Ƀơi mông jơnum, hơmâo 110 phun kyâo giăr pơprong mơ̆ng 12-15 cm, dlông 5 met ba pla ƀơi akiăng treng jơlan nao rai Yŭ Ngŏ, phường Tự An, plơi prong Ƀuôn Ma Thuôt. Ơi Trần Đức Nhật, Kơ-iăng Khua jơnum min mơnuih ƀôn sang plơi prong Ƀuôn Ma Thuôt brơi thâo, plơi prong Ƀuôn Ma Thuôt lĕ sa amăng hơdôm plơi prong hơmâo lu hnong kyâo tơ-ui, đah than prong hla kơpal amăng dêh čar, hnong tơ-ui rơbêh 8,27 met karê pơkă hăng rĭm čô mơnuih amăng plơi prong hăng amăng lăm plơi prong lĕ 17, 21 met karê sa čô mơnuih.

Ngă tui bruă jak iâu pla 1 klai phun kyâo mơ̆ng kơnuk kơna pơtrun, thun hlâo plơi prong Ƀuôn Ma Thuôt hơmâo pla laih 29.000 phun kyâo tơ-ui djop mơta. Ƀuôn Ma Thuôt kơtưn kiăng truh thun 2030 amra jing plơi prong hơmâo lu kyâo mơtah mơda hiam, rơ-ơ̆, plơi prong  rơgơi hăng djă pioh gru grua hiam djuai ania.