Giăm 15 thun dong mơ̆ng hrơi hơmâo tŭ ư brơi tuh pơ alin, truh rơnuč thun 2025, Kơčăo bruă man pơdong anih čuă ngui pơdơi pơdă yom Cù Lao Mái Nhà ƀơi să Ô Loan, tơring čar Dak Lăk sit nik man pơdong laih. Kơčăo bruă anai prong giăm 200ha, prăk tuh pơ alin 5.000 klai, hơmâo čuk pơkra jing anih čuă ngui pơdơi pơdă pơ ia rơsĭ yom biă, hăng lu ring bruă hơmâo 6 asar pơtŭ. Ăt kah hăng lu mơnuih ƀơi ter hang ia rơsĭ Dak Lăk, ơi Võ Văn Ngầu, ƀơi să Ô Loan čang rơmang anai jing tơlơi pơplih kơtang, râu mơdưh tơlơi gêh găl čơkă tuai hyu ngui ƀơi ia rơsĭ mơ̆ng tơring čar: “Neh met wa dŏ tơguan sui laih. Tơdah kơčăo bruă hơmâo ngă klă lĕ, pơ anai jing anih hmư̆ ư, rơđah bơngač mơ̆ng tơring čar mơtăm”.

Mah pơphun man pơdong hăng lu tơlơi ƀuăn biă, samơ̆ tơdơi kơ giăm ha mơkrah thun man pơdong, ring bruă 5.000 klai anai kơnong dưi ngă bruă kraih 40 klai đôč. Anai jing bruă kar kăi hăng lu kơčăo bruă prong pơkŏn ƀơi Dak Lăk mơn. Tui hăng mrô jŭ yap, tơring čar hơmâo 39 kơčăo bruă čơkă tuai hyu ngui hơmâo brơi hră tuh pơ alin, amăng anun hơmâo truh 28 kơčăo bruă hăng prăk tuh pơ alin rơbêh 16.850 klai prăk glăk bưp tơlơi tơnap, tơlơi gun sui laih.

Kiăng dưi ngă tañ, tơring čar Dak Lăk hơmâo akŏ pơdong hơdôm grup mă bruă pơsir hĭ hơdôm tơlơi dŏ gun; pok “mông mă bruă kơtang hloh 30 hrơi mlăm či pơklaih brơi anŏ tơnap pok ala lŏn či čuk pơkra”. Lu grup trun nao tơl anih či pơsir brơi hơdôm tơlơi tơnap, kiăng bruă man pơdong dưi ngă tañ hloh.

Tui hăng ơi Đào Mỹ, Kơ-iăng khua Jơnum min mơnuih ƀôn sang tơring čar Dak Lăk, bruă pơsir đut hlao hơdôm kơčăo bruă ngă kaih ƀu kơnong kiăng huăi lui soh lŏn tơnah đôč ôh, ăt ngă gêl găl brơi kiăng hơmâo tơlơi đĭ kyar phrâo dong kơ bruă čơkă tuai hyu ngui amăng tơring čar: “Ƀing gơmơi lăp đing nao bruă hyu ĕp anom bruă tuh pơ alin sit nik dưi ngă bruă. Amra lăi glăi rơđah rơđông kơ hơdôm kơčăo bruă. Bơ anom bruă tuh pơ alin pơpă thơ ƀu ngă lĕ gơmơi hơmâo hơdră pơsir tui tơlơi pơtrun, ngă găl brơi tơlơi hơmâo, tơlơi gêh găl mơ̆ng tơring čar khŏm hơmâo mă yua, khŏm hơmâo pơtrut đĭ, biă ñu lĕ hơdôm kơčăo bruă yơyom”.

Hrŏm hăng pơhưč tuh pơ alin, pơklaih brơi anŏ gun, pơtrut ngă hơdôm kơčăo bruă čơkă tuai hyu ngui pơprong, Dak Lăk ăt glăk pơplih glăi abih bang bruă čơkă tuai hyu ngui amăng anih phrâo tơdơi kơ pơmut hrŏm. Ơi Trần Hồng Tiến, Khua gơnong bruă gru grua, bơkjăp drơi jăn hăng tuai čuă ngui brơi thâo, tơring čar thâo laih gru grua hơget či čơkă tuai hluai tui Tơlơi jơnum ngui kơphê, jơnum ngui sâu riêng nao hrŏm hăng bruă ngă hmua; ngui ngor akan ngừ ia rơsĭ, ngă yang akan pơlir hăng gru grua ia rơsĭ. Dak lăk ăt đĭ kyar laih lu plơi pla čơkă tuai hyu ngui nao hrŏm hăng bruă atông čing kual Dap Kơdư.

Pơ anăp anai, Dak Lăk amra pơtrut tui anŏ phara plah wah kual ter hang ia rơsĭ gah Ngŏ hăng dap kơdư gah Yŭ, đah mơ̆ng hơmâo gơnam lăp djơ̆ hăng rim khul tuai hyu ngui: “Ƀing gơmơi pơsit amra pơjing tơlơi tơnap jing gêl găl či đĭ kyar čơkă tuai hyu ngui. Kual gah Yŭ mă gru grua atông čing, kơphê yơh pơhưč kơ tuai. Kual gah Ngŏ đĭ kyar anih pơdơi pơdă, mă yua anih ngui ngor dŏ hơnong, sô hơđăp mơ̆ng đưm či pơhưč tuai. Gơmơi ƀu đĭ kyar luk puk, ƀu tuh pơ alin tơket tơkeng ôh, gơmơi ruah mă rim khul tuai hyu ngui lăp djơ̆”.

Tơdơi kơ ha thun pok prong anih čuă ngui “glai - ia rơsĭ”, Dak Lăk glăk hơmâo tơlơi pơsir blung a hăng anŏ tơnap gah bruă čơkă tuai hyu ngui. Lu kơčăo bruă đih pơdơi pơprong hơmâo pơtrut tui; hơdôm tơlơi dŏ kơđông hơmâo sem lăng pơsir hĭ; pơtruh nao rai klă biă.

Jơlan rơdêh đuăi hmar Khánh Hòa - Buôn Ma Thuột ƀiă či brơi nao rai laih; hơdôm kual tong wing hiam hloh mơ̆ng tơring čar hơmâo ba pơmut amăng anăn pơhưč tuh pơ alin...Tơlơi pleh ploh phara plah wah dap kơdư hăng ia rơsĭ glăk anet tui, sa anih čuă ngui yơyom hơmâo pơtŭ jar kmar laih anun gru grua hiam phara mơ̆ng Dak Lăk glăk akŏ pơjing tui laih./.

Tơlơi čih mrô 1: https://vov4.vov.vn/jarai/toloi-hing-ang-monuih-topul-thoi-su-xa-hoi/cran-toloi-cih-brua-coka-tuai-hyu-ngui-dak-lak-ep-jolan-poplih-kotang-hloh-amang-anih-anom-phrao-toloi-cih-mro-2-nga-hruaih-toloi-do-kodong-brua-coka-tuai-hyu-ngui-dak-lak-pojing-ano-hmu-hing-mong-gru-grua-phara