Tui hăng rơnoh ling pơkă hnong anai, tơring čar Dak Lak yap mơ̆ng thun 2021-2030, lăng nao pơ anăp adih truh thun 2050, plơi prong Ƀuôn Hô jing plơi prong hiam rơ-ơ̆ kyâo pơtâo hlom bom, anih phun kual Dap Kơdư. Anai lĕ anih jưh hăng tơkuh nao rai djop jơlan mơ̆ng yŭ ngŏ, dơnung kơdư amăng kual plah wah Dap Kơdư, kual treng hang ia rơsĭ tong krah dêh čar, dơnung tong krah hăng kual gah ngŏ kơdư dêh čar Kur.

Mơ̆ng mrô ling pơkă anun, Jơnum min mơnuih ƀôn sang plơi prong Ƀuôn Hô hơmâo čih pơkra, rek ling pơkă hnong plơi prong Ƀuôn Hô truh thun 2045 hăng dưi hơmâo Jơnum min mơnuih ƀôn sang tơring čar pơsit tŭ ư laih. Tơhnal pơkă anăp nao man pơdong hăng pơđĭ kyar plơi prong Ƀuôn Hô jing anih anom phun kơđi čar, bơwih ƀong huă, gru grua, boh thâo ia rơgơi hăng tuai čuă ngui gah kual kơdư tơring čar Dak Lak. Bruă pơkă hnong rek ling hlâo anai ƀu kơnong jing atur pioh ngă tui tơlơi phiăn pơkă yôm bruă wai lăng, tuh pơ alin man pơdong plơi prong đôč ôh, dŏ jing sa bruă mă yôm amăng bruă man pơdong hăng pơđĭ kyar plơi prong; ngă pran kơtang, anŏ gêh găl brơi plơi prong Ƀuôn Hô tơgŭ đĭ man pơdong hăng ba yua tơlơi gêh găl, pơhưč đut tơhnal bruă tuh pơ alin mơ̆ng gah rơngiao djru pơđĭ kyar plơi prong.