Tơkeng rai mơ̆ng sa bôh sang anô̆ ngă đang hmua, anih hmâo lu neh wa djuai ania Khmer dô̆ hơdip mơda, anun Huỳnh Thị Kẩm Huyên dong mơ̆ng anet thâo hluh kơ tơlơi glêh glar hăng tơnap kơƀah mơ̆ng amĭ ama ăt kah hăng mơnuih ƀôn sang plơi pla pô. Yua mơ̆ng tơlơi anun yơh pơtrut pran jua ñu kiăo tui jơlan hrăm bruă ia jrao, hăng čang rơmang ba glăi bôh thâo hăng tơngan pô pioh djru kơ mơnuih duam ruă ƀun rin klă hloh. Ơi ia jrao Kẩm Huyên lăi pơthâo, dong mơ̆ng anet ñu hmâo lăng ƀuh lu mơnuih gơgrong ba tơlơi duam ruă mơ̆ ƀu dưi pơjrao klă. Hmâo hơdôm mơnuih ruă kơnong kơ yua ƀu dưi pơjrao ječ hmao tlôn mơ̆ jing ruă kraih hloh anun ñu ƀuăn hăng drơi pô lơm prong đĭ khom ngă tơlơi hơget anun pioh djru gơñu dưi bơwih brơi klă gah bruă ia jrao, lơm anun amĭ ama dŏng yua tơlơi pơsit mơ̆ng ană dong:

“Amĭ ama lĕ ƀu hmâo ba tơbiă kơ bruă hrăm ƀudah ruah bruă hrăm kơ ană ôh. Lơm dô̆ anet kâo ăt juăt hmâo tơlơi ruă mơn, hăng rim tal ruă ƀuh amĭ ama bơwih brơi tơlơi suaih pral tơnap tap biă, tui anun hmâo tơlơi pơmin tơdơi anai dưi ngă tơlơi hơget amra djru mơnuih pơkon dưi bơwih brơi klă gah bruă ia jrao, amĭ ama duam ruă lĕ dưi bơwih brơi klă hloh. Anun kâo pơsit ruah hrăm bruă ia jrao”.

Thun 2015, tơdơi kơ hmâo mă ƀăng ơi ia jrao, Huỳnh Thị Kẩm Huyên dưi čơkă mut mă bruă ƀơi Anom pơjrao ječ, Sang ia jrao prong tơring glông Châu Thành (ră anai lĕ Anom ia jrao tơring glông Châu Thành). 10 thun rơgao, ơi ia jrao Huỳnh Thị Kẩm Huyên ƀu hơdor ôh hơdôm hơpă ñu bơwih brơi tơlơi suaih pral, lăi pơthâo bruă pơjrao tơlơi ruă kơ hơdôm čô mơnuih. Lu mơnuih hmâo tơlơi rơkă ruă yua kơ pơjrom, kơañăk ƀu hmao thâo dưi hmâo ñu hăng ƀing gŏp ñu pơjrao brơi ječ hmao tlôn hlâo kơ ba nao pơ̆ anom pơjrao lăp djơ̆. Ƀu kơnong kơ abih pran jua hăng hơdôm mơnuih pơjrao ječ, ơi ia jrao Huyên dô̆ biă ñu gir run hăng bơwih brơi abih pran jua ƀing mơnuih ruă tha rơma. Amăng anun hmâo ƀu ƀiă mơnuih tha rơma ba nao pơ̆ sang ia jrao hmâo tơlơi pơmin bơngot ƀu mơ-ak, đa lĕ hil kơ ơi ia jrao. Samơ̆ hăng tơlơi rơ-un hăng abih pran jua, Huyên hmâo pơplih laih hơdôm mơnuih đing đăo jing tơlơi đăo kơnang hăng hmâo tơlơi kiăng khăp.

Ơi Nguyễn Văn Liêu ƀơi să Hưng Mỹ, tơring glông Châu Thành – sa čô mơnuih ruă tơlang tơleh, ŭt tơlang hăng ruă tơlang rŏng, mơ̆ng lu thun hăng anai juăt mut tơbiă ƀơi sang ia jrao brơi thâo: Anai lĕ sang ia jrao gah tơring glông mơ̆ dŏng giăm kual krah tơring čar, mơnuih nao pơjrao ječ, pel ĕp pơjrao tơlơi ruă biă ñu lĕ mơnuih tha rơma hăng sang anô̆ ƀun rin, jing hơdôm mơnuih ƀu hmâo lu prăk kak samơ̆ ơi ia jrao abih pran jua mă bruă, lăng ba tŏng ten:

“Lăi hrŏm ơi ia jrao ƀơi anai abih pran jua biă, kâo hmâo tơlơi ruă hơget thơ, iâo hă ơi ia jrao ƀuh ƀô̆ mơtăm. Bơ̆ ơi ia jrao Huyên ăt tui anun mơn, hur har pran jua, kâo hmâo tơlơi ruă hơget thơ iâo hă ñu rai mơtăm, abih pran jua mă bruă biă”.

 Hơdor kơ tơlơi pơtô mơ̆ng Wa Hồ hăng ƀing ơi nai ia jrao: “Pran jua ơi ia jrao kah hăng amĭ muih”, ơi ia jrao Huỳnh Thị Kẩm Huyên ƀu pơdơi laih hrăm tui, pơhrăm drơi pô pioh ngă klă hloh bruă gơgrong mơ̆ng pô. Djă pioh djơ̆ tơlơi ƀuăn mơ̆ng pô, ñu hmâo gir run pơhrăm hăng ră anai hrăm giong Chuyên khoa I – Nội khoa laih.

Bruă mă ƀơi sang ia jrao glêh glar biă, samơ̆ hăng sa čô ơi ia jrao đah kơmơi kah hăng Huyên jai glêh lar hloh. Hơdôm mông dô̆ gak pơjrao ječ mơ̆ng mlăm ƀơphar kơ dah, hơdôm mơnuih ruă kraih khom hmâo tơlơi hơđong pran jua hăng pơsit djơ̆,... tơnap biă. Samơ̆ Huyên ăt ƀu kơdun yak ôh. Biă ñu, sang ia jrao tŭ mă mơnuih ruă lu ñu lĕ djuai ania Khmer, sang anô̆ ƀun rin dưi hmâo tơring čar gum djru hră pơgang gah ia jrao, tơlơi thâo hluh ƀu lu:

“Neh wa gơmơi ƀơi anai giăm tơring kual dô̆ thâo hluh ƀơƀiă lơm nao pel ĕp tơlơi ruă, samơ̆ hơdôm mơnuih pơ̆ plơi pla ataih sit nik tơnap tap biă. Hmâo ƀing ơi yă tha nao pơ̆ sang ia jrao mơ̆ ƀu hmâo mơnuih kiăo tui ƀudah yua kơ tơlơi hơdip tơnap đơi pô sang ƀu dưi nao tom pioh bơwih brơi. Hmâo mơnuih đa ƀu hmâo prăk, ƀing gơmơi gum pơčruh hrŏm blơi asơi huă, get ia ƀudah hơdôm gơnam hơget kiăng yua amăng rơwang kiăng yua”.

Ơi ia jrao CK1, Khua Anom ia jrao tơring glông Châu Thành pơsit: ơi ia jrao Kẩm Huyên lĕ djuai ơi ia jrao thâo bruă abih pran jua hăng mơnuih ruă, pran jua gơgrong hăng hmâo bôh thâo mă bruă kơjăp, dưi hmâo ƀing gŏp kiăng khăp.

“Gah bôh thâo bruă mă amăng hơdôm bruă pel ĕp, pơjrao tơlơi ruă, lăi hrŏm ơi ia jrao Kẩm Huyên lĕ sa amăng ƀing ơi ia jrao thâo bruă, ƀuh rơđah mơ̆ng anom. Biă ñu lĕ bôh thâo mă bruă, bruă ia jrao; dua lĕ bruă bưp ră ruai ăt kah hăng dŏ dŏng ƀong huă hăng mơnuih ruă. Mơta pơkon lĕ Kẩm Huyên ăt hmâo pran jua hrăm tui kơ bruă pô mă, hăng ră anai ñu ăt hrăm giong laih mơn tơdơi kơ hrăm giong gưl dlông”.

Amăng krah tơlơi hơdip jai hrơi tơnap hăng gun lu bruă, hơdôm tơlơi ruai kơ pran jua khăp pap, abih pran jua hăng mơnuih ruă ƀun rin kah hăng ơi ia jrao Huỳnh Thị Kẩm Huyên sit nik lăp pơpŭ biă. Čang rơmang lĕ, jai hrơi jai hmâo dong lu ơi ia jrao djă amăng pô hơtai bôh hur har, pioh bruă bơwih brơi gah ia jrao, biă ñu hăng mơnuih ƀun rin jai hrơi jai klă hloh. Ơi ia jrao Kẩm Huyên ƀu kơnong kơ tơlơi ư-ang mơ̆ng sang anô̆, mơ̆ng sang ia jrao ôh mơ̆, dô̆ jing gru ba jơlan hlâo kơ ƀing gŏp klăk ai hrăm tui dong./.