjing bruă tuai hyu ngui anăn Lonely Planet ruah amăng Top 25 bit anih pơhưč hyu ngui kual ia rơsĭ lu hloh thun 2026. Kiăo tui hnơ̆ng ngă anai, Gia Lai pơkă tơhnal či ngă truh thun 2030 čơkă 18.5 klăk wơ̆t tuai, prăk pơhrui glăi 35.000 klai rim thun.

Kiăng dưi ngă djơ̆ tơhnal pơkă anai, tơring čar hlăk pơtum pơhưč ƀing ngă bruă mơdrô pok pơhai bruă mă yom hloh hơdră čơkă tuai; laih dơ̆ng ngă tui hơdră anăn 3K-3A, iâu pơthưr rim čô mơnuih ƀôn sang jing mơnuih ngă bruă čơkă tuai soh, kah hăng ƀu hơdui pơgô̆ ƀing tuai ôh, ƀu pơđĭ trun nua gơnam sĭ mơdrô, mơnong ƀong huă, anih dŏ, ƀu phai djah djâo tă tăn-rơnuk rơnua, pơhiăp rơhmač mơak hăng tuai kiăng kơđŏm glăi tơlơi hiam mơak hăng ƀing tuai rơnguai.