Yang hrơi mơguah tong krah blan klâo kual Dap Kơdư, ƀơi yŭ phun kyâo, lan sang hră gưl 2 Ngô Mây, să Ea M’droh, tơring glông Čư̆ M’gar, Dak Lăk, hao hač lơ̆m rơdêh anih pơđok hră nao truh pơ ƀing čơđai. Ƀơi anai, hrŏm hăng bruă pơđok hră tơlơi pơhing, hơduah ĕp internet, ƀing čơđai ăt ngă lu bruă ngui ngor,...Hor kơ tơlơi hrăm we rup, adơi Triệu Yến Nhi, djuai ania Dao, hrăm anih 6A, hmao tlôn dong tah ĕp ƀuh hơdrôm hră we rup mơng ƀing juăt bruă we rup hiam hmư̆ hing hloh ƀơi rŏng lŏn tơnah:

“Kâo lăng hră anai klă laih anun pơđok ñu pơhưč biă, kơ tơlơi thâo rơgơi ngê̆ thuâ̆t, we rup hăng lu tơlơi pơkŏn dong. Kâo kiăng tơdơi anai jing sa čô mơnuih rơgơi bruă we rup kar hăng Van Goh. Tơdơi kơ pơđok hră, ngui hrŏm ƀing gŏp sang hră, kâo lăng mơ-ak biă, ñu ba glăi lu tơlơi ta dưi pơčeh mă”.

Bơ ƀơi sang hră gưl 2 Lê Hồng Phong, să Ea Nam, tơring glông Ea H’leo, anai jing tal dua rơdêh pioh hră ba nao tơlơi hok mơ-ak kơ ƀing čơđai. Adơi Nguyễn Thảo My, hrăm anih 9A4 hok kơdok lăi:

Kâo ngui hrŏm tơlơi ngui yua bing ayong ƀing amai pơphun laih anun ngui pơkra glăi gơnam djah yua hăng ƀing adơi hrăm anih 6, anih 7 laih anun pơđok hră hrŏm hăng gơyut gơyâo. Tơdơi anai kâo amuaih ngă pô dăp hră pơhing. Bruă pơđok hră amra djru ta thâo lu tơlơi hloh, biă ñu lơ̆m ta čih tơlơi văn ta dưi hla tui hơdôm tơlơi čih amăng anun.

Hơmâo thâo rơdêh pơđok hră “Rơđah bơngač tơlơi rơgơi” yua Anom bruă sang pơđok hră (Ding jum gru grua bơkơjăp drơi jăn hăng tuai čuă ngui) ngă hrŏm hăng Keh prăk Thiện Tâm (Anom bruă Vingroup) brơi kơ hơdôm boh anih pơđok hră amăng đơ đam dêh čar. Ƀơi Dak Lăk, rơdêh hơmâo rơbêh 2.000 hơdrôm hră hăng lu mơta tơlơi hrăm kah hăng văn học, hră pioh kơ ƀing čơđai, hră čih glăi gru akŏ pơdong lŏn ia, hơdrô hră kiăng lăng tui...Rơngiao kơ anun, rơdêh hơmâo tivi, măi computer, 6 boh măi computer djă ƀơi tơngan, măi pơdah tivi, măi wai lăng anih pơđok hră, măi pơđok hră brơi ƀing bôm mơta...

Hơmâo pơphun mơng rơnuč thun 2019 truh ră anai, Sang pơđok hră tơring čar Dak Lăk hơmâo ngă lu wơt laih ba hyu rơdêh pơđok hră ƀơi hơdôm boh sang hră kuaih ataih yaih. Yă Trần Thị Thu Hà, Kơ-iăng khua sang pơđok hră tơring čar Dak Lăk brơi thâo, hrŏm hăng bruă pơđok hră, pơƀuh hơdrôm hră phrâo, gah sang pơđok hră ăt pơphun lu bruă ngui ngor, hơmâo gơnam đơ anet pơtrut pran jua ƀing čơđai. Tui hăng akŏ bruă thun 2023, rơdêh pơđok hră “Rơđah bơngač tơlơi rơgơi” amra hơmâo ngă 96 wơt ba hyu, kiăng pok prong bruă pơđok hră kơ abih bang mơnuih, biă ñu hăng ƀing čơđai sang hră.

“Tui hluai kơ pô kiăng bơwih brơi, tơlơi hơmâo sit nik mơn, sang pơđok hră tơring čar amra pơplih tơlơi ngui ngor, hơdôm bruă ngui mơ-ak hrŏm hăng hơdrôm hră, ƀudah pơphun pơplông anet bơdjơ̆ nao hră, djru ƀing čơđai mưn amăng pran jua pơđok hră jing bruă ngă mơ-ak pran jua, huăo glêh glar, ƀu hơmâo pô pơgô̆ ôh mơ̆ djru pơtrut tui pran jua hor pơđok hră dong”.

Hrŏm hăng Dak Lăk, rơdêh pơđok hră “Rơđah bơngač tơlơi rơgơi” hơmâo pơphun ƀơi hơdôm boh tơring pơkŏn amăng kual Dap Kơdư. Ƀơi Gia Lai, rơdêh pơđok hră djŏp mơta ba hyu lu anih, hăng prăk pơphun ngă rơbêh 1 klai prăk. Hăng rơdêh hơmâo rơbêh 5.000 hơdrôm hră djŏp mơta, 10 boh măi computer hơmâo plang internet, tivi; rơngiao kơ anun, hơmâo hơdrôm hră pơhiăp hăng hơdôm boh măi điện tử djru kơ ƀing mơmot mơta. Tui hăng tơlơi lăi glăi mơng khua mua Sang pơđok hră tơring čar Gia Lai: Anai jing sa jơlan hơdră yôm biă mă, djru hơdôm boh sang pơđok hră dưi pơphun bruă pôr pơhing giăm hăng ană plơi hloh, djru “huăi kơƀah tơlơi pơhing, huăi ƀu thâo măi mok boh thâo”, pok prong hloh bruă pơđok hră, pơđok tơlơi pơhing.

Bơ ƀơi Lâm Đồng, Sang pơđok hră hơmâo ngă hrŏm ba hyu rơdêh pơđok hră “Rơđah bơngač tơlơi rơgơi” bơwih brơi 21 boh sang hră ƀơi djŏp gưl hrăm: gưl sa, gưl 2, gưl 3 ƀơi Đức Trọng, Lâm Hà hăng plơi prong Bảo Lộc. Hăng giăm 3.000 hơdrôm hră bơwih brơi kah hăng: Hră pơtô tơlơi hơdip hiam; pơtô thâo rơgơi hơdip mơda; pơtô tơlơi hrăm gah đah kơmơi đah rơkơi, hră văn học, hră pơđok akhan čơđai...ngă pơhưč hơdôm pluh rơbâo wơ̆t čô čơđai.

Rơdêh hơmâo anăn “Rơđah bơngač tơlơi rơgơi” pơjing rai tơlơi hơdip phrâo hiam hloh, djru ngă ba Akŏ bruă pơđĭ kyar boh thâo pơđok hră amăng plơi pla. Akŏ bruă pơtrut tui bruă hrăm hră lui kơ tha rơma amăng hơdôm boh sang pơđok, sang djă pioh gru grua đưm, sang jơnum plơi, grup hơmâo Khua dêh čar pơsit brơi laih. Rơdêh ôtô pioh hơdrôm hră djru pơđĭ tui boh thâo pơđok hră kơ ƀing čơđai sang hră.