Giăm rơbêh 10 thun laih, samơ̆ yă Ngô Thị Minh (55 thun), dŏ ƀơi phường Tân Lập, plơi prong Buôn Ma Thuột ăt ƀlĕ ia mơta mơn lơ̆m bơră ruai lăi nao hrơi mông ñu bưp tơlơi truh sat hlâo adih. Ñu lĕ kông nhơn Kông ti TNHH wai lăng anih hơdip jum dar Đông Phương, lơ̆m glăk kih rơmet rok jơlan 3 mông mơguah, laih anun ñu rơdêh jrŏm. Tơdơi anun yă Ngô Thị Minh rơngiă hĭ dua ƀĕ tơkai, mrô rơka rơkač 98%.

“Ră anai tơdah kiăng ngă bruă hơget thơ ăt dŏ kơnong hăng rơdêh trut hyu đôč mơ̆ ding dŏ ăt ƀu sui đơi lơi, kơnong 2 mông amra gah mơtăm yơh. Đa ƀuh kơtư̆ amăng drơi jăn ăt ƀu anăm eñ lơi. Ră anai hơdôm ară ƀơi tơkai tơ̆i abih laih, lu wŏt nao pơjrao pơ sang ia jrao, ƀing gơñu lăi ƀu dưi ngă hiưm pă ôh, mơñum jrao plai ƀiă ruă ăt ƀu dưi lơi, kơnong gir run kiăng găn rơgao hrơi mông ruă kă đôč”.

Ăt rơka rơkač 98% tơdơi kơ bưp tơlơi truh lơm glăk mă bruă thun 2004 yua boh pơtuh đôh lơ̆m čuk pơkra jơlan, ơi Võ Thanh Tùng dŏ ƀơi phường Tân Tiến, plơi prong Buôn Ma Thuột, hlâo anun ngă kông nhơn man pơkra jơlan glông gah gơnong bruă wai lăng jơlan glông tơring čar Dak Lak brơi thâo, kiăng dưi hơdip truh ră anai, ñu ăt găn rơgao lu wŏt breh pơjrao hăng rơbêh 100 ară sĭ ƀơi akŏ. Tơlơi hning rơngŏt hloh tơdơi kơ ha thun ruă kă, bơnai ñu ăt rơngiă mơn. Kiăng kơ hơmâo prăk kak, ană ñu ăt pok anih sĭ gơnam anet amăng sang dŏ apah, bơ ñu pô bưng băi hrăm thâo bruă peč brơi mơnuih ruă gah:

“Lơm hơmâo gong gai đing nao brơi nao pơ Hà Nội hrăm bruă peč brơi mơnuih ruă gah, ñu ăt hơmâo dong prăk pơhrui. Ră anai dŏ hơdip hrŏm hăng ană ñu, sang dŏ ăt duh prăk rĭm blan mơn, laih dong ƀu-ai buai, lơm ayuh hyiăng pơplih ăt ruă biă mă mơn”.

Tui lăi pơthâo mơng gơnong bruă mă, tơhan rơka hăng mơnuih mơnam tơring čar Dak Lak, ră anai đơ đam tơring čar hơmâo rơbêh 12.000 anih, anom mă bruă hơmâo čih anăn bơwih ƀong sĭ mơdrô hăng giăm 120.000 čô mơnuih. Lu hloh anom bơwih ƀong sĭ mơdrô amăng tơring čar gap ƀrô hăng anet đôč, kơnong amăng bruă sĭ mơdrô, bơwih bơwang, pơkra pơjing gơnam tam…

Ơi Nguyễn Quang Thuân, kơ-iăng khua gơnong bruă mă, tơhan rơka hăng mơnuih mơnam tơring čar Dak Lak brơi thâo, hơdôm thun giăm anai, bruă pơhlôm rơnuk rơnua, agaih rơnăk amăng bruă mă ƀơi anom bơwih ƀong sĭ mơdrô hơmâo đing nao, ăt pơhlôm brơi tơlơi gêh gal mă bruă rĭm hrơi. Samơ̆ ăt amuñ bưp tơlơi truh sat mơn. Jŭ yap kơnong amăng thun 2022 amăng tơring čar ƀuh 7 wŏt mơnuih mă bruă bưp tơlơi truh sat ngă djai 7 čô mơn.

Kiăng kơ plai ƀiă bưp tơlơi sat lơm mă bruă, Jơnum min mơnuih ƀon sang tơring čar Dak Lak hơmâo ba tơbiă akŏ bruă ngă tui jơlan hơdră pơhlôm rơnuk rơnua, agaih rơnăk anih mă bruă rơwang thun 2021-2025. Gir run truh thun 2025, dưm dưm rĭm thun hrŏ trun 4% mrô mơnuih bưp tơlơi truh sat ngă djai mơnuih; đĭ tui dong 5% mrô mơnuih mă bruă dưi khăm pơjrao hăng 5% mrô anih anom pơhlôm agaih rơnăk ƀơi anih mă bruă…Ơi Nguyễn Quang Thuân brơi thâo:

“Kơ hơdră bruă tong ten, blung hlâo kơtưn amăng bruă pơtô pơblang, rơngiao kơ bruă črâo ba amăng pano, áp phích, ba hyu hră pơ-ar kiăng pơtrut pơphun pơtop hrăm brơi mơnuih mă bruă hăng anih anom mă bruă; dua dong lĕ pel ĕp glăi hơdôm tơlơi pơkă amăng bruă mă ƀơi hơdôm anih anom amuñ bưp tơlơi truh sat, amăng anun đing nao bruă pơkra pơjing gơnam sĭ mơdrô, man pơdong kiăng hơmâo akŏ bruă tong ten kiăng pơhlôm hrŏ ƀiă bưp tơlơi sat; pok pơhai hơdôm bruă hăng ngă gêh gal brơi mơnuih mă bruă anun lĕ wai lăng anih anom mă bruă kiăng pơhlôm rô nao rai hơđong kjăp”.

Djop tơlơi truh sat lơm mă bruă hăng tơlơi ruă kă bơbeč mơng anih anom mă bruă kiăng pơgang hĭ tơdah anih anom mă bruă kiăng đing nao bruă ngă gêh gal ƀơi anih mă bruă, anih amuñ hơmâo tơlơi sat, hăng abih bang mơnuih mă bruă kiăng ngă tui tơlơi pơkă, hơdră pơhlôm rơnuk rơnua. Kiăng kơ dưi ngă tui anai, wŏt mơnuih mă bruă hăng anih anom mă bruă kiăng thâo rơđah kơ hơdôm tơlơi amuñ ba truh tơlơi sat kah hăng ngă hiưm pă kiăng plai ƀiă bưp tơlơi sat hluai tui bruă pel ĕp, sem lăng hơdôm anŏ hŭi rơhyưt, ngă sat ƀơi anih mă bruă, ngă tui klă bruă pơtô hrăm, črâo ba, ngă tui bruă pơhlôm rơnuk rơnua, agaih rơnăk ƀơi anih mă bruă./.