Akŏ bruă anai tuh pơ alin man pơkra jơlan rơdêh đuăi hmar Tân Phú-Bảo Lộc glông giăm 66 km, amăng anun 11 km găn nao tơring glông Tân Phú, tơring čar Đồng Nai hăng 55 km gah tơring čar Lâm Đồng. Hrŏm hăng ară jơlan Tân Phú-Bảo Lộc, Jơnum min mơnuih ƀon sang tơring čar Lâm Đồng ăt glăk pơtrut kơtang bruă pok pơhai man pơkra jơlan rơdêh đuăi hmar pơkuh nao rai Bảo Lộc - Liên Khương glông 74 km, jơlan anai prong 4 bơnah, hăng abih tih rơnoh prăk tuh pơ alin him lăng lĕ 19.521 klai prăk.

Hơdôm ară jơlan Tân Phú-Bảo Lộc hăng Bảo Lộc-Liên Khương lĕ ară jơlan tô nao rai, ngă gêh gal bruă pơdŭ pơgiăng gơnam mơng tơring čar Lâm Đồng nao pơ ƀôn prong Hồ Chí Minh hăng hơdôm boh tơring čar kual Dơnung. Lơ̆m ară jơlan anai pơgiong amra pơtrut bơwih ƀong huă -mơnuih mơnam ƀơi Lâm Đồng hăng hơdôm boh tơring čar amăng kual pơđĭ kyar.