Pơhiăp ƀơi mông ngă lơphet, Đại tướng Phan Văn Giang, Ding kơna ding jum kơđi čar, Kơ-iăng khua Ping gah khul tơhan, Ding jum khul ling tơhan lăi rơđah, Lâm Đồng jing tơring čar gah dơnung Dap kơdư, yôm biă gah bruă bơwih ƀong, pơgang lŏn ia, rơnuk rơnua. Pơ ala kơ khua mua Ping gah, Kơnuk kơna, Đại tướng Phan Văn Giang bơni hơ-ơč kơ hơdôm tơlơi hơmâo ngă prong mơ̆ Ping gah, gong gai, tơhan hăng mơnuih ƀôn sang djŏp djuai ania Lâm Đồng hơmâo ngă amăng rơbêh 50 thun rơgao.

Đại tướng pơtă pơtăn, pơ anăp, Lâm Đồng kiăng pơƀut ngă truh kih djŏp hơnong pơkă pơđĭ kyar bơwih ƀong huă, mơnuih mơnam, pơhlôm pơgang lŏn ia - rơnuk rơnua, ngă atur kjăp kiăng tơring čar kjăp tơkai yak amăng rơnuk pơplih phrâo. Gir pơplih anom bruă kơnuk kơna, pơđĭ kyar boh thâo ia rơgơi, pơčeh phrâo, mă yua boh thâo mrô, ngă mơak anih anom tuh pơ alin sĭ mơdrô, pơđĭ tui tơlơi bơkơtưn. Ƀu pơdơi pơdă hơkrŭ kjăp, lăng ba, akŏ pơjing khul gum pơgôp djuai ania, ngă klă hơdôm tơlơi pơtrun, pơhlôm mơnuih ƀôn sang hơmâo lăng ba klă, biă ñu sang anŏ hơmâo anăn kơnuk kơna djru, kual mơnuih ƀôn sang djuai ƀiă. Gir ba Lâm Đồng jing tơring čar đĭ kyar tañ hăng kjăp./.