Kơčăo bruă tuh pơ alin man pơkra jơlan rơdêh đuăi hmar Tân Phú - Bảo Lộc glông năng ai ñu 66 km, amăng anun 11km găn nao pơ tơring glông Tân Phú, tơring čar Đồng Nai hăng 55km gah tơring čar Lâm Đồng. Kơčăo bruă hơmâo prăk pioh pơkra lĕ 17.200 klai prăk, amăng anun prăk dêh čar ta brơi 6.500 klai prăk (prăk mơng kơnuk kơna 2.000 klai, prăk mơng tơring čar Lâm Đồng 4.500 klai), prăk mơng pô gơgrong tuh pơ alin 1.605 klai, dŏ glăi lĕ prăk iâu pơthưr abih bang mơnuih ƀon sang djru.

Anai jing kơčăo bruă grup A yua Jơnum min mơnuih ƀon sang tơring čar Lâm Đồng ngă anom bruă kơnuk kơna dưi pơkra hăng Anom bruă tuh pơ alin rơkâo ngă lĕ Khul pơlir hơbit yua Grup bơwih ƀong Đèo Cả ngă pô pơ ala gơgrong brơi. Črăn blung a, jơlan anai rơhaih 17m, hơmao 4 glông rơdêh đuăi, hơmâo dưm dăp anih rơdêh dŏ lơ̆m hơmâo bruă ječ ameč ƀu , hrơi mông pơkra giong amăng thun 2026. Črăn dua amra tuh pơ alin pơkra giong hlao jơlan rơdêh đuăi hmar, jơlan rơhaih 22m, hơmâo 4 glông rơdêh đuăi, hăng 2 glông jơlan rơdêh dŏ lơ̆m hơmâo bruă ječ ameč, him lăng pơphun ngă tơdơi kơ thun 2035.

Ơi Lê Quỳnh Mai, Kơ-iăng khua git gai Grup bơwih ƀong Đèo Cả brơi thâo, Jơnum min mơnuih ƀon sang tơring čar Lâm Đồng hơmâo jao kơ anom bruă hơduah ĕp, sem lăng čih hră lăi pơthâo glăi bruă kơsem min dưi ngă hăng bruă anai glăk hơmâo ngă pơgiong tañ. Glông jơlan anăp nao, hơdôm anih tơkuh nao rai, jơlan luh, jơlan pơƀut hơdôm glông jơlan pơkŏn hlâo či nao pơ jơlan prong...ƀơi jơlan rơdêh đuăi hmar hơmâo tŭ ư hrŏm laih. Ơi Lê Quỳnh Mai lăi:

“Amăng blan 7/2023 Grup Đèo Cả amra lăi pơthâo hăng Jơnum min mơnuih ƀon sang tơring čar Lâm Đồng lăi pơthâo bruă kơsem min lơ̆m hơmâo ngă giong. Giong mơng anun Jơnum min mơnuih ƀon sang tơring čar Lâm Đồng mơ-it nao pơ Ding jum jơlan glông pơdŭ pơgiăng hăng Khul pơtŏng pơsit glăi mơng hơdôm anom bruă đah mơng pơtŏng glăi. Ăt čang rơmang truh blan 9/2023, amra ngă giong bruă pơtŏng glăi, kiăng Jơnum min mơnuih ƀon sang tơring čar Lâm Đồng sit nik pơsit brơi kơčăo bruă hăng pơphun pơkra”.

Hrŏm hăng jơlan rơdêh đuăi hmar Tân Phú - Bảo Lộc, Jơnum min mơnuih ƀon sang tơring čar Lâm Đồng ăt glăk pơtrut bruă pơkra jơlan rơdêh đuăi hmar pơtruh nao rai Bảo Lộc - Liên Khương glông 74km, hơmâo 4 glông jơlan, prăk tuh pơ alin him lăng hơmâo 19.521 klai prăk. Amăng anun, prăk Kơnuk kơna djru rơbêh 7.760 klai prăk, ƀing gơgrong tuh pơ alin 11.760 klai prăk, dŏ glăi hơmâo iâu pơthưr mơng pơkŏn pơčruh brơi. Ơi Hoàng Việt Lâm, Kơ-iăng khua gơnong bruă man pơphô hăng tuh pơ alin Lâm Đồng brơi thâo, jơlan rơdêh đuăi hmar anai glăk hơmâo pơkra ječ ameč ngă giong hră pơ-ar, đah mơng tañ tuh pơ alin man pơkra.

“Phara hăng kơčăo bruă jơlan rơdêh đuăi hmar Tân Phú - Bảo Lộc, jơlan rơdêh đuăi hmar Bảo Lộc - Liên Khương jing kơčăo bruă dong amăng tơring čar Lâm Đồng mơtăm. Anun jing anom dưi pơsit lĕ Jơnum min mơnuih ƀon sang tơring čar Lâm Đồng hăng anom bruă dưi pơsit tuh pơ alin lĕ Jơnum min pơ ala mơnuih ƀon sang tơring čar Lâm Đồng. Ră anai kơčăo bruă anai glăk hơmâo čih pơkra hră pơ-ar kơsem min tơlơi dưi pơkra”.

Kơčăo bruă jơlan rơdêh đuăi hmar Tân Phú - Bảo Lộc hăng Bảo Lộc - Liên Khương jing jơlan nao rai phun, pơtruh nao rai jơlan mơng tơring čar Lâm Đồng hăng ƀon prong Hồ Chí Minh hăng hơdôm boh tơring čar gah Dơnung. Lơ̆m hơdôm glông jơlan anai hơmâo pơkra giong amra pơtrut bơwih ƀong huă mơnuih mơnam mơng Lâm Đồng hăng hơdôm boh tơring čar amăng kual pơđĭ kyar hloh./.