Amăng mông ngă lơphet, Khua dêh čar brơi thâo: Hrơi blan mut hrŏm dŏ lu tơlơi lông, samơ̆ ƀing ta mut hrŏm anăm gơnang nao hlơi đơi ôh; kiăng tŭ mă tơlơi gal, gir run mut hrŏm, pơhlôm ba glăi tŭ yua hăng anŏ phara kiăng pơđĭ kyar tañ, hơđong kjăp.

Khua dêh čar brơi thâo: mrô jŭ yap FTA hơmâo pơƀuh brơi mrô tong ten, tơpă sit, djop mơta kơ rơnoh dưi ngă tui hơdôm tơlơi ƀuăn FTA mơng hơdôm boh tơring čar; ngă atur yôm phăn, djru kơnuk kơna hăng hơdôm ding jum, gơnong bruă, gong gai ƀon lan ba tơbiă hơdră bruă git gai wai lăng pơkra gơnam, sĭ mơdrô pơ tač rơngiao, pơhlôm djơ̆ tơlơi sit nik, dưi ngă kiăng pơtrut bơwih ƀong, sĭ mơdrô pơ tač rơngiao.

Bruă pơtrut kơtang jơnum bơkơtuai, kĭ pơkôl hăng ngă tui 17 FTA hăng djop dêh čar, bơnah ngă hrŏm prong amăng rŏng lŏn tơnah, ba Việt Nam jing sa amăng hơdôm boh dêh čar ba jơlan hlâo amăng kual hăng rŏng lŏn tơnah kơ bruă mut hrŏm hơdôm jơlan gah ngă hrŏm bơwih ƀong huă dua bơnah hăng djop bơnah. Bruă tŭ mă, ngă tui tŭ yua hơdôm tơlơi FTA ăt pơgôp pơtrut rơnoh sĭ mơdrô pơ tač rơngia đĭ kơtang, hơđong nua hăng hơdôm mrô jŭ yap bơwih ƀong pok prong, pơgôp yôm phăn amăng pơđĭ kyar bơwih ƀong huă amăng lŏn ia ta.