Tui hăng tơlơi pơsit mơ̆ng Khua dêh čar, Trung tướng Trương Mạnh Dũng, Khua tơhan kual 1 hơmâo pơkiăo nao, ruah ngă Kơ-iăng khua djru bruă. Thiếu tướng Trần Xuân Mạnh, Kơ-iăng khua tơhan, Khua djru bruă tơhan kual 1 hơmâo jao ngă bruă git gai khul tơhan. Pơhiăp ƀơi mông jơnum, Đại tướng Phan Văn Giang bơni kơ hơdôm tơlơi gum pơgôp mơ̆ng Trung tướng Trương Mạnh Dũng amăng bruă git gai tơhan blah ngă Khul tơhan ngă truh kih djŏp bruă hơmâo jao, bong kjăp rơnuk rơnua, akŏ pơjing bruă pơgang lŏn ia hơmâo abih bang mơnuih gum ngă kjăp phik.

Hăng Thiếu tướng Trần Xuân Mạnh, Đại tướng kiăng lơ̆m ngă bruă phrâo lĕ pơtrut tui tơlơi rơgơi, apăn bruă, hrŏm hăng khul ping gah, Khul khua tơhan kual 1 pơƀut git gai, ngă klă djŏp bruă blah ngă, pơgang lŏn ia; pơđĭ tui anŏ klă, kjăp bruă blah ngă; thâo djŏp tơlơi hơmâo, ƀu brơi sư̆ brư̆, dŏ kơtuă ôh. Laih dong, akŏ pơdong kual pơgang hlâo, pơmut hrŏm đĭ kyar bơwih ƀong huă - mơnuih mơnam hăng pơgang lŏn ia, rơnuk rơnua; bong kjăp tơlơi gum pơgôp, rơnôm amăng anih mă bruă, ngă djơ̆ tơlơi phiăn, lăng ba tơlơi hơdip ling tơhan, ngă klă djŏp bruă hơmâo jao./.